ភ្នំពេញ ៖ បំណុលលើសលប់ សំដៅលើបំណុលក្នុងទំហំច្រើនហួសហេតុដែលបុគ្គលមិនមានលទ្ធភាពក្នុងការសងត្រឡប់ទៅកាន់ស្ថាប័នវិញ។ បំណុលលើសលប់ អាចបង្កផលប៉ះពាល់ច្រើនដល់សេដ្ឋកិច្ចគ្រួសារ សង្គម និងប្រទេសជាតិ​ទាំងមូលតែម្ដង ហេតុនេះហើយ បុគ្គលម្នាក់ៗគួរស្វែងយល់នូវបញ្ហាសំខាន់ៗមួយចំនួន ដែលជា​ដើមចមក្នុងការទាញពួកគេឱ្យធ្លាក់ទៅក្នុងបញ្ហាបំណុលលើសលប់។

លោក កាំង តុងងី អ្នកនាំពាក្យរបស់សមាគមមីក្រូហិរញ្ញវត្ថុកម្ពុជា បានលើកឡើងនូវមូលហេតុធំៗចំនួន ៣ មកពន្យល់ថា ហេតុផលធំទី១គឺ ហេតុការណ៍ដែលមិនបានព្រៀងទុក ដូចជា គ្រោះថ្នាក់ដល់អាយុជីវិត គ្រោះថ្នាក់ការងារ ផលដំណាំធ្លាក់ចុះជាដើម។

លោកបន្តឱ្យដឹងថា៖

«បញ្ហាទាំងនេះអាចការពារដោយការប្រើប្រាស់ធានារ៉ាប់រង ឬក៏ផលិត​ផលគ្រឹះស្ថានមួយចំនួនដែលគេមានកិច្ចការពាររឿងនេះដែរ។ ឧទាហរណ៍ថា គេមានកម្ចីសង្គ្រោះ​បន្ទាន់ជាដើម គ្រឹះស្ថានមួយចំនួនគាត់មានសម្រាប់ជួយនៅពេលដែលអតិថិជនដែលកំពុងប្រើ​ប្រាស់​សេវាគាត់មានតម្រូវការបន្ទាន់ណាមួយ។ ក្រៅពីនោះ បច្ចុប្បន្ន សេវា ប.ស.ស ក៏មានភាពប្រសើរ​ឡើងច្រើនដែរ។ រីឯមូលហេតុទី២នោះគឺទាក់ទងនឹងការធ្លាក់ចុះនៃអាជីវកម្ម ដោយបុគ្គលជាម្ចាស់អាជីវកម្មមិនបានមើលឃើញពីបញ្ហាដែលអាចកើតមានលើដំណើរការប្រកបអាជីវកម្មរបស់ខ្លួន»។

ប៉ុន្តែយ៉ាង​ណាក៏​ដោយ អ្នកនាំពាក្យរូបនេះបានបន្តសង្កត់ធ្ងន់ថា បញ្ហាទី១​ និងទី២នេះ អាចការពារបានប្រសិន​បើប្រជាពលរដ្ឋមានផែនការហិរញ្ញវត្ថុល្អ រៀបចំផែនការ ការពារ ជាពិសេសគួរមានមួយ​ខ្ទង់ត្រៀមទុកនៅពេលមានការចំណាយចាំបាច់បន្ទាន់។ ចំណុចចុងក្រោយគឺទាក់ទងនឹងការចាយវាយរបស់បុគ្គលផ្ទាល់ ដោយពលរដ្ឋមួយចំនួនទម្លាប់​មានសម្ភារៈនិយមជ្រុលហួសហេតុពេក ដោយមិនបានពិនិត្យមើលសុខភាពហិរញ្ញវត្ថុផ្ទាល់ខ្លួន។

លោក កាំង តុងងី បានបន្តថា ៖

«គាត់ចាយ គាត់បង់រំលួស គាត់ទិញសម្ភារៈមួយចំនួនដែលមិនត្រឹមតែមិន​បានជួយបង្កើនចំណូលគ្រួសារទេ តែមានតែបង្កើនចំណាយទៅវិញ…ករណីដែលយើងឃើញ​សាមញ្ញៗ​​ ដូចជា ការបង់រំលោះម៉ូតូ ដែលមានអាត្រាការប្រាក់ថ្លៃៗ ពេលខ្លះគាត់ទិញរថយន្ដថ្លៃ​ហួសហេតុ ដែលហួសពីលទ្ធភាពបង់សងរបស់គាត់ជាដើម»។

បន្ថែមពីលើបញ្ហាដែលបានកើតឡើងនេះ នៅមានមូលហេតុមួយទៀតដែលចូលរួមជំរុញឱ្យពលរដ្ឋកាន់តែជួបប្រទះវិបត្តិហិរញ្ញវត្ថុធ្ងន់ធ្ងរ គឺការងាកទៅប្រើប្រាស់កម្ចីឯកជន ឬកម្ចីអនឡាញ ដែលមិនមាន អាជ្ញាប័ណ្ណស្របច្បាប់ពីធនាគារជាតិនៃកម្ពុជា។ កម្ចីក្រៅផ្លូវការនេះ ថ្វីត្បិតតែលឿន មិនទាមទារឯកសារ និងការវាយតម្លៃច្រើន ប៉ុន្តែអាចបង្កើហានិភ័យខ្ពស់តាមរយៈការប្រាក់ដ៏ច្រើនលើសពីលទ្ធភាពដែលអាចបង់សងបាន។

សម្រាប់លោក ទោះស្ថិតក្នុងកាលៈទេសៈលំបាកយ៉ាងណាក៏ដោយ លោកនៅតែលើកទឹកចិត្តឱ្យចរចាជាមួយស្ថាប័នកម្ចីផ្លូវការ ធ្វើយ៉ាងណាអាចទទួលបានកម្ចីមកប្រើប្រាស់ដោយសុវត្ថិភាព និងមិនប៉ះពាល់ដល់សេដ្ឋកិច្ចបុគ្គល គ្រួសារ ក៏ដូចជាសង្គមជាតិ៕