អន្តរជាតិ ៖ សម្ព័ន្ធសេដ្ឋកិច្ច BRICS ដែលគឺជាអង្គការអន្តររដ្ឋាភិបាលដែលរួមមានប្រទេសប្រេស៊ីល រុស្ស៊ី ឥណ្ឌា ចិន អាហ្វ្រិកខាងត្បូង អ៊ីរ៉ង់ អេហ្ស៊ីប អេត្យូពី និងអារ៉ាប់រួម ត្រូវបានរាយការណ៍ថា មានគម្រោងបង្កើតធនាគារកណ្តាលក្នុងគោលបំណងដើម្បីបង្កើតរូបិយប័ណ្ណរួមរបស់ខ្លួន។ ជាក់ស្តែង អនុរដ្ឋមន្ត្រីការបរទេសរុស្ស៊ី លោក Sergei Ryabkov ថ្មីៗនេះ បានបញ្ជាក់ពីការបង្កើតធនាគារកណ្តាលនេះ ដែលជាសញ្ញាមួយបង្ហាញថា នឹងឈានដល់ការបង្កើតរូបិយប័ណ្ណ BRCIS នាពេលមុខាងមុខដ៏ខ្លី។

លោក Ryabkov ត្រូវបានចោទសួរពីគម្រោងបង្កើតរូបិយប័ណ្ណរួមរបស់ BRICS ។ ជាការឆ្លើយតប លោក Ryabkov បានលើកឡើងថា តំបន់នេះកំពុងដោះស្រាយបញ្ហប្រឈម និងជំហានបន្ទាន់បំផុតមួយចំនួនដើម្បីឈានទៅដល់ការបង្កើតរូបិយប័ណ្ណរួមបាន។

BRICS គ្រោងបង្កើតធនាគារកណ្តាល

ពេញមួយឆ្នាំចុងក្រោយនេះ សម្ព័ន្ធសេដ្ឋកិច្ច BRICS បាន និងកំពុងជំរុញការអភិវឌ្ឍរូបិយប័ណ្ណរួមរបស់ខ្លួន។ ជាការពិត សម្ព័ន្ធសេដ្ឋកិច្ចនេះ បាន និងកំពុងពិភាក្សាអំពីលទ្ធភាពនានា ដើម្បីបង្កើនកិច្ចខិតខំប្រឹងប្រែងក្នុងការធ្វើបដិដុល្លារនីយកម្ម (ការឈប់ប្រើប្រាស់លុយដុល្លារ) របស់ខ្លួនបន្ថែមទៀត។ ទោះជាយ៉ាងនេះក្តី មានក្តីកង្វល់ដែលកំពុងលេចឡើងមួយចំនួនទាក់ទងនឹងគម្រោងនេះ ដើម្បីឈានទៅសម្រេចបានជាផ្លែផ្កា។

លោក Ryabkov បានបង្ហាញពីភាពជាប់គាំងដែលសម្ព័ន្ធសេដ្ឋកិច្ចនេះដែលកំពុងជួបប្រទះ។ ជាពិសេស លោកបានបញ្ជាក់ថា សម្ព័ន្ធសេដ្ឋកិច្ច ដែលមានអាយុ ១៥ ឆ្នាំ នេះ ទើបតែបានពង្រីកខ្លួនទ្វេដង។ ដូច្នេះ​ហើយ លោក​បាន​អះអាង​ថា ប្លុក​នេះ ​«​ពិបាក​នឹង​ត្រៀម​ខ្លួន​​សម្រាប់ការ​បោះជំហាន​ទៅរកការបង្កើតធនាគារកណ្តាល»។ ទោះ​ជា​យ៉ាង​ណា​ក៏​ដោយ លោក​ក៏​បាន​កត់​សម្គាល់​ថា “នេះ​មិនមែនមាន​ន័យ​ថា ​គំនិតនេះ​ត្រូវ​បាន​ពន្យារ​ពេល​ឡើយ។

ប្រទេសក្នុងប្លុកនេះបានបញ្ចេញរបាយការណ៍ដែលមិនសូវជាមានភាពស៊ីសង្វាក់គ្នាលើគម្រោងអភិវឌ្ឍន៍នេះ។ ទោះយ៉ាងណាក៏ដោយ របាយការណ៍ទាំងនេះនៅតែបង្ហាញពីភាពចាំបាច់រួមមួយក្នុងការការអភិវឌ្ឍធនាគារកណ្តាលនៅក្នុងប្លុកនេះ។ ជាពិសេស លោក Ryabkov បានធានាថា ការបង្កើតធនាគារកណ្តាលគឺជាផ្នែកសំខាន់ក្នុងប្លុកនេះ។

យ៉ាងណាក៏ដោយ ការអភិវឌ្ឍដ៏សំខាន់បែបនេះទំនងជាត្រូវការពេលវេលាខ្លះ មុននឹងអាចសម្រេចបានផ្លៃផ្កា។ បន្ទាប់មកទៀត លោក Ryabkov ត្រូវបានសួរអំពីពេលវេលានៃគម្រោងបង្កើតធនាគារកណ្តាលនេះ។ ទោះបីជាលោកមិនកំណត់ពេលវេលាជាក់លាក់ក៏ដោយ ក៏លោកបាននិយាយថា ពេលវេលាមិនត្រូវបានគណនាជាឆ្នាំ និងច្រើនទស្សវត្សទេ ប៉ុន្តែគម្រោងបង្កើតធនាគារកណ្តាលសម្រាប់ប្លុកនេះអាចកើតឡើងក្នុងរយៈពេលមួយដ៏លឿន។

យោងតាមតំណាង IMF របស់រុស្ស៊ី សម្ព័ន្ធសេដ្ឋកិច្ច BRICS បានត្រៀមខ្លួនរួចជាស្រេចក្នុងការប្រើប្រាស់រូបិយប័ណ្ណរបស់ខ្លួនជំនួសឱ្យប្រាក់ដុល្លារអាមេរិក ចំពេលប្រាក់ដុល្លារអាមេរិកកំពុងជួបបញ្ហា ហើយប្លុកនេះត្រូវតែរៀបចំសម្រាប់ករណីដែលប្រាក់ដុល្លារអាមេរិកដួលរលំ។ សម្ព័ន្ធសេដ្ឋចកិច្ច BRICS ដែលជាអង្គការអន្តររដ្ឋាភិបាលដែលរួមមានប្រទេសប្រេស៊ីល រុស្ស៊ី ឥណ្ឌា ចិន អាហ្វ្រិកខាងត្បូង អ៊ីរ៉ង់ អេហ្ស៊ីប អេត្យូពី និងអារ៉ាប់រួម និងប្រទេសដែលគាំទ្រជាច្រើនទៀត បានធ្វើការរួមគ្នាក្នុងការឈប់ប្រើប្រាស់ប្រាក់ដុល្លារអាមេរិកមួយរយៈពេលមកហើយ។

ប្លុក BRICS កំពុងធ្វើការរួមគ្នាដើម្បីបង្កើតរូបិយប័ណ្ណ BRICS ថ្មី ដើម្បីជំនួសប្រាក់ដុល្លារអាមេរិក រួមជាមួយនឹងរូបិយប័ណ្ណក្នុងស្រុករវាងប្រទេសនានានៅក្នុងប្លុកនេះ។ នៅក្នុងបទសម្ភាសន៍ជាមួយសារ័ត៌មាន RIA Novosti របស់រុស្ស៊ី តំណាង IMF រុស្ស៊ី លោក Alexey Mozhin បានកត់សម្គាល់ថា ភាពខ្វះខាតនៃប្រព័ន្ធហិរញ្ញវត្ថុបច្ចុប្បន្នបានលេចឡើងកាន់តែច្បាស់។ លើសពីនេះ លោកបានចង្អុលបង្ហាញថា ការផ្សព្វផ្សាយជាច្រើនបានចាប់ផ្តើមនិយាយអំពីសម្ព័ន្ធសេដ្ឋកិច្ច BRICS ជាក្រុមដែលនឹងផ្តល់នូវជម្រើសរូបិយប័ណ្ណដ៏ជោគជ័យមួយ ជំនួសឱ្យប្រាក់ដុល្លារអាមេរិក។

លោកបានប្រាប់ RIA Novosti ថា សំណើក្នុងការបង្កើតជម្រើសរូបិយប័ណ្ណនេះកំពុងស្ថិតក្នុងការពិភាក្សា។ នៅក្នុងករណីការដួលរលំនៃប្រាក់ដុល្លារអាមេរិក និងប្រព័ន្ធរូបិយវត្ថុអន្តរជាតិ វានឹងចាំបាច់ក្នុងការប្រែក្លាយរូបិយប័ណ្ណ BRICS ឱ្យទៅជារូបិយប័ណ្ណពិតប្រាកដដោយមានការគាំទ្រដោយផ្លាស់ប្តូរទំនិញ។

រូបិយប័ណ្ណ BRICS ជំនួសប្រាក់ដុល្លារអាមេរិក ប្រសិនបើប្រាក់ដុល្លារដួលរលំ

ប្លុក BRICS បានងាកទៅរកបច្ចេកវិទ្យា blockchain សម្រាប់ប្រព័ន្ធទូទាត់ថ្មីរបស់ខ្លួន។ ជាការពិតណាស់ កិច្ចខិតខំប្រឹងប្រែងរបស់ប្លុកនេះគឺផ្តោតលើការបង្កើតរូបិយប័ណ្ណប្រកួតប្រជែងមួយ ដោយផ្អែកលើបច្ចេកវិទ្យាឌីជីថល។ ប្រាក់ដុល្លារអាមេរិកនៅតែស្ថិតលើផ្លូវមួយឆ្ងាយពីការដួលរលំទាំងស្រុង ទោះបីជាយ៉ាងណាក៏ដោយ រូបិយប័ណ្ណរបស់ សម្ព័ន្ធសេដ្ឋកិច្ច BRICS ជាបញ្ហាមួយសម្រាប់ប្រាក់ដុល្លារអាមេរិក។

ប្រាក់ដុល្លារអាមេរិកនៅតែជាទុនបម្រុងសកល ប៉ុន្តែកំណើនបំណុលអាមេរិក ជាសក្ខីភាពបង្ហាញថា ប្រាក់ដុល្លារអាមេរិក នឹងមិនអាចឋិតថេរជារៀងរហូតនោះទេ។ លើសពីនេះ ការគាំទ្រជុំវិញប្លុក BRICS បានកើនឡើងក្នុងរយៈពេលប៉ុន្មានឆ្នាំចុងក្រោយនេះ ដោយប្រទេសជាច្រើនទៀតទំនងជានឹងទទួលបានការអញ្ជើញឱ្យចូលរួមប្លុកនេះនៅឆ្នាំ ២០២៤។ ដោយមានការគាំទ្រកាន់តែច្រើនទាំងចំនួនប្រទេស និងហិរញ្ញវត្ថុ ប្លុក BRICS អាចបង្កើតរូបិយប័ណ្ណប្រកួតប្រជែងដ៏រឹងមាំដើម្បីប្រយុទ្ធប្រឆាំងនឹងប្រាក់ដុល្លារអាមេរិក។

សូមបញ្ជាក់ផងដែរថា ប្រទេសចិនមានផលិតផលក្នុងស្រុកសរុប (GDP) ធំបំផុតក្នុងប្រទេស BRICS ពោលគឺមាន ១៦.៨៦ ទ្រីលានដុល្លារក្នុងឆ្នាំ ២០២១ ខណៈប្រទេសផ្សេងៗទៀតមាន GDP ក្រោម ៣ ទ្រីលានដុល្លារ។ រួមបញ្ចូលគ្នា ប្លុក BRICS មាន GDP លើសពី ២៥.៨៥ ទ្រីលានដុល្លារអាមេរិកក្នុងឆ្នាំ ២០២២ ច្រើនជាងសហរដ្ឋអាមេរិកបន្តិច៕