សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ វិស័យមីក្រូហិរញ្ញវត្ថុនៅកម្ពុជា បានចាប់ផ្ដើមអភិវឌ្ឍន៍តាំងពីដើមទសវត្សរ៍ឆ្នាំ១៩៩០ និងមានការវិវត្ត រីកចម្រើនយ៉ាងឆាប់រហ័សដែលធ្វើឱ្យវិស័យនេះក្លាយជាចលករមួយយ៉ាងសកម្មក្នុងការកាត់បន្ថយភាពក្រីក្រ និងជួយលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើងតាមរយៈការពង្រីកការផ្ដល់សេវាហិរញ្ញវត្ថុនៅតាមទីជនបទក្នុងអត្រាការប្រាក់សមរម្យ ។
នៅក្នុងសន្និសីទមីក្រូហិរញ្ញវត្ថុ ឆ្នាំ២០២៥ កាលពីចុងសប្ដាហ៍កន្លងទៅនេះ នៅលើទឹកដីខេត្តសៀមរាប លោកជំទាវ ឌិត នីតា ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា (CMA) បានមានប្រសាសន៍ថា ការទទួលកម្ចីពីមីក្រូហិរញ្ញវត្ថុ បានអនុញ្ញាតឱ្យប្រជាជានមានដើមទុនគ្រប់គ្រាន់ក្នុងការប្រកបអាជីវកម្ម ហើយក៏បានផ្ដល់លទ្ធភាពដល់សហគ្រាសធុនតូច និងមធ្យម ក្នុងការពង្រីកសកម្មភាពសេដ្ឋកិច្ចរបស់ខ្លួនផងដែរ ដែលកិច្ចការនេះ បានបង្កើតឱកាសការងារជាច្រើនជូនប្រជាពលរដ្ឋនៅតាមមូលដ្ឋាន និងនៅតំបន់ទីជនបទ ។
លោកជំទាវបន្ត តាមរយៈតួនាទីដ៏សំខាន់នេះ វិស័យមីក្រូហិរញ្ញវត្ថុនៅកម្ពុជា ត្រូវបានចាត់ទុកថា ជាវិស័យចម្បងដែលគាំទ្រដល់ការលើកកម្ពស់បរិយាបន្នហិរញ្ញវត្ថុនៅកម្ពុជា និងចូលរួមចំណែកគាំទ្រដល់គោលដៅអភិវឌ្ឍន៍ប្រកបដោយចីរភាព ។
លោកជំទាវបន្តទៀតថា ៖
«នៅក្នុងស្ថានភាព ដែលភូមិសាស្ត្រនយោបាយមានលក្ខណៈកាន់តែស្មុគស្មាញ ហើយផលប៉ះពាល់ពីស្ថានភាពសង្គ្រាមកាន់តែធ្ងន់ធ្ងរ តម្រូវឱ្យកម្ពុជាខិតខំពង្រឹងសមត្ថភាពរបស់ខ្លួនបន្ថែមទៀត ដើម្បីដោះស្រាយបាននូវការលំបាកនានាចំពោះមុខ ក្នុងគោលដៅធានាចីរភាពនៃកំណើនសេដ្ឋកិច្ច ពង្រីកសក្ដានុពល និងប្រសិទ្ធភាពសេដ្ឋកិច្ចជាអតិបរមា ព្រមទាំងការបង្កើនតម្លៃសេដ្ឋកិច្ចក្នុងវិស័យធនាគារ និងមីក្រូហិរញ្ញវត្ថុ ដែលជាចំណែកមួយនៃការទ្រទ្រង់សមត្ថភាពប្រកួតប្រជែងរបស់កម្ពុជា»។
លោក ឌី រ៉ាដូ អភិបាលរងខេត្តសៀមរាបបានថ្លែងឱ្យដឹងដែរថា បរិយាបន្នហិរញ្ញវត្ថុ គឺជាលទ្ធភាពទទួលបាន និងប្រើប្រាស់សេវាហិរញ្ញវត្ថុផ្លូវការ ទាន់ពេលវេលា សមស្របតាមតម្រូវការ មានតម្លៃសមរម្យ និងមានកិច្ចការពារតាមផ្លូវច្បាប់ ។ ទន្ទឹមនេះ ការលើកកម្ពស់បរិយាបន្នហិរញ្ញវត្ថុ នឹងផ្ដល់ផលប្រយោជន៍ជាច្រើនទាំងផ្នែកច្បាប់ សេដ្ឋកិច្ច ដល់សហគ្រាសធុនតូច និងមធ្យម និងប្រជាពលរដ្ឋដែលពុំមានលទ្ធភាពទទួលបានសេវាហិរញ្ញវត្ថុផ្លូវការ ។
លោកបន្តថា ផលប្រយោជន៍ទាំងនេះ រួមមានការជួយសម្រួលដល់ជីវភាពរស់នៅ ការផ្ដល់លទ្ធភាពដល់ការសន្សំហិរញ្ញវត្ថុ និងការបង្កើតឱកាសធុរកិច្ច ដែលនាំឱ្យប្រជាជនកាន់តែមានលទ្ធភាពច្រើនជាងមុន ក្នុងការទទួលបានសេវាចាំបាច់នានា ដូចជា ការលើកកម្ពស់វិស័យអប់រំ សេវាសុខភាព អនាម័យ និងទឹកស្អាតជាដើម ។ ចំពោះសហគ្រាសធុនតូច និងមធ្យម ផលប្រយោជន៍មានដូចជាការបង្កើនលទ្ធភាពវិនិយោគ ការទទួលបានសេវាប្រឹក្សាជាដើម ។ ដូច្នេះការរៀបចំឱ្យមានយុទ្ធសាស្ត្រជាតិស្ដីពីបរិយាបន្នហិរញ្ញវត្ថុ គឺពិតជាចាំបាច់ ក្នុងការសម្រេចបាននូវផលប្រយោជន៍ទាំងនេះ ៕
Account
Security
Favourite Content