សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ មន្ត្រីជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់ ជាច្រើនរូប និងប្រតិភូនៃគណៈស្ថាបត្យករកម្ពុជា ព្រមទាំងសមាជិកសមាគមស្ថាបត្យករនៅកម្ពុជា សរុបជាង ៨០នាក់ ដឹកនាំដោយ ឯកឧត្តម ទេព ធន រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ បានធ្វើទស្សនកិច្ចអាកាសយានដ្ឋានអន្តរជាតិ តេជោ នាថ្ងៃទី១៧ ខែសីហា ឆ្នាំ២០២៥ ដោយមានបទបង្ហាញពីសំណាក់អ្នកជំនាញផ្នែកស្ថាបត្យកម្ម និងហេដ្ឋារចនាសម្ព័ន្ធនៃអាកាសយានដ្ឋានអន្តរជាតិមួយនេះផងដែរ។
នៅក្នុងដំណើរធ្វើទស្សនកិច្ចរបស់មន្ត្រីជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់, សមាជិកគណៈស្ថាបត្យករកម្ពុជា, សមាជិកសមាគមស្ថាបត្យករខ្មែរ សមាជិកសមាគមអ្នកវិនិយោគ អ្នកសាងសង់ និងស្ថាបត្យករកម្ពុជា រួមទាំងសមាជិកសមាគមអ្នកសាងសង់នៅកម្ពុជា នៅឯអាកាសយានដ្ឋានអន្តរជាតិ តេជោ គ្រប់គ្នាសុទ្ធតែបានបង្ហាញពីក្ដីរីករាយ ស្ញប់ស្ញែងគួរជាទីមោទន ជាមួយនឹងសមិទ្ធផលថ្មីក្រោមស្នាដៃកូនខ្មែរ។
ឯកឧត្តម ទេព ធន រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា ភាពអស្ចារ្យនៃសមិទ្ធផលអាកាសយានដ្ឋានអន្តរជាតិតេជោ បានធ្វើឱ្យអ្នកដែលបានឃើញមានភាពមោទនជាខ្លាំង ខណៈដែលស្ថាបត្យកម្មនៃគម្រោងមួយនេះភាគច្រើនសុទ្ធតែបានបង្ហាញពីរចនាបទបែបខ្មែរ អត្តសញ្ញាណខ្មែរ និងវប្បធម៌ដ៏មានតម្លៃ តាមរយៈស្ថាបត្យកម្មខ្មែរបែបសហសម័យ។
ឯកឧត្តមបានបញ្ជាក់ថា ៖ «ដូចយើងគ្រប់គ្នាបានដឹងហើយថា សម្ដេចតារបស់យើងជាបិតាឯករាជ្យ សម្ដេចតេជោអតីតនាយករដ្ឋមន្ត្រីជាបិតាសន្តិភាព ចំណែកសម្ដេចធិបតីជានាយករដ្ឋមន្ត្រីបច្ចុប្បន្នជាបិតាសហសម័យ។ ជាក់ស្ដែង ទាំងព្រលានយន្ដហោះនៅខេត្តសៀមរាប ទាំងព្រលានយន្ដហោះអន្តរជាតិតេជោនៅក្រុងតាខ្មៅ ក៏ដូចជាពហុកីឡដ្ឋានមរតកតេជោ គម្រោងព្រែកជីកហ្វូណន ស្ពានឆ្លងទន្លេជច្រើន ផ្លូវថ្នល់ និងហេដ្ឋារចនាសម្ព័ន្ធទាំងអស់សុទ្ធតែមានភាពអស្ចារ្យ ដែលបានលើកមុខមាត់កម្ពុជានៅលើឆាកអន្តរជាតិ និងធ្វើឱ្យពិភពលោកទទួលស្គាល់កម្ពុជាស្មើមុខស្មើមាត់»។
ឆ្លៀតក្នុងឱកាសនេះ ឯកឧត្តម ទេព ធន ក៏បានបង្ហាញពីសុទិដ្ឋិនិយមផងដែរជាមួយនឹងសមិទ្ធផលធំៗដែលបាន និងកំពុងលេចចេញជារូបរាងនាពេលបច្ចុប្បន្ន ភាគច្រើនគឺកើតចេញពីស្នាដៃកូនខ្មែរ ទាំងស្ថាបត្យកម្ម អ្នកជំនាញសាងសង់ និងត្រួតពិនិត្យ ក៏ដូចជាកម្លាំងពលកម្មទាំងអស់គឺជាកូនខ្មែរ ដោយមានវត្តមានអ្នកជំនាញបរទេសតិចតួចបំផុត។
សូមបញ្ជាក់ថា អាកាសយានដ្ឋានអន្តរជាតិតេជោ ដែលបានចំណាយថវិកាវិនិយោគប្រមាណ ១ ៥០០លានដុល្លារក្នុងដំណាក់កាលទី១ នៅលើផ្ទៃដីជាង ២ ៦០០ហិកតានេះ នឹងបើកដំណើរការបណ្តោះអាសន្ននៅថ្ងៃទី៩ ខែកញ្ញា ឆ្នាំ២០២៥ ក្នុងនាមជាអាកាសយានដ្ឋានអន្ដរជាតិលំដាប់ 4F អាចទទួលយន្តហោះខ្នាតធំចុះចតបានដូចជាប្រភេទ Airbus A380 និងប្រភេទ Boeing 747 ហើយអាចទទួលអ្នកដំណើរបានរហូតដល់ ១៣លាននាក់ក្នុង១ឆ្នាំ ក្នុងដំណាក់កាលទី១នេះ ក្រោមការសាងសង់ដោយក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) ដែលជាក្រុមហ៊ុនវិនិយោគរួមគ្នារវាងក្រុមហ៊ុន OCIC និងរដ្ឋលេខាធិការអាកាសចរណ៍ស៊ីវិល។
អាកាសយានដ្ឋានអន្តរជាតិតេជោត្រូវបានបែងចែកជាផែនការសាងសង់ជា ៣ដំណាក់កាល គឺដំណាក់កាលទី១ តម្លៃ ១,៥ ពាន់លានដុល្លារ សាងសង់រួចរាល់នៅឆ្នាំ ២០២៥ អាចទទួលអ្នកដំណើរបានប្រមាណ ១៣ លាននាក់ក្នុងមួយឆ្នាំ ដំណាក់កាលទី២ នឹងបញ្ចប់នៅឆ្នាំ ២០៣០ ដែលអាចទទួលបានអ្នកដំណើរប្រមាណជា ៣០ លាននាក់ក្នុងមួយឆ្នាំ និងដំណាក់កាលចុងក្រោយ នឹងបញ្ចប់នៅឆ្នាំ ២០៥០ អាចនឹងទទួលបានអ្នកដំណើររហូតដល់ ៥០ លាននាក់ក្នុងមួយឆ្នាំ៕
Account
Security
Favourite Content