ភ្នំពេញ ៖ ទុនបម្រុងអន្តរជាតិរបស់កម្ពុជា បន្តរក្សាបាននៅកម្រិតខ្ពស់ដែលឆ្លុះបញ្ចាំងពីភាពរឹងមាំនៃលទ្ធភាពសងបំណុលក្រៅប្រទេស ការរក្សាស្ថិរភាពអត្រាប្តូរប្រាក់ និងប្រព័ន្ធទូទាត់ជាតិ ព្រមទាំងផ្តល់កិច្ចការពារគ្រប់គ្រាន់សម្រាប់បំពេញតម្រូវការសន្ទនីយភាព ទប់ទល់នឹងវិបត្តិខាងក្រៅ។

យោងតាមរបាយការណ៍ធនាគារជាតិនៃកម្ពុជាបានឱ្យដឹងថា ទុនបម្រុងអន្តរជាតិបានកើនដល់ ២២,៥ ប៊ីលាន ដុល្លារអាមេរិកនៅឆ្នាំ២០២៤ ដែលកើន១២,៦% ធៀបនឹងឆ្នាំ២០២៣ មានប្រមាណជា ២០ ប៊ីលានដុល្លារអាមេរិក ស្មើនឹង៧ខែនៃការនាំចូលទំនិញ និងសេវាគ្រាបន្ទាប់ ដែលជាកម្រិតខ្ពស់សម្រាប់ប្រទេសកំពុងអភិវឌ្ឍន៍។

ការកើនឡើងនេះបណ្តាលកត្តាចម្បងមួយចំនួនរួមមាន ៖ ១, ការកើនឡើងតម្លៃមាស, ២.ការប្រែប្រួលអត្រាប្តូរប្រាក់, ៣.ចំណូលពីការវិនិយោគក្រៅប្រទេស (ការកើនឡើងនៃអត្រាចំណូល និងការធ្វើពិពិធកម្មទ្រព្យសកម្ម) និង ៤.ប្រាក់បម្រុងកាតព្វកិច្ច។

រចនាសម្ព័ន្ឋគ្រប់គ្រងទុនបម្រុងអន្តរជាតិត្រូវបានរៀបចំឡើងស្របតាមឧត្តមានុវត្តន៍អន្តរជាតិ ដើម្បីធានាការគ្រប់គ្រងប្រកបដោយប្រសិទ្ធភាព និងប្រុងប្រយ័ត្នខ្ពស់ សំដៅទទួលបានសុវត្ថិភាព សន្ទនីយភាព និងចំណូលសមស្រប។ ក្រុមប្រឹក្សាភិបាលអនុម័តលើគោលនយោបាយវិនិយោគដែលជាក្របខ័ណ្ឌរួមសម្រាប់កំណត់ទិសដៅយុទ្ធសាស្ត្រនៃការគ្រប់គ្រងទុនបម្រុង។ គណៈកម្មការវិនិយោគអនុម័តលើសេចក្តីណែនាំការវិនិយោគ ដែលមានចែងលម្អិតអំពីលក្ខខណ្ឌនៃការវិនិយោគ ដោយផ្អែកលើគោលនយោបាយវិនិយោគ។

របាយការណ៍ធនាគារជាតិនៃកម្ពុជាដដែលបានលើកឡើងដែរថា គណៈកម្មការវិនិយោគតែងជួបប្រជុំជាប្រចាំរៀងរាល់ខែ ដើម្បីពិនិត្យលទ្ធផលនៃការវិនិយោគរបស់នាយកដ្ឋានទទួលបន្ទុក វិភាគលក្ខខណ្ឌទីផ្សារ និងផ្តល់អនុសាសន៍កែសម្រួលចាំបាច់ ដើម្បីធានាថា យុទ្ធសាស្ត្រគ្រប់គ្រងទុនបម្រុងត្រូវបានផ្តោតលើសុវត្ថិភាព សន្ទនីយភាព និងចំណូលសមស្រប។

ជាមួយគ្នានេះដែរ ធនាគារជាតិនៃកម្ពុជាបានបន្តយកចិត្តទុកដាក់លើការបង្កើនការវិនិយោគលើសញ្ញាបណ្ណបៃតង (Green bonds) និងសញ្ញាបណ្ណដែលពាក់ព័ន្ធនឹងបរិស្ថាន សង្គម និងអភិបាលកិច្ច (ESG) ដែលបោះផ្សាយដោយស្ថាប័នហិរញ្ញវត្ថុអន្តរជាតិធំៗ នៅប្រទេសចិន កូរ៉េខាងត្បូង ជប៉ុន និងនៅតំបន់អឺរ៉ុប ក្នុងគោលដៅរួមចំណែកលើកកម្ពស់ការអនុវត្តតាមគោលនយោបាយវិនិយោគប្រកបដោយការទទួលខុសត្រូវលើបរិស្ថានសង្គម និងអភិបាលកិច្ចល្អ ស្របតាមនិន្នាការនៃការវិនិយោគសកល។

ក្រៅពីនេះ ធនាគារជាតិនៃកម្ពុជាក៏កំពុងស្វែងរកនីតិវិធីក្នុងការបង្វែរការវិនិយោគទុនបម្រុងអន្តរជាតិមកគម្រោងបៃតងនៅកម្ពុជា ស្របតាមការលើកឡើងរបស់លោកជំទាវបណ្ឌិត ជា សេរី ទេសាភិបាលធនាគារជាតិនៃកម្ពុជា អំពីដំណោះស្រាយមួយចំនួននៅក្នុងអត្ថបទចេញផ្សាយដោយទស្សនាវដ្ដី The Banker រួមមានការលើកទឹកចិត្តឱ្យស្ថាប័នហិរញ្ញវត្ថុអន្តរជាតិបោះផ្សាយជាសញ្ញាបណ្ណបៃតងសម្រាប់គម្រោងវិនិយោគនៅកម្ពុជា និងការធ្វើ Reserve Swap រវាងធនាគារកណ្តាលក្នុងតំបន់ ដើម្បីគាំទ្រគម្រោងបៃតងក្នុងប្រទេសរៀងៗខ្លួន។ ជារួមស្ថានភាពម៉ាក្រូសេដ្ឋកិច្ចកម្ពុជារក្សាបានស្ថិរភាពល្អ ដែលឆ្លុះបញ្ចាំងតាមរយៈការបន្តងើបឡើងនៃកំណើនសេដ្ឋកិច្ច ជាមួយនឹងកម្រិតទាបនៃអតិផរណា និងស្ថិរភាពអត្រាប្តូរប្រាក់។

លោកបណ្ឌិត ហុង វណ្ណៈ អ្នកជំនាញសេដ្ឋកិច្ចប្រចាំរាជបណ្ឌិត្យសភាកម្ពុជា បាន​ថ្លែង​ថា ទុនបម្រុង​អន្តរជាតិ គឺជា​ប្រាក់​ដែល​រដ្ឋា​ភិ​បាល​ប្រទេស​នីមួយៗ​តម្កល់​ទុក​សម្រាប់​ប្រើប្រាស់​នៅពេល​ប្រទេស​ជួប​វិបត្តិ​អ្វីមួយ ដោយ​រដ្ឋាភិបាល​អាច​ដ​ក​ទុនបម្រុង​អន្តរជាតិ​ទៅ​ចំណាយ​លើ​ការ​ទិញ​ស្បៀងអាហារ ថ្នាំពេទ្យ… ឬ​ប្រេងឥន្ធនៈ​ជាដើម​ ដើម្បី​ធានា​និរន្តរភាព​សង្គម និង​សេដ្ឋកិច្ច​។

លោក​បានបញ្ជាក់ថា ​៖ ទុនបម្រុង​អន្តរជាតិ គឺ​ពិតជា​សំខាន់​ខ្លាំង​សម្រាប់​រដ្ឋាភិបាល​នៃ​ប្រទេស​នីមួយៗ​យកទៅ​ប្រើប្រាស់​ដើម្បី​រក្សា​និរន្តរភាព​សង្គម​នៅពេល​ប្រទេស​ជួប​វិបត្តិ​ណាមួយ​ដូចជា វិបត្តិ​សេដ្ឋកិច្ច គ្រោះធម្មជាតិ កំណើន​អតិផរណា និង​ការផ្ទុះ​ជំងឺ​ផ្សេងៗ​។ ទុនបម្រុង​នេះ​អាចជួយ​រដ្ឋាភិបាល​ឱ្យមាន​ពេល​ដោះស្រាយ​ស្ថានការណ៍​លំបាក​ផ្សេងៗ​បាន​មួយរយៈ​​។

គួរបញ្ជាក់ថា សមតុល្យជញ្ជាំងទូទាត់កម្ពុជាបន្តមានអតិរេក ស្របពេលដែលទុនបម្រុងអន្តរជាតិមានកម្រិតខ្ពស់គ្រប់គ្រាន់៕ វិន ឈុនហ៊ាត