សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កម្មវិធីប្រកួតប្រជែងស្ដីពីការអប់រំចំណេះដឹងហិរញ្ញវត្ថុប្រចាំឆ្នាំ២០២៣ បានរកឃើញបេក្ខជនជ័យលាភីចំនួន៣ក្រុម និងបានរៀបចំពិធីប្រគល់ពានរង្វាន់ជូនបេក្ខជនជ័យលាភីកាលល្ងាចថ្ងៃទី១២ ខែកញ្ញា ឆ្នាំ២០២៣ នៅសណ្ឋាគាររ៉ាហ្វល់ ឡឺរ៉ូយ៉ាល់ ដោយមានការចូលរួមពីឯកឧត្តម ឈៀង វណ្ណមុនីណ្ឌ នាយកប្រតិបត្តិនៃសហគ្រិនខ្មែរ។
នៅក្នុងពិធីប្រកាសជ័យលាភី និងប្រគល់ពានរង្វាន់នោះ លោក ទិត្យ កំរង ស្ថាបនិកក្រុមហ៊ុនឬទ្ធិពល និងអេបកត់លុយ និងជាស្ថាបនិកកម្មវិធីពានរង្វាន់ប្រកួតប្រជែងស្ដីពីការអប់រំចំណេះដឹងហិរញ្ញវត្ថុ បានមានប្រសាសន៍ថា កម្មវិធីពានរង្វាន់ប្រកួតប្រជែងស្ដីពីការអប់រំចំណេះដឹងហិរញ្ញវត្ថុ បានរៀបចំឡើងក្នុងគោលបំណងផ្សព្វផ្សាយអំពីចំណេះដឹងហិរញ្ញវត្ថុឱ្យកាន់តែបានទូលំទូលាយទៅដល់ប្រជាជនខ្មែរ តាមរយៈការប្រកួតប្រជែងគំនិតប្រកបដោយភាពច្នៃប្រឌិត ដែលមានលក្ខណៈជាសិល្បៈ ដើម្បីឱ្យសារអប់រំងាយស្រួលយល់ និងអាចអនុវត្តបានសម្រាប់ប្រជាពលរដ្ឋគ្រប់កម្រិតនៅទូទាំងប្រទេសកម្ពុជា។
លោកបានបន្តថា កម្មវិធីនេះបានចូលរួមចំណែកទៅនឹងយុទ្ធសាស្ត្រជាតិស្ដីពីបរិយាប័ន្នហិរញ្ញវត្ថុឆ្នាំ២០១៩-២០២៥ ក្នុងការលើកកម្ពស់ចំណេះដឹងផ្នែកហិរញ្ញវត្ថុ និងបរិយាប័ន្នហិរញ្ញវត្ថុដល់ប្រជាជនកម្ពុជា និងជាពិសេសយុវជន ដើម្បីជួយឱ្យពួកគេយល់ដឹងពីសិទ្ធិក្នុងការប្រើប្រាស់ជ្រើសរើសចរចាលើសេវាហិរញ្ញវត្ថុរបស់គ្រឹះស្ថានធនាគារ និងហិរញ្ញវត្ថុឱ្យបានកាន់តែប្រសើរឡើង។
លោកបន្ថែមថា ឆ្នាំនេះជាលើកទី៣ នៃកម្មវិធី ដែលត្រូវបានរៀបចំឡើងក្រោមប្រធានបទ ឈ្វេងយល់ពីបច្ចេកវិទ្យាហិរញ្ញវត្ថុ រៀបចំឡើងដោយក្រុមហ៊ុនឬទ្ធិពល និងអេបកត់លុយ ដោយមានការចូលរួមរៀបចំកាន់តែធំជាងមុនពីសំណាក់ ក្រសួងប្រៃសណីយ និងទូរគមនាគមន៍ តាមរយៈមូលនិធិ ស.អ ក្រសួងសេដ្ឋកិច្ច និងហិរញ្ញវត្ថុ តាមរយៈសហគ្រិនខ្មែរ ឧបត្ថម្ភធំដោយ ធនាគារអេស៊ីលីដា និងសហការឧបត្ថម្ភ ដោយសមាគមសហព័ន្ធហិរញ្ញវត្ថុ និងបច្ចេកវិទ្យានៃកម្បុជា និងហ្វេកធើរីភ្នំពេញ។
ឯកឧត្តម ឈៀង វណ្ណមុនិណ្ឌ នាយកប្រតិបត្តិនៃសហគ្រិនខ្មែរ បានមានប្រសាសន៍ថា នៅពេលដែលយើងមានចំណេះដឹងផ្នែកហិរញ្ញវត្ថុ ការប្រកបអាជីវកម្មមិនងាយមានហានិភ័យ ឬមានហានិភ័យទាប ប៉ុន្តែបើសិនជាមិនមានចំណេះដឹងផ្នែកហិរញ្ញវត្ថុទាល់តែសោះ វានឹងងាយមានហានិភ័យ ឬមានហានិភ័យខ្ពស់។ យ៉ាងណាមិញ បើសិនជាមានចំណេះដឹងហិរញ្ញវត្ថុខ្ពស់គ្រប់គ្រាន់ហើយ តែមិនមានអ្នកផ្ដល់សេវាហិរញ្ញវត្ថុ ដូច្នេះការដែលមានចំណេះដឹងនេះ ក៏មិនមានប្រយោជន៍ដែរ ប៉ុន្តែនៅលើពិភពលោកនេះ ប្រទេសណាក៏មានសេវាកម្មផ្នែកហិរញ្ញវត្ថុដែរ។
ឯកឧត្តមបន្តថា បច្ចុប្បន្ននេះ នៅក្នុងវិស័យហិរញ្ញវត្ថក៏បានកែប្រែពីរបៀបបុរាណមកជាការប្រើប្រាស់បច្ចេកវិទ្យា ដូច្នេះហើយការយល់ដឹងពីបច្ចេកវិទ្យាក្នុងវិស័យហិរញ្ញវត្ថុវារឹតតែសំខាន់ទៅទៀតនៅក្នុងសេដ្ឋកិច្ចពិភពលោកនាពេលបច្ចុប្បន្ននេះ។
ឯកឧត្តមក៏បានសាទរដល់ជ័យលាភីក្នុងការប្រកួតប្រជែងពានរង្វាន់ និងបានលើកទឹកចិត្តដល់ក្រុមដែលមិនទទួលបានជ័យលាភី និងខិតខំបន្តទៀតដើម្បីរង់ចាំឱកាសនាពេលក្រោយ៕
Account
Security
Favourite Content