សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ យោងតាមរបាយការណ៍គយ និងរដ្ឋាករកម្ពុជា នៅក្នុងរយៈពេល ៦ខែនេះកម្ពុជាបាននាំចេញទៅវៀតណាម មានទំហំទឹកប្រាក់ប្រមាណជាង ១.៤ពាន់លានដុល្លារ មានការកើនជាង ២១ ភាគរយ ខណៈការនាំចូលពីវៀតណាមមានចំនួនទឹកប្រាក់ ១.៨ ពាន់លានដុល្លារ កើនឡើង ១,៣ ភាគរយ បើធៀបនឹងរយៈពេលដូចគ្នាកាលពីឆ្នាំ២០២២។ ទិន្នន័យនេះធ្វើឱ្យប្រទេសវៀតណាម បានក្លាយជាដៃគូពាណិជ្ជកម្មធំជាងគេរបស់ប្រទេសកម្ពុជាក្នុងចំណោមសមាជិកនៃប្រទេសអាស៊ាន ខណៈដែលពាណិជ្ជកម្មទ្វេភាគីមានប្រហែលជិត ៩០% នៃទំហំពាណិជ្ជកម្មសរុបរវាងកម្ពុជា និងសមាជិកអាស៊ានដទៃទៀតរួមបញ្ចូលគ្នា។
របាយការណ៍បានបង្ហាញថា ក្នុងរយៈពេល ៦ខែ ចាប់ពីខែមករា - មិថុនា ឆ្នាំ២០២៣ ការនាំចេញទំនិញទៅប្រទេសវៀតណាម មានទំហំទឹកប្រាក់ប្រមាណ ១,៤២ពាន់លានដុល្លារ មានការកើនឡើង ២១,៧ភាគរយ ខណៈការនាំចូលពីវៀតណាមនូវទំនិញតម្លៃប្រមាណ ១,៨៧ពាន់លានដុល្លារសហរដ្ឋងាមេរិក កើនឡើង ១.៣ភាគរយ បើធៀបនឹងរយៈពេលដូចគ្នាកាលពីឆ្នាំ២០២២។
សម្រាប់ទំនិញចម្បងគេ ដែលកម្ពុជានាំចេញទៅវៀតណាម គឺផលិតផលកសិកម្ម រួមមាន ស្រូវ កៅស៊ូ ស្វាយចន្ទី ដំឡូងមី ពោត ចេក ស្វាយ និងថ្នាំជក់ ខណៈការនាំចូលសំខាន់ៗពីប្រទេសវៀតណាមមកវិញ រួមមាន ដែកសម្ភារសំណង់ គ្រឿងចក្រ ប្រេងឥន្ធនៈ ឧបករណ៍អគ្គិសនី និងអេឡិចត្រូនិច ជី ចំណីសត្វ គ្រឿងទេស បន្លែ និងផ្លែឈើជាដើម។ ដោយឡែក របាយការណ៍ដដែលបានបង្ហាញថា សម្រាប់ការនាំចេញក្នុងខែ មិថុនា ឆ្នាំ២០២៣ របស់កម្ពុជា ទៅវៀតណាម សម្រេចបានប្រមាណជាង ១០៥លានដុល្លារ កើនឡើង ១០.២ភាគរយ បើធៀបនឹងឆ្នាំ ២០២២ មានចំនួនជាង ៩៥លានដុល្លារ។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងថា កំណើនសេដ្ឋកិច្ច និងការវិនិយោគរបស់កម្ពុជា ទៅថ្ងៃអនាគត នឹងអាចបង្កើនការនាំចេញទំនិញកាន់តែច្រើនទៅកាន់ទីផ្សារអន្តរជាតិ ជាពិសេសនាំចូលមកវិញនូវកំណើនភ្ញៀវទេសចរផងដែរ។
លោកឧកញ៉ា បានបន្តថា
“តាមរយៈកិច្ចព្រមព្រៀងពាណិជ្ជកម្ម ក៏ដូចជាភាពអនុគ្រោះពន្ធ EBA និង GSP ទៅថ្ងៃអនាគត ការនាំចូលទំនិញមកកម្ពុជាកាន់តែមានការថយចុះ ព្រោះយើងបានបង្កើនការផលិត ដោយមានការវិនិយោគទាំងក្នុងស្រុក និងមកពីបរទេស ដើម្បីបង្កើនការនាំចេញ ដែលការនាំចេញរបស់យើងនឹងមានកំណើន។”
សូមបញ្ជាក់ថា កំណើននៃការនាំចេញរបស់ប្រទេសកម្ពុជា ទៅកាន់វៀតណាម ត្រូវបានជំរុញជាចម្បងដោយការនាំចេញកសិផល និងកាន់តែច្រើន ដោយសារការកើនឡើងនៃការប្រមូលផលនៃវិស័យកសិកម្ម។
ក្នុងឆ្នាំ ២០២២ ពាណិជ្ជកម្មទ្វេភាគីកម្ពុជា-វៀតណាម សម្រេចបានទឹកប្រាក់សរុបជាង ៦.១ ពាន់លានដុល្លារ កើនឡើង ១៩,៦ ភាគរយបើធៀបឆ្នាំ ២០២១។ ក្នុងនោះកម្ពុជានាំទំនិញទៅវៀតណាម មានទឹកប្រាក់ជាង ២.១ពាន់លានដុល្លារ កើន ៩,២ ភាគរយ និងទំនិញវៀតណាមនាំមកកម្ពុជាមានចំនួនជាង ៣.៩ពាន់លានដុល្លារ កើនឡើង ២៦,២ ភាគរយ៕
Account
Security
Favourite Content