បរទេស៖ យោងតាមប្រភពព័ត៌មានពីបរទេសបានរាយការណ៍ថា សេដ្ឋកិច្ចសហភាពអឺរ៉ុបកំពុងជួបនឹងបញ្ហាប្រឈមកាន់តែខ្លាំងដោយសារតែអស្ថិរភាពនយោបាយ បញ្ហារចនាសម្ព័ន្ធ និងគោលនយោបាយរបស់សហរដ្ឋអាមេរិកក្នុងរដ្ឋបាលលោក Trump។

ឥឡូវនេះ សហភាពអឺរ៉ុបកំពុងស្ថិតនៅក្នុងដំណាក់កាលនៃហានិភ័យខ្ពស់ ដោយសារភាពជាប់គាំងសេដ្ឋកិច្ច ការបែងចែកពាណិជ្ជកម្ម និងភាពមិនប្រាកដប្រជានៃភូមិសាស្ត្រនយោបាយ រួមផ្សំដោយសង្រ្គាមដែលកំពុងបន្តក្នុងប្រទេសអ៊ុយក្រែន និងទំនាក់ទំនងកាន់តែតានតឹងជាមួយសហរដ្ឋអាមេរិក ជាពិសេសចាប់តាំងពី Donald Trump ចូលកាន់តំណែងជាប្រធានាធិបតីក្នុងខែមករា។ ទំនាក់ទំនងជិតស្និទ្ធជាប្រវត្តិសាស្ត្ររបស់សហភាពអឺរ៉ុបជាមួយសហរដ្ឋអាម៉េរិកត្រូវបានរងផលប៉ះពាល់យ៉ាងខ្លាំង ដោយសារគោលនយោបាយពាណិជ្ជកម្ម និងការពារជាតិរបស់ Trump ។ លើសពីនេះ បទបញ្ជាប្រតិបត្តិរបស់ Trump ដែលដាក់ពន្ធ ២៥ លើការនាំចូលដែកថែប និងអាលុយមីញ៉ូមទាំងអស់បានបង្កឱ្យមានការព្រួយបារម្ភទូទាំងសហភាពអឺរ៉ុប ដោយអឺរ៉ុបលើកឡើងថា ពន្ធនេះមិនសមហេតុផល ហើយសន្យាថានឹងការពារឧស្សាហកម្មអឺរ៉ុបពីគោលនយោបាយទាំងនេះ។

សហភាពអឺរ៉ុបបានចាត់ទុកពន្ធគយរបស់សហរដ្ឋអាម៉េរិកទាំងនេះថា មានភាពមិនច្បាស់លាស់ខាងសេដ្ឋកិច្ច ដែលរំខានដល់ប្រសិទ្ធភាពទីផ្សារ។ លើសពីនេះ តំបន់នេះប្រឆាំងនឹងការសម្រេចចិត្តរបស់ Trump ក្នុងការយកពន្ធសងសឹកឱ្យស្មើភាពគ្នា (Reciprocal Tariff) ដោយចាត់ទុកថាជាវិធីសាស្រ្តខុសទំនង ហើយបានព្រមានថា តំបន់អឺរ៉ុបនឹងឆ្លើយតបយ៉ាងរហ័ស និងរឹងមាំចំពោះរបាំងណាមួយដែលខ្លួនចាត់ទុកថាអយុត្តិធម៌ចំពោះពាណិជ្ជកម្មសេរី។ មិនត្រឹមតែប៉ុណ្ណោះ សហភាពអឹរ៉ុនបង្ហាញសញ្ញាអំពីការត្រៀមខ្លួន ដើម្បីចូលរួមក្នុងជម្លោះពាណិជ្ជកម្មប្រសិនបើចាំបាច់។ ទន្ទឹមនឹងនេះ ការមិនរាប់បញ្ចូលបណ្តាប្រទេសសហភាពអឺរ៉ុបចូលក្នុងការចរចាសន្តិភាពជាមួយប្រធានាធិបតីរុស្ស៊ីដើម្បីបញ្ចប់សង្រ្គាមជាមួយនឹងអ៊ុយក្រែន បានធ្វើឱ្យទំនាក់ទំនងអាមេរិក និងសហភាពអឺរ៉ុបកាន់តែតានតឹង។ Trump បានរិះគន់បណ្តាប្រទេសអ៊ឺរ៉ុបចំពោះការមិនរួមចំណែកធនធានគ្រប់គ្រាន់សម្រាប់វិស័យការពារជាតិ ដោយលើកហេតុផលថា សមាជិកណាតូគួរតែបង្កើនការចំណាយលើវិស័យការពារជាតិរបស់ពួកគេពី ១,៩ ភាគរយទៅ ៥ ភាគរយនៃផលិតផលក្នុងស្រុកសរុប។

យ៉ាងណាមិញ ប្រទេសជាច្រើននៅអឺរ៉ុបកំពុងប្រឈមមុខនឹងបំណុលសាធារណៈខ្ពស់ និងឱនភាពថវិកា ខណៈដែលសេដ្ឋកិច្ចកំពុងធ្លាក់ចុះ និងកំណើនប្រជាជនកើនឡើង ក៏ដូចជាការកើនឡើងនៃការចំណាយសង្គម។ ដូច្នោះហើយ ការបង្កើនការចំណាយលើវិស័យការពារជាតិគឺជាបញ្ហាប្រឈមដ៏សំខាន់មួយ។ ការព្យាករណ៍កំណើនសេដ្ឋកិច្ចរបស់សហភាពអឺរ៉ុបសម្រាប់ឆ្នាំ ២០២៥ ស្ថិតនៅកម្រិត ១,៥ ភាគរយប៉ុណ្ណោះ ដែលឆ្លុះបញ្ចាំងពីនិន្នាការធ្លាក់ចុះក្នុងរយៈពេលប៉ុន្មានឆ្នាំចុងក្រោយនេះ បើប្រៀបធៀបទៅនឹងសហរដ្ឋអាម៉េរិក និងប្រទេសចិន។ របាយ​ការណ៍​បាន​បង្ហាញ​ថា អត្រា​កំណើន​របស់​តំបន់​ចាយ​ប្រាក់​អឺរ៉ូ​អាច​មាន​ប្រហែល ១ ភាគរយនៅ​ឆ្នាំ​នេះ។ ក្នុងរយៈពេល ១៥ ឆ្នាំកន្លងមកនេះ សេដ្ឋកិច្ចអឺរ៉ុបបានធ្លាក់ចុះយ៉ាងខ្លាំងនៅពីក្រោយសហរដ្ឋអាមេរិក ដែលនាំមុខការផ្លាស់ប្តូរបច្ចេកវិទ្យា និងឌីជីថល។ ស្របពេលដែលសហរដ្ឋអាម៉េរិកបានបង្កើនផលិតផលក្នុងស្រុកសរុបរបស់ខ្លួន ៧០ ភាគរយ សហភាពអឺរ៉ុបមើលឃើញថាមានការកើនឡើងត្រឹមតែ ២០ ភាគរយប៉ុណ្ណោះ។

កត្តាជាច្រើនរួមមាន ការធ្លាក់ចុះផលិតភាព និងការប្រកួតប្រជែង គួបផ្សំនឹងការកើនឡើងនៃថ្លៃពលកម្ម បានបំផ្លាញភាពរឹងមាំនៃឧស្សាហកម្មក្នុងតំបន់ បើប្រៀបធៀបនឹងសហរដ្ឋអាម៉េរិក និងចិន។ ដើម្បីទទួលបានការប្រកួតប្រជែងឡើងវិញ សហភាពអឺរ៉ុបមានគោលបំណងកាត់បន្ថយការិយាធិបតេយ្យ ពង្រីកការវិនិយោគក្នុងក្រុមហ៊ុនបញ្ញាសិប្បនិមិត្ត (AI) និងក្រុមហ៊ុនបច្ចេកវិទ្យា និងកាត់បន្ថយការចំណាយថាមពល។ ទោះយ៉ាងណាក្តី នៅពេលណាដែលពួកគេអនុវត្តវិធានការជំរុញសេដ្ឋកិច្ច សហរដ្ឋអាមេរិកជារឿយៗបង្ហាញមកវិញជាមួយគំនិតផ្តួចផ្តើមធំជាង និងលឿនរហ័សជាង។

ទន្ទឹមនឹងនេះ ប្រទេសជាច្រើនរបស់សហភាពអឺរ៉ុបមិនបានប្រកាន់ខ្ជាប់នូវច្បាប់សារពើពន្ធរបស់តំបន់នោះទេ ដែលកំណត់ថាបំណុលសាធារណៈមិនគួរលើសពី ៦០ ភាគរយនៃផលិតផលក្នុងស្រុកសរុប ហើយឱនភាពថវិកាគួរតែស្ថិតនៅក្រោម ៣ ភាគរយនៃផលិតផលក្នុងស្រុកសរុប។ ជាក់ស្តែងប្រទេសក្រិច អ៊ីតាលី បារាំង បែលហ្ស៊ិក និងអេស្ប៉ាញសុទ្ធតែមានបំណុលសាធារណៈលើសពី ១០០ ភាគរយនៃផលិតផលក្នុងស្រុកសរុបរបស់ពួកគេ ខណៈដែលសមាជិកសហភាពអឺរ៉ុបចំនួន ១៣ ផ្សេងទៀតលើសកម្រិត ៦០ ភាគរយ។ លើសពីនេះ ប្រទេសសហភាពអឺរ៉ុបចំនួន ១០ បានលើសកម្រិតកំណត់សមាមាត្រឱនភាពថវិកា ៣ ភាគរយដែលកំណត់ដោយប្លុកនេះ។ ជាលទ្ធផល បំណុលសាធារណៈខ្ពស់ និងឱនភាពថវិកាធ្វើឱ្យប្រទេសទាំងនេះមានការលំបាកកាន់តែខ្លាំងឡើងក្នុងការរួមចំណែកមូលនិធិទៅកាន់ឧស្សាហកម្មការពារជាតិរបស់ពួកគេ។

ស្ថានភាពដែលអាក្រក់ជាងនេះទៅទៀត គឺអតិផរណាបន្តកើនឡើងនៅទូទាំងទ្វីបអឺរ៉ុប។ ធនាគារកណ្តាលអឺរ៉ុប (ECB) កំណត់គោលដៅអតិផរណា ២ ភាគរយក្នុងរយៈពេលមធ្យម ប៉ុន្តែអត្រាអតិផរណារបស់តំបន់ចាយប្រាក់អឺរ៉ូនៅតែមានប្រហែល ៣​ ភាគរយក្នុងប៉ុន្មានខែថ្មីៗនេះ។ លើស​ពី​នេះ​ទៅ​ទៀត ការ​ស្តុក​ទុក​ឧស្ម័ន​ធម្មជាតិ​របស់​សហភាព​អឺរ៉ុប​បច្ចុប្បន្ន​មាន​សមត្ថភាព​ក្រោម ៥០ ភាគរយ ដែលទាមកម្រិតមធ្យមភាគ។ តម្លៃ​ឧស្ម័ន​បាន​ឡើង​ដល់​កម្រិត​ខ្ពស់​ក្នុង​រយៈពេល​ពីរ​ឆ្នាំ ​ដោយសារ​អាកាសធាតុ​ត្រជាក់ និង​ការ​ធ្លាក់​ចុះ​ទុនបម្រុង​៕