ភ្នំពេញ ៖ ជារៀងរាល់ឆ្នាំឱ្យតែជិតដល់ថ្ងៃទី១៤កុម្ភៈដែលជាថ្ងៃទិវានៃក្ដីស្រឡាញ់ចូលមកដល់(វប្បធម៌បរទេស) មុនមួយថ្ងៃ គេតែងឃើញអាជីវករដែលជាអ្នកលក់ផ្កា ចាប់ផ្តើមរៀបចំទីតាំងលក់ផ្កានៅតាមដងវិថីនានា ជាពិសេសនៅមុខសាលារៀន ឬនៅតំបន់ប្រជុំជនជាដើម ដើម្បីលក់ទៅឱ្យអតិថិជនទិញយកទៅជូនមិត្តភក្រ្ត គូសង្សារ ឬសមាជិកក្រុមគ្រួសារ ដើម្បីបង្ហាញពីសេចក្តីស្រលាញ់។

យុវជន តាន់ ថាវីន ជាអ្នកលក់ផ្កានៅមុខសាកលវិទ្យាល័យភូមិន្ទភ្នំពេញបានឱ្យដឹងថា មុខរបរលក់ផ្កានេះលោកបានធ្វើជាច្រើនឆ្នាំមកហើយដោយមានទីតាំងហាងធំស្ថិតនៅលើផ្លូវ២៧១។ តាំងពីព្រឹកថ្ងៃទី១៣ ខែកុម្ភៈ ២០២៥ន ខ្លួនបានដឹកផ្កាពីហាងធំយកមករៀបចំតាំងលក់នៅមុខសាកលភូមិន្ទភ្នំពេញនេះជាលើកទី១។ ទោះជាមិនធ្លាប់លក់នៅទីតាំងខាងលើនេះក៏ដោយ ក៏ប៉ុន្តែរំពឹងថានឹងលក់ដាច់បានច្រើន ដោយសារមាននិស្សិតកំពុងសិក្សាជាច្រើននាក់នៅទីនេះ ហើយពួកគេនឹងទិញជូនមិត្តភ័ក្រ្ត សង្សារ ឬទិញជូនសាស្រ្តាចារ្យបង្រៀននៅក្នុងសាលានេះតែម្តង ដើម្បីបង្ហាញពីសេចក្តីគោរព និងស្រលាញ់។​

បាច់ផ្កាដែលយុវជនខាងលើដាក់លក់ ហាក់មានតម្លៃថ្លៃលើសពីតម្រូវការរបស់និស្សិតទូទៅ ដោយមានចន្លោះពី ២៥ដុល្លារ​ ទៅដល់ ៥០ដុល្លារ សម្រាប់ផ្កាមួយបាច់។ ប៉ុន្តែយុវជនដែលជាអាជីវករខាងលើ នៅតែរំពឹងថាអាចលក់បានចន្លោះពី ៥០ បាច់ ទៅជាង ១០០បាច់ ឬអាច១០០០ទង(ផ្កាកុលាប) ព្រោះថា មិនមែនតែនិស្សិតនោះទេ មានទាំងបុគ្គលិកក្រុមហ៊ុន ឬមន្រ្តីរាជការផ្សេងទៀត ខណៈដែលនៅត្រឹមព្រឹកថ្ងៃទី១៣កុម្ភៈ ក៏ទទួលបានការកម្ម៉ង់ទុកខ្លះៗរួចទៅហើយ។

អាជីវករម្នាក់ទៀតឈ្មោះ ម៉ៅ សត្យានី ដែលដាក់តាំងផ្កាលក់នៅលើវិថីសហព័ន្ឋរុស្ស៊ី ម្តុំផ្សារទឹកថ្លា និងអាជីវករឈ្មោះ អ៊ន សុខនី លក់ផ្កានៅជាប់របងព្រលានយន្តហោះក្នុងខណ្ឌពោធិសែនជ័យ សុទ្ឋតែបានសម្តែងក្តីសង្ឃឹមដូចៗគ្នាថា ការលក់ផ្កាសម្រាប់ថ្ងៃនៃសេចក្តីស្រលាញ់១៤កុម្ភៈ ឆ្នាំ២០២៥នេះ នឹងមានអតិថិជនគាំទ្រច្រើនដូចឆ្នាំមុន ត្បិតថាឆ្នាំមុនពួកគាត់ ក៏មានចិត្តស្ទាក់ស្ទើរមិនចង់លក់ដែរ ព្រោះថាខ្លាចលក់មិនដាច់ ប៉ុន្តែដោយ​សារទំនេរដាក់លក់លេងៗនៅមុខផ្ទះ ស្រាប់តែលក់ដាច់ច្រើនលើសពីការរំពឹងទុក ដែលភាគច្រើនជាបុគ្គលិកស្ថាប័នរដ្ឋ បុគ្គលិកក្រុមហ៊ុនឯកជន។

អាជិវករទាំងពីរនាក់ខាងលើ សុទ្ឋតែបានអះអាងថា ពួកគេនៅមិនទាន់បានរៀបចំដាក់តំាងផ្ការួចរាល់ផង ក៍មានអតិថិជនទូរសព្ទមកកម្ម៉ង់ជាបណ្តើរៗ ដែលមានសភាពមិនខុសពីឆ្នាំមុននេះនោះទេ ពោលគឺចាប់តាំងពីថ្ងៃ១៣កុម្ភៈពួកគាត់លក់ដាច់ជាបណ្តើរៗ តាំងពីព្រឹកព្រលឹមរហូត ដល់ពេលយប់អាធ្រាត ហើយដល់ថ្ងៃ១៤កុម្ភៈ លក់ដាច់កាន់តែខ្លាំង ដោយមានសមាជិកត្រឹម២នាក់ វេចខ្ចប់ផ្កាជូនអតិថិជនស្ទើរតែមិនទាន់។ ទោះជាយ៉ាងណា សម្រាប់អាជីវករទាំង២រូបខាងលើនេះ មានបាច់ផ្កាដាក់លក់ត្រឹមតម្លៃក្រោម៥០ដុល្លារ។

គួរបញ្ជាក់ថា ជាទូទៅ ផ្កាកូលាបស្រស់០១ទង លក់ក្នុងតម្លៃ០១ដុល្លារ ផ្កាស្រស់មួយបាច់ ឬផ្កាកាច់ពីសាច់ក្រណាត់មូយបាច់មានតម្លៃចន្លោះពី ១ម៉ឺនរៀល ឬ ២ម៉ឺនរៀល ដល់ ៥ម៉ឺនរៀល ទៅតាមទំហុំបាច់ផ្កាតូចធំ ប៉ុន្តែផ្កាខ្លះដោយសារការរចនាតុបតែងបានស្អាតមានតម្លៃរហូតដល់ ៥០ដុល្លារ ឬ ១០០ដុល្លារក៍មាន៕ វិន ឈុនហ៊ាត