ខាត់ណា ជាបន្លែមួយប្រភេទដែលបងប្អូនខ្មែរនិយមទទួលទាន ជាពិសេសខាត់ណាដើមដែលដើមរបស់វាមានសភាពស្រួយឆ្ងាញ់ និងអាចច្នៃចម្អិនម្ហូបបានច្រើនមុខ និងមានអត្ថប្រយោជន៍ចំពោះសុខភាពអ្នកទទួលទានជាខ្លាំង។ ដោយមើលឃើញពីភាពពេញនិយមក៏ដូចជាតម្រូវការរបស់អ្នកទទួលទានបែបនេះ អ្នកជំនាញកសិកម្មបានចងក្រងបច្ចេកទេសដាំដុះខាត់ណាដើមខុសរដូវ ដែលអាចទទួលបានផលដល់ទៅជាង ៣០តោនក្នុងទំហំដី ១ហិកតា។

តាមការពិសោធ ខាត់ណាដើមអាចផ្ដល់ទិន្នផលជាមធ្យមពី ៣២-៣៦តោនក្នុងមួយហិកតា។ សម្រាប់ពូជខាត់ណាដើមមានច្រើនប្រភេទ អាស្រ័យលើស្ថានភាពដី អាកាសធាតុ នៅក្នុងតំបន់ដែលដាំដុះ ដូចជាពូជដែលមានដើមធំ វែង ស្លឹកតូមតែក្រាសហើយរួញ ដែលអាចធន់នឹងរដូវក្ដៅជាងពូជនានា។ ក្រៅពីនេះក៏មានពូជដែលមានដើមធំខ្លី ស្លឹកញឹកហើយធំ មូលរួញបន្តិច ដែលអាចដាំលូតលាស់ល្អនៅរដូវត្រជាក់ និងពូជមួយប្រភេទទៀតដែលមានដើមតូច ស្លឹកខ្លី ទងស្លឹកតូចៗ ដែលពុំអាចដាំបានល្អទេនៅតំបន់ដែលមានអាកាសធាតុក្ដៅ។

ក្រោយការជ្រើសរើសពូជ កសិករអាចចាប់ផ្ដើមសាបកូនខាត់ណា ដែលត្រូវរៀបចំថ្នាលដោយរកកន្លែងណាដែលមានដីទួល វាលស្រឡះ និងមានជីជាតិល្អ។ ភ្ជួរហាលដីឱ្យបានច្រើនដង ប្រមូលស្មៅចេញឱ្យស្អាត បន្ទាប់មកលើករងដែលមានទទឹង ១ម៉ែត្រ បណ្ដោយ ១០-១៥ម៉ែត្រអាស្រ័យតាមទំហំដីជាក់ស្ដែងរបស់អ្នកដាំ។ យកជីលាមកគោ ឬជីកំប៉ុស ៣-៤បង្គី កំបោសកន្លះគីឡូក្រាម ថ្នាំសម្លាប់សត្វល្អិត ៣០០ក្រាម មកបាចពង្រាយពីលើរង រួចស្រោចទឹកឱ្យជោគទើបគ្របកៅស៊ូពីលើគ្របគែមឱ្យជាប់ និងទុករយៈពេលមួយសប្ដាហ៍។

មុនពេលសាប អ្នកដាំត្រូវយកកៅស៊ូចេញដោយកាយពង្រាយដីឱ្យស្មើ និងយកគ្រាប់ពូជ ៣០ក្រាម ឬ ៣ស្លាបព្រាបាយ ទៅសាបឱ្យស្មើ ហើយយកកម្ទេចចំបើងបាចពីលើស្ដើងៗល្មមមើលឃើញដី រួចស្រោចទឹកឱ្យជោគ ទើបស្រោចថ្នាំការពារផ្សិតតាមក្រោយ។ បន្ទាប់បីសាបហើយ ត្រូវធ្វើដំបូលដោយប្រើឫស្សីធ្វើជាបង្គង រួចយកសំណាញ់ក្រឡាញឹកទៅគ្របពីលើ និងសង្កត់ជើញសំណាញ់ឱ្យជាប់នឹងដី។

ពាក់ព័ន្ធនឹងការថែទាំវិញ កសិករត្រូវស្រោចទឹកកូនខាត់ណាឱ្យបានគ្រប់គ្រាន់ដោយស្រោចរាល់ថ្ងៃ ព្រឹកល្ងាចឱ្យសើមល្មម ដកសម្អាតស្មៅតែមិនត្រូវបើកសំណាញ់នោះទេ។ លុះពេលកូនខាត់ណាមានស្លឹក ៣-៤សន្លឹក ត្រូវដករម្លស់កូនខាត់ណាចេញកុំឱ្យញឹកពេក រួចស្រោចជីបំប៉នឱ្យកូនរុក្ខជាតិឆាប់លូតលាស់ប្រមាណ ២០-២៥ថ្ងៃគឺអាចយកទៅស្ទូងលើដីថ្នាលបានហើយ។

ចំណែកការស្ទូងវិញ គេដត្រូវរៀបចំថ្នាលប្រហាក់ប្រហែលនឹងថ្នាលសាបកូនខាត់ណាដែរ ដែលគេត្រូវភ្ជួរ សម្អាត និងហាលដីទុកជាមុន ទើបលើករងកម្ពស់ ២០-៣០សង់ទីម៉ែត្រ ទទឹង១ ម៉ែត្រ និងបណ្ដោយ ១៥ម៉ែត្រ រួចបាចជីកំប៉ុស្ត ឬជីលាមកសត្វ ៤ទៅ៥បង្គី លាយជាមួយជី១៥-៥-១៥ ចំនួន ៣០០-៣៥០ក្រាម បាចលើរងនិងជ្រុំបង្កប់ទៅក្នុងដី ទើបបាចកំណាត់ចំបើងខ្លីៗពីលើដើម្បីរក្សាសំណើមឱ្យបានល្អ។

មុននឹងដកកូនខាត់ណា ត្រូវស្រោចទឹកលើរងឱ្យជោគរយៈពេលកន្លះម៉ោង ហើយដកយកកូនណាធំៗថ្លោសៗស្មើគ្នាដាក់កញ្ច្រែងនិងស្រោចទឹកឱ្យសើមរក្សាទុកក្នុងម្លប់ត្រៀមសម្រាប់ដាំពេលល្ងាច។ ចំណែកឯថ្នាលដែលត្រូវស្ទូងក៏ត្រូវស្រោចទឹកឱ្យជោគដែរ ទើបយកកូនខាត់ណាដែលដកហើយ ទៅស្ទូងតាមចន្លោះចំបើង ដោយស្ទូងជាជួរ ១៥សង់ទីម៉ែត្រពីគ្នា និងជម្រៅ ២-៣សង់ទីម៉ែត្រ ហើយត្រូវស្រោចទឹកភ្លាមបន្ទាប់ពីដាំហើយ។

សម្រាប់ការថែទាំវិញ ខាត់ណាដើមក៏មិនខុសពីរុក្ខជាតិដទៃទៀតដែរ ដែលវាត្រូវការស្រោចទឹកព្រឹកល្ងាចឱ្យបានគ្រាប់គ្រាន់ ការដកស្មៅ ជ្រុំជ្រោយដី និងការដាក់ជីបំប៉នដើម្បីឱ្យខាត់ណាដើមរបស់យើងលូតលាស់បានល្អ។ ជាមួយគ្នានេះដែរ ខាត់ណាដើមក៏អាចជួបប្រទះនឹងជំងឺក៏ដូចជាកត្តាចង្រៃមួយចំនួនដូចជា ជំងឺអុចរលៀកស្លឹក ជំងឺប្រេះដើមរលួយធាង ជំងឺរលួយ ឬពកឫស ក្រៅពីនេះក៏មានសត្វចង្រៃដូចជា សត្វទាគូមេខ្មៅ ដង្កូវស៊ីរូងស្លឹកឬដើម ដង្កូវស៊ីរូងកំពូលខាត់ណាជាដើម។

ចុងក្រោយគឺការប្រមូលផល ដែលដំណាំនេះអាចប្រមូលផលបានក្រោយពីការស្ទូងបាន​៤០-៤៥ថ្ងៃ ដែលខាត់ណាដើមរីកប៉ោង ធំស្លឹកខាងនៃកំពូលតូចខ្លីៗ ហើយនៅចុងនៃទ្រួយមានចេញផ្កាតូចៗ ដែលគេអាចសម្គាល់បានថា អាចប្រមូលផលបានហើយ។ មុនពេលប្រមូលផល ១០ថ្ងៃ កសិករត្រូវបញ្ឈប់ការស្រោចជី ឬបាញ់ថ្នាំពុលផ្សេងៗចៀសវាងការសល់សំណល់គីមីដែលអាចប៉ះពាល់ដល់សុខភាពអ្នកបរិភោគ។ ចំណែកការប្រមូលផល គេត្រូវកាត់នៅពេលព្រឹក ហើយយកកាំបិតទៅបុតគល់ខាត់ណាក្បែរៗដី រួចរក្សាដើមខាត់ណានៅកន្លែងត្រជាក់ ទើបកាត់សម្អាតដើមខាត់ណា ហើយតំរៀបដើមដាក់ក្នុងឧបករណ៍ដឹងជញ្ជូនជាការស្រេច៕