សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ខេត្តព្រះសីហនុ ជាខេត្តមួយទៀតដែលបានប្រកាសបញ្ចប់ការវាស់វែងដីធ្លីមានលក្ខណៈជាប្រព័ន្ធ ហើយការងារបន្តគឺការងារបញ្ចូលទិន្នន័យ និងបិទផ្សាយជាសាធារណៈ ដើម្បីត្រៀមចេញបណ្ណជូនប្រជាពលរដ្ឋនៅទូទាំងខេត្ត ដែលគិតត្រឹមពាក់កណ្ដាលឆ្នាំ២០២៥នេះ ក្រុមការងារសុរិយោដី បានបញ្ចូលទិន្នន័យក្បាលដីសរុបជិត ១៥ម៉ឺនក្បាល និងបានបិទផ្សាយជាសាធារណៈប្រមាណ ១៤ម៉ឺន ៨ពាន់ក្បាលដី ។ នេះបើតាមលោក ឡុង ឌីម៉ង់ អភិបាលរងខេត្តព្រះសីហនុ បានបញ្ជាក់កាលពីពេលថ្មីៗនេះ ។
លោក ឡុង ឌីម៉ង់ បានឱ្យដឹងថា ក្រោយបញ្ចប់ការវាស់វែងដីធ្លី មានលក្ខណៈជាប្រព័ន្ធ ខេត្តព្រះសីហនុបានបញ្ចូលទិន្នន័យ និងបិទផ្សាយជាសាធារណៈស្ទើរតែអស់ទៅហើយ ប៉ុន្តែនៅសល់ប្រមាណជាង៤០០ក្បាលដីទៀតនៅមិនទាន់បានបិទ ដោយសារតែក្បាលដីទាំងនោះមានបញ្ហាវិវាទ ដែលត្រូវការដោះស្រាយឱ្យបានចប់សព្វគ្រប់ជាមុនសិន ។
លោកបន្ថែមថា ៖
«ក្រោពីការងារបញ្ចូលទិន្នន័យ និងបិទផ្សាយជាសាធារណៈនៅទូទាំងខេត្តព្រះសីហនុ ក៏បានចេញបណ្ណកម្មសិទ្ធិជូនម្ចាស់អចលនវត្ថុសរុបជាង១២ម៉ឺនក្បាលដីរួចរាល់ហើយដែរ និងបានចែកបណ្ណជូនដល់ដៃប្រជាពលរដ្ឋជាង ៩ម៉ឺន ៣ពាន់បណ្ណ និងកំពុងបន្តចែកជូនពលរដ្ឋជាបន្តបន្ទាប់ទៀត ។ ដោយឡែក សម្រាប់ការផ្ដល់សេវាសាធារណៈលើប្រព័ន្ធអនឡាញរបស់សុរិយោដី បានទទួលសំណើសរុបជាង ១៧០០ចរន្តការ និងបានចូលរួមដោះស្រាយវិវាទដីធ្លីដោយមានការចូលរួមពីក្រសួងរៀបចំដែនដី នគរូបនីយកម្ម បានចំនួន ៤០ករណី ជាមួយរដ្ឋបាលក្រុង-ស្រុកចំនួន១០៨ករណី ព្រមទាំងបានទទួលសំណុំឯកសារវិវាទដីធ្លីពីក្រសួងផង រដ្ឋបាលខេត្តផង និងពីប្រជាពលរដ្ឋផងជាង១០ករណី»។
យោងតាមចក្ខុវិស័យរបស់ក្រសួងរៀបចំដែនដី នគរូបនីយកម្ម និងសំណង់ ដែលជាសេនាធិការរបស់រាជរដ្ឋាភិបាល ការបញ្ចប់ការវាស់វែងដីធ្លី បិទផ្សាយឯកសារជាសាធារណៈ និងចេញបណ្ណកម្មសិទ្ធិជូនពលរដ្ឋនេះ ដើម្បីជាការបញ្ចប់នូវវិវាទដីធ្លីនៅទូទាំងប្រទេស ។ ជាក់ស្ដែង តាមរយៈបេសកកម្មនេះ ករណីវិវាទដីធ្លីនៅទូទាំងប្រទេសបានធ្លាក់ចុះពីរាប់ម៉ឺនករណីមកនៅត្រឹមជាង២ពាន់ករណី និងបន្តដោះស្រាយមកនៅទាបបំផុត ហើយឈានដល់សូន្យករណីតែម្ដងនៅពេលអនាគត ។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ធ្លាប់បានលើកឡើងថា ៖
«រាជរដ្ឋាភិបាលកម្ពុជា ក៏ដូចជាយើងទាំងអស់គ្នា មិនចង់ឃើញទិដ្ឋភាពមួយដែលបើកភ្នែកឡើងមានការឈ្លោះទាស់ទែងគ្នារឿងដីធ្លីនោះទេ គឺយើងចង់ឱ្យពលរដ្ឋរស់នៅប្រកបដោយសុខុដុមរមនា រស់នៅដោយសុខក្សេមក្សាន្តជាមួយគ្នា និងមានជីវភាពកាន់ប្រសើរ» ។
សូមជម្រាបដែរថា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ធ្លាប់បានមានប្រសាសន៍បញ្ជាក់ថា ការបញ្ចប់ការវាស់វែងដីធ្លី បិទផ្សាយ និងចេញបណ្ណកម្មសិទ្ធិ មិនត្រឹមតែអាចកាត់បន្ថយវិវាទដីធ្លីប៉ុណ្ណោះទេ តែវាក៏អាចទាក់ទាញវិនិយោគឱ្យចូលមកវិនិយោគបន្ថែមទៀតផងដែរ ជាក់ស្ដែងខេត្តព្រះសីហនុ កន្លងមកមានវិនិយោគិនមួយចំនួនបានជួបប្រទះនឹងករណីដីធ្លីដែលមិនមានឯកសារច្បាស់លាស់ ប៉ុន្តែនៅពេលបញ្ចប់ការវាស់វែង និងចេញបណ្ណរួចរាល់ វិនិយោគិននឹងមានភាពកក់ក្ដៅលើការវិនិយោគរបស់ខ្លួន ៕
Account
Security
Favourite Content