សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅក្នុងកិច្ចប្រជុំពេញអង្គគណៈរដ្ឋមន្ត្រី កាលពីពេលថ្មីៗនេះ រាជរដ្ឋាភិបាលកម្ពុជាបានពិភាក្សាឆ្លង និងអនុម័តគម្រោងសំណើសុំពិនិត្យសម្រេចលើគម្រោងវិនិយោគលើកិច្ចព្រមព្រៀងវិនិយោគ និងលិខិតធានារបស់រាជរដ្ឋាភិបាលសម្រាប់ការវិនិយោគគម្រោងវិស័យអគ្គិសនីចំនួន២៣គម្រោងសម្រាប់ឆ្នាំ២០២៤ ដល់ឆ្នាំ២០២៩ មានទំហំទឹកប្រាក់សរុបចំនួន ៥.៧៩០លានដុល្លារអាមេរិក ។
បើតាមសេចក្ដីប្រកាសព័ត៌មានស្ដីពីលទ្ធផលកិច្ចប្រជុំពេញអង្គគណៈរដ្ឋមន្ត្រីកាលពីចុងសប្ដាហ៍កន្លងទៅនេះបានឱ្យដឹងថា គម្រោងវិនិយោគវិស័យអគ្គិសនីចំនួន ២៣គម្រោង សម្រាប់ឆ្នាំ២០២៤-២០២៩ ធ្វើឡើងក្នុងគោលបំណងដោះស្រាយបញ្ហាប្រឈមខ្វះប្រភពអគ្គិសនីដោយសារផ្លាស់ប្តូរគោលការណ៍នៃការអភិវឌ្ឍគម្រោងប្រភពអគ្គិសនីដែលបានគ្រោងទុក។
នៅក្នុងសេចក្ដីប្រកាសព័ត៌មានដដែលបានឱ្យដឹងថា គម្រោងអភិវឌ្ឍន៍វិស័យអគ្គិសនីទាំង ២៣គម្រោងនេះ មានគម្រោងថាមពលពន្លឺព្រះអាទិត្យចំនួន ១២គម្រោង គម្រោងថាមពលខ្យល់ចំនួន ៦ គម្រោងជីវម៉ាសផ្គុំជាមួយថាមពលពន្លឺព្រះអាទិត្យចំនួន១គម្រោង គម្រោងផលិតអគ្គិសនីដើរដោយឧស្ម័ន(LNG)ចំនួន១គម្រោង គម្រោងវារីអគ្គិសនីចំនួន១គម្រោង និងគម្រោងស្ថានីយ៍ស្តុកថាមពលចំនួន២គម្រោង ។ គម្រោងទាំង២៣នេះ មានគម្រោងអភិវឌ្ឍន៍ស្ថានីយផលិតអគ្គិសនីចំនួន ២១គម្រោង ដែលមានអានុភាពសរុប ៣ ៩៥០មេហ្គាវ៉ាត់ និងមានគម្រោងអភិវឌ្ឍស្ថានីយស្តុកថាមពលចំនួន ២គម្រោង ដែលមានអានុភាព ២០០០មេហ្គាវ៉ាត់ ។
ដោយឡែក ចំពោះទំហំទឹកប្រាក់លើការវិនិយោគទាំង២៣គម្រោងនេះ មានចំនួន ៥៧៩០លានដុល្លារអាមេរិក ហើយបើតាមការពិនិត្យ និងវិភាគលើលក្ខណៈបច្ចេកទេស សេដ្ឋកិច្ច និងសង្គម ការអភិវឌ្ឍន៍គម្រោងទាំង២៣នេះ មានផលប្រយោជន៍ចំពោះព្រះរាជាណាចក្រកម្ពុជា ក្នុងការបំពេញប្រភពអគ្គិសនីឱ្យបានគ្រប់គ្រាន់ និងទាន់ពេលវេលាតាមកំណើននៃតម្រូវការអគ្គិសនីដែលកើនឡើង ព្រមទាំងផ្ដល់ប្រភពអគ្គិសនីដល់ប្រព័ន្ធបណ្ដាញជាតិ ដើម្បីអាចធ្វើការផ្គត់ផ្គង់អគ្គីសនីមួយផ្នែកដែលអាចទុកចិត្តបាន និងមានតម្លៃសមរម្យដល់អ្នកប្រើប្រាស់គ្រប់ប្រភេទនៅគ្រប់ទីកន្លែងនៃព្រះរាជាណាចក្រកម្ពុជា ។
ជាលទ្ធផលនៃកិច្ចប្រជុំគណៈរដ្ឋមន្ត្រី គម្រោងទាំង២៣នេះ នឹងជួយពង្រឹងសន្តិសុខថាមពលនៃប្រព័ន្ធផ្គត់ផ្គង់អគ្គិសនីរបស់ព្រះរាជាណាចក្រកម្ពុជា តាមរយៈការកាត់បន្ថយការពឹងផ្អែកលើការនាំចូលថាមពល និងបង្កើនការអភិវឌ្ឍប្រភពថាមពលក្នុងស្រុក បង្កើនការអភិវឌ្ឍថាមពលស្អាតដែលរួមមានថាមពលពន្លឺព្រះអាទិត្យ ថាមពលខ្យល់ ថាមពលជីវម៉ាស ថាមពលវារីអគ្គិសនីឱ្យបានជាអតិបរមា ដោយរក្សាភាពអាចទុកចិត្តបាន និងតម្លៃសមរម្យនៃការផ្គត់ផ្គង់អគ្គិសនីឱ្យនៅដដែល ដើម្បីឈានទៅសម្រេចគោលដៅវិស័យថាមពលឆ្នាំ២០៣០ ឱ្យមានប្រភពថាមពលស្អាតយ៉ាងតិច ៧០ភាគរយ នៅក្នុងប្រភពថាមពលក្នុងស្រុកសរុប និងចូលរួមចំណែកក្នុងការសម្រេចឱ្យបាននូវគោលដៅបរិស្ថានរបស់កម្ពុជា និងការប្ដេជ្ញាចិត្តជាសាកលរបស់កម្ពុជា ក្នុងការកាត់បន្ថយការបំភាយឧស្ម័នផ្ទះកញ្ចក់ ។
គម្រោងនេះដែរ នឹងផ្ដល់ការងារជូនប្រជាពលរដ្ឋកម្ពុជារាប់ម៉ឺននាក់ ជាពិសេសដល់ប្រជាពលរដ្ឋដែលរស់នៅក្នុងខេត្តបាត់ដំបង ខេត្តពោធិ៍សាត់ ខេត្តកំពង់ឆ្នាំង ខេត្តរតនគីរី ខេត្តមណ្ឌលគីរី ខេត្តព្រះសីហនុ ខេត្តកំពង់ចាម និងខេត្តព្រៃវែង នៅក្នុងដំណាក់កាលសាងសង់ ដំណើរការ និងថែទាំ នាំមកនូវបច្ចេកវិទ្យាថ្មី ទំនើប រួមជាមួយការបណ្ដុះបណ្ដាលនៅនឹងកន្លែង ជួយបង្កើនសមត្ថភាព ជំនាញរបស់កម្មករនិយោជិតកម្ពុជា តាមរយៈការអនុវត្តផ្ទាល់នៅមូលដ្ឋាន ។ ជាពិសេសនោះ រដ្ឋនឹងទទួលបាចំណូលពន្ធពីគម្រោងវិនិយោគទាំង២៣គម្រោងនេះ ដែលរួមមានពន្ធលើប្រាក់ចំណូល ពន្ធបន្ថែមលើការបែងចែកមុនពន្ធកាត់ទុកលើការប្រាក់និងពន្ធកាត់ទុកលើការបែងចែកភាគលាភ ក្នុងរយៈពេលនៃប្រតិបត្តិការគម្រោងតាមកិច្ចព្រមព្រៀង ។
របាយការណ៍ក្រុមប្រឹក្សាអភិវឌ្ឍន៍កម្ពុជា ក្នុងរយៈពេល៨ខែដើមឆ្នាំ ២០២៤នេះ មានគម្រោងវិនិយោគថាមពលអគ្គិសនីចំនួន២ ត្រូវបានអនុម័តឱ្យវិនិយោគ ក្នុងនោះមានគម្រោងសាងសង់វារីអគ្គិសនីស្ទឹងមេទឹក អានុភាព១៥០មេហ្គាវ៉ាត់ តម្លៃវិនិយោគ៤៤០លានដុល្លារ និងគម្រោងវិនិយោគអភិវឌ្ឍន៍ស្ថានីយអគ្គិសនីដើរដោយថាមពលព្រះអាទិត្យ មានទុនវិនិយោគប្រមាណ ៦៥លានដុល្លារអាមេរិក ៕
Account
Security
Favourite Content