សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ អគ្គនាយកអគ្គិសនីកម្ពុជាបានឱ្យដឹងថា បច្ចុប្បន្ន កម្ពុជាសម្រេចបានអត្រាផ្គត់ផ្គង់អគ្គិសនីដល់លំនៅឋានប្រជាពលរដ្ឋប្រមាណ ៩៥,២៤% ពីបណ្តាញជាតិ ដែលមានស្ថិរភាពរួចហើយ និងមានភូមិចំនួន ៩៩,១៥% ហើយចំពោះភូមិដែលនៅសល់ គឺជាភូមិនៅដាច់ស្រយាល ដូចជា ប្រភេទលិចទឹកពុំអាចសាងសង់បណ្តាញអគ្គិសនីបាន។
លោក ប្រាំង ជលសា អគ្គនាយកអគ្គិសនីកម្ពុជា បានលើកឡើងថា ទោះភូមិពុំទាន់អាចសាងសង់បណ្ដាញអគ្គិសនីទៅដល់បាន ប៉ុន្តែប្រជាពលរដ្ឋមានអគ្គិសនីប្រើប្រាស់បានតាមរយៈប្រព័ន្ធផលិតពីថាមពលពន្លឺព្រះអាទិត្យ ដូច្នេះ មានន័យថា ចំនួនភូមិមានអគ្គិសនីប្រើប្រាស់ ១០០% ទៅហើយ។ រីឯប្រភពផ្គត់ផ្គង់ពីបណ្តាញជាតិវិញមានទំហំ ៥.៣៦០ MW ដែលអាចផលិតជានិរន្តបាន ៣.៦០០ MW កើនឡើងប្រមាណ ២៥ដង។
លោក អគ្គនាយកអគ្គិសនីកម្ពុជា ក្នុងពិធីអបអរសាទរខួប២០ឆ្នាំរបស់មូលនិធិអគ្គិសនីភាវូបនីយកម្មជនបទ (ម.អ.ជ.) និងសម្ពោធសៀវភៅ «ដំណើរវិវត្តន៍នៃអគ្គិសនីភាវូបនីយកម្ម» នៅអគ្គិសនីកម្ពុជា កាលពីថ្មីៗនេះបានឱ្យដឹងថា នៅដើមឆ្នាំ២០០០ កំលាំងផលិតកម្មទូទាំងប្រទេសមានប្រមាណ ១៥០ MW និងអត្រាអ្នកមានអគ្គិសនីប្រើប្រាស់តិចជាង ១០% ប៉ុណ្ណោះ។
លោក អគ្គនាយក បានថ្លែងថា ការទទួលបានអគ្គិសនីប្រើប្រាស់បានផ្តល់ភាពងាយស្រួលក្នុងជីវភាពរស់នៅរបស់ប្រជាពលរដ្ឋ ហើយស្ថានភាពគ្រួសារក៏ត្រូវបានកែលម្អកើនឡើងដោយអាចបង្កើត និងបង្កើនមុខរបរជួយដល់ស្ត្រីជាមេផ្ទះ ជាពិសេសដល់ការសិក្សារបស់កូនចៅពួកគេ។ យ៉ាងណាមិញ អគ្គិសនីកម្ពុជានឹងប្រឹងប្រែងឱ្យអស់លទ្ធភាពមិនឱ្យឡើងថ្លៃ ក៏ដូចជារកវិធីសាស្ត្របញ្ចុះថ្លៃតាមរយៈការប្រើប្រាស់បច្ចេកវិទ្យាទំនើបដើម្បីសន្សំសំចៃលើចំណាយប្រតិបត្តិការ។
ក្នុងឱកាសដដែលនេះ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានគូសបញ្ជាក់ថា បើគ្មានសន្តិភាព គឺគ្មានអគ្គិសនី គ្មានការវិនិយោគ គ្មានពេលសម្រាប់គិត និងធ្វើផែនការអ្វីទាំងអស់ ជាពិសេសផែនការគម្រោងហេដ្ឋារចនាសម្ព័ន្ធនៅក្នុងវិស័យអគ្គិសនី ដែលទាមទារពេលវេលាយូរ។
ឯកឧត្តមរដ្ឋមន្ត្រី ក៏បានអបអរសាទរដល់អគ្គិសនីកម្ពុជាចំពោះការប្រឹងប្រែងឥតឈប់ឈរក្នុងនាមជាប្រតិបត្តិករឯកនាំមុខ ជាពិសេសជំរុញការអភិវឌ្ឍវិស័យអគ្គិសនីឱ្យកាន់តែជឿនលឿនបន្ថែមទៀត និងសម្រេចតាមផែនការសកម្មភាពរបស់រដ្ឋាភិបាលដែលបានកំណត់៕
Account
Security
Favourite Content