សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖យោងតាមរបាយការណ៍របស់ការិយាល័យឥណទានកម្ពុជា (CBC) បានឱ្យដឹងថា គិតត្រឹមខែធ្នូ ឆ្នាំ២០២៤ សមតុល្យឥណទានអ្នកប្រើប្រាស់សរុបដែលបានដំណើរការសម្រាប់គោលបំណងអាជីវកម្មខ្នាតតូចក្នុងប្រទេសកម្ពុជាបានកើនឡើងដល់ ៣៥,១៤ ប៊ីលានដុល្លារ នឹងបន្តនិន្នាការកើនឡើង។
របាយការណ៍នេះបញ្ជាក់ថា ចំនួននៃការស្នើសុំឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូច មានការថយចុះ រីឯសមតុល្យឥណទាននៃពាក្យស្នើសុំវិញមានការកើនឡើងផងដែរក្នុងត្រីមាសទី៤ បើប្រៀបធៀបនឹងត្រីមាសមុន។ យ៉ាងណាក៏ដោយ គុណភាពនៃឥណទានបុគ្គលដែលវាស់វែងដោយអនុបាតនៃឥណទានសំណងយឺតលើសពី៣០ថ្ងៃ (30+DPD) មានភាពប្រសើរជាងត្រីមាសមុនដោយមានការធ្លាក់ចុះបន្តិចបន្តួច និងអនុបាតបានកើនឡើងនៅគ្រប់តំបន់។
របាយការណ៍ បានបង្ហាញថា ការដាក់ពាក្យស្នើសុំឥណទានអាជីវកម្មខ្នាតតូចបានធ្លាក់ចុះ ១៣,២ ភាគរយនៅក្នុងត្រីមាសទី៤ ជាមួយនឹងការធ្លាក់ចុះគួរឱ្យកត់សម្គាល់ខ្លាំងនៅក្នុងវិស័យកសិកម្ម (២៤,៨ ភាគរយ)។
នៅចុងត្រីមាសទី៤ ចំនួនសរុបនៃគណនីឥណទានអាជីវកម្មខ្នាតតូចបានថយចុះនៅត្រឹម ១,១ ភាគរយធៀបនឹងត្រីមាសមុន ដែលឈានដល់ ១,៨៣ លាន។ ឥណទានដើមទុនធ្វើការមានចំនួន ៥២,៨ ភាគរយនៃគណនីទាំងនេះ ខណៈដែលឥណទានកសិកម្មមានចំនួន ៣០,៨ ភាគរយ។
របាយការណ៍នេះបានឱ្យដឹងថា សមតុល្យឥណទានសម្រាប់អ្នកប្រើប្រាស់បានបន្តកើនឡើង ដោយកើនឡើង ១,៣% គិតត្រឹមខែធ្នូ ឆ្នាំ២០២៤។ នៅចុងត្រីមាសនេះ មានសមតុល្យឥណទានសម្រាប់អ្នកប្រើប្រាស់ដែលកំពុងដំណើរការសរុបចំនួន ៣៥,១៤ ប៊ីលានដុល្លារ។
លោក អឿ សុធារ័ត្ន ប្រធាននាយកប្រតិបត្តិនៃក្រុមហ៊ុនក្រេឌីត ប្យួរ៉ូ ខេមបូឌា ខូ អិលធីឌីបានមានប្រសាសន៍ថា ៖ ចំនួននៃពាក្យស្នើសុំឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូចមានការថយចុះ ខណៈសមតុល្យនៃពាក្យស្នើសុំឥណទានមានការកើនឡើងនៅក្នុងត្រីមាសទី៤ បើប្រៀបធៀបនឹងត្រីមាសមុន។ ចំនួនគណនីនៃដំណើរការឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូចក៏មានការថយចុះចំនួន -១,១% ប៉ុន្តែសមិទ្ធផលឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូចនៅតែមានភាពវិជ្ជាមាន ជាមួយនឹងចំនួនសមតុល្យ +១,៣% នៅក្នុងត្រីមាសទី៤នេះ ។
លោកបានបន្ថែមទៀតថា ៖ គុណភាពឥណទានមានការធ្លាក់ចុះទាបជាងត្រីមាសមុន ជាមួយនឹងការកើនឡើងនៃអនុបាតនៃគណនីប្រាក់កម្ចីជាមួយនឹងការសងយឺត ៣០ថ្ងៃហួសកាលបរិច្ឆេទកំណត់ត្រឹម +៨,៣% ក្នុងត្រីមាសទី៤ ពោលគឺពី +៩,០% ក្នុងត្រីមាសទី៣ ឆ្នាំ២០២៤។
ដោយឡែក ពាក់ព័ន្ធនឹងឥរិយាបទអតិថិជន ៦៥ ភាគរយនៃអតិថិជនមានគណនីឥណទានជាមួយគ្រឹះស្ថានហិរញ្ញវត្ថុតែមួយគត់ ខណៈគណនីឥណទានមានទំនាក់ទំនងជាមួយគ្រឹះស្ថានជាច្រើនមានប្រមាណ ៣៥ភាគរយ ។ អតិថិជនភាគច្រើន (៤៩,៤ភាគរយ) មានគណនីឥណទានតែ១ ខណៈដែល ៣២,៧ ភាគរយ មានគណនី២ ហើយ ១៣,១ ភាគរយ កាន់គណនី៣ និងមានតែ ៤,៨ ភាគរយប៉ុណ្ណោះដែលមានគណនីឥណទានច្រើនជាង៣ ៕
Account
Security
Favourite Content