សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតមកទល់ថ្ងៃទី៨ ខែសីហា ឆ្នាំ២០២៥ មានគ្រឹះស្ថានហិរញ្ញវត្ថុចំនួន៧៩ស្ថាប័ន បានប្រកាសលុបបំណុលចេញពីគ្រួសារកងទ័ពពលី ដើម្បីរំលឹកនឹកគុណទៅដល់កងទ័ពកម្ពុជា ដែលបានបូជាសាច់ស្រស់ឈាមស្រស់ការពារជាតិមាតុភូមិ។
លោក សុខ ចាន់ នាយកផ្នែកទំនាក់ទំនង និងជាអ្នកនាំពាក្យសមាគមធនាគារកម្ពុជា បានឱ្យដឹងថា ឆ្លើយតបការអំពាវនាវរបស់ប្រមុខរដ្ឋាភិបាល សម្តេចធិបតី ហ៊ុន ម៉ាណែត និងឆ្លើយបតតាមសេចក្តីណែនាំរបស់ធនាគារជាតិនៃកម្ពុជា មកទល់បច្ចុប្បន្នគ្រឹះស្ថានធនាគារចំនួន៣៣ស្ថាប័ន បានប្រកាសលុបបំណុលទាំងស្រុងចេញពីគ្រួសារកងទ័ពពលី។
ចំណែកលោក កាំង តុងងី អ្នកនាំពាក្យសមាគមមីក្រូហិរញ្ញវត្ថុកម្ពុជាបានឱ្យដឹងផងដែរថា រហូតមកទល់ពេលនេះ មានគ្រឹះស្ថានមីក្រូហិរញ្ញវត្ថុចំនួន៣៤ស្ថាប័ន គ្រឹះស្ថានឥណទានជនបទមានចំនួន ១០ និងក្រុមហ៊ុនលីស៊ីងចំនូន០២ ក៏បានប្រកាសលុបបំណុលទាំងស្រុងពីគ្រួសារកងទ័ពពលីផងដែរ ដើម្បីជួយសម្រួលបន្ទុកទៅដល់គ្រួសារកងទ័ពដែលបានពលីនៅសមរភូមិ។
លោក លី ប៊ុនរិទ្ធ នាយកប្រតិបត្តិ គ្រឹះស្ថានមីក្រូហិរញ្ញវត្ថុ ចម្រើន មានប្រសាសន៍ថា មកទល់ថ្ងៃទី០៨ ខែសីហា ឆ្នាំ២០២៥នេះ គ្រឹះស្ថានមីក្រូហិរញ្ញវត្ថុចម្រើនបានលុបបំណុលជូនគ្រួសារកងទ័ពលី ចំនួន១រូប ដែលមានទឹកប្រាក់ជាង ៥លានរៀល។ ចំណែកគ្រឹះស្ថានមីក្រូហិរញ្ញវត្ថុអម្រិតបានលុបបំណុលចោលទាំងស្រុងជូនគ្រួសារកងទ័ពចំនួន ០២រូប ដែលមានទឹកប្រាក់សរុបចំនួន ៥១,៧៨៩ ដុល្លារ(ប្រាំម៉ឺនមួយពាន់ប្រាំពីររយប៉ែតសិបប្រាំបួនដុល្លារ)និងបានឧបត្ថម្ភបន្ថែមមួយគ្រួសារ ៥លានរៀល។
លោក សុខ វឿន ប្រធាននាយកប្រតិបត្តិគ្រឹះស្ថានមីក្រូហិរញ្ញវត្ថុ អិលអូអិលស៊ី(ខេមបូឌា) ភីអិលស៊ី មានប្រសាសន៍ថា ដើម្បីជួយសម្រាលបន្ទុកគ្រួសារកងទ័ព ក៏ដូចជាការដឹងនូវគុណូបការៈដល់កងទ័ពពលីបូជាសាច់ស្រស់ឈាមស្រស់ បូជាជីវិតជូនជាតិមាតុភូមិនោះ គ្រឹះស្ថានអិលអូអិលស៊ីបានលុបបំណុលទាំងស្រុងជូនគ្រួសារកងទ័ពពលីចំនួន ១១រូប ដែលមានទឹកប្រាក់សរុបចំនួនជាង ៧៥០០០ដុល្លារ (ប្រាំពីរម៉ឺនប្រាំពាន់ដុល្លារ) ដែលកងទ័ពពលីទាំងនោះមានទីលំនៅក្នុងខេត្តកំពង់ឆ្នាំង សៀមរាប ឧត្តរមានជ័យ និងព្រះវិហារជាដើម។
គួរបញ្ជាក់ថា នេះជាតួលេខបឋមដែល AMS Economy ទទួលបាន គិតមកត្រឹមថ្ងៃទី០៨ ខែសីហានេះ ខណៈដែលគ្រឹះស្ថានហិរញ្ញវត្ថុខាងលើ និងគ្រឹះស្ថានហិរញ្ញវត្ថុផ្សេងៗទៀត បាន និងកំពុងបន្តនីតិវិធីលុបបំណុលចោលចេញពីគ្រួសារកងទ័ពពលីនេះផងដែរ៕
Account
Security
Favourite Content