សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ គាំទ្រយ៉ាងពេញទំហឹង និងជំរុញឱ្យមានការចុះបញ្ជីការពារកម្មសិទ្ធិបញ្ញានៃផលិតផលកម្ពុជា ជាពិសេស ផលិតផលកសិកម្ម និងចូលរួមអភិវឌ្ឍន៍ កែច្នៃ ដើម្បីបង្កើនតម្លៃផលិតផលកសិកម្មបន្ថែមឱ្យបានខ្ពស់ជាងពេលបច្ចុប្បន្ន។
ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងក្នុងពិធីអបអរសាទរទិវាកម្មសិទ្ធិបញ្ញាពិភពលោកឆ្នាំ២០២៥ នៅក្នុងខេត្តសៀមរាប ក្រោមប្រធានបទ “កម្មសិទ្ធិបញ្ញា និងតូរ្យតន្ត្រី” ថា ចុះបញ្ជីកម្មសិទ្ធិបញ្ញាលើប្រភេទពូជដំណាំកម្ពុជា ផលិតផលកសិកម្មកម្ពុជា មិនត្រឹមតែអាចទទួលបានតម្លៃបន្ថែមខ្ពស់ប៉ុណ្ណោះទេ ប៉ុន្តែថែមទាំងជួយលើកកម្ពស់ការកែច្នៃផលិតផលកសិកម្មផងដែរ។
ឯកឧត្តម ឌិត ទីណា បានគូសបញ្ជាក់ថា ៖
«ក្នុងវិស័យកសិកម្ម កម្មសិទ្ធិបញ្ញា ជាការងារសំខាន់មួយក្នុងចំណោមការងារសំខាន់នានា ដែលក្រសួងយកចិត្តទុកដាក់។ ជាមួយគ្នានេះ ក្នុងនាមក្រសួងកសិកម្ម រុក្ខាប្រមាញ់ និងនេសាទ សូមថ្លែងអំណរគុណដល់ដៃគូអភិវឌ្ឍន៍ទាំងអស់ដែលបានចូលរួមគាំទ្រកសិផលកម្ពុជា ដែលកន្លងមកមានផលិតផលសម្គាល់ភូមិសាស្ត្រ ដូចជា ម្រេចកំពត ស្ករត្នោតកំពង់ស្ពឺ និងក្រូចថ្លុងកោះទ្រង់ជាដើម»។
ឯកឧត្តមរដ្ឋមន្ដ្រីបានមានប្រសាសន៍ថា កម្មសិទ្ធិបញ្ញាមិនអាចកើតឡើងដោយឯកឯងនោះទេ ព្រោះទាមទារការវិនិយោគ និងការស្រាវជ្រាវពិតប្រាកដ ដើម្បីឈានទៅទទួលបានការទទួលស្គាល់ និងការការពារពីការលួចបន្លំ។ ដោយឡែក គោលនយោបាយសម្រាប់វិស័យកសិកម្ម មិនត្រឹមតែផ្តោតលើការធានាសន្តិសុខស្បៀងក្នុងប្រទេសប៉ុណ្ណោះទេ ប៉ុន្តែថែមទាំងលើការស្វែងរកទីផ្សារនាំចេញ សម្រាប់ផលិតផលកសិកម្ម ដែលមានគុណភាពខ្ពស់ផងដែរ។
សូមបញ្ជាក់ថា រដ្ឋមន្ត្រីក្រសួងពាណិជ្ជកម្ម រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅក្នុងទិវាកម្មសិទ្ធិបញ្ញាពិភពលោក ឆ្នាំ២០២៥នេះ ក៏បានជំរុញដល់អ្នកផលិតទាំងអស់ត្រូវប្រញាប់យកផលិតផលរបស់ខ្លួនមកចុះបញ្ជីការពារកម្មសិទ្ធិបញ្ញា ដើម្បីចៀសវៀងការលួចបន្លំ ឬចម្លងយកស្នាដៃនាំឱ្យខាតប្រយោជន៍ផ្ទាល់ខ្លួន ត្បិតការចុះបញ្ជីកម្មសិទ្ធិបញ្ញានៅក្នុងវិស័យកសិកម្ម ដូចជាការចុះបញ្ជីលើផលិតផលសម្គាល់ភូមិសាស្ត្រ សុទ្ធតែបានផ្តល់នូវផលប្រយោជន៍យ៉ាងធំធេងដល់អ្នកផលិត ព្រោះវាបានការពារការក្លែងបន្លំផលិតផល ចំណែកអ្នកទិញ គេបានស្គាល់ពីប្រភពផលិតផលច្បាស់លាស់ ការផលិតមានគុណភាព និងលក់បានតម្លៃខ្ពស់។
Account
Security
Favourite Content