ភ្នំពេញ៖ តាមរបាយការណ៍របស់អគ្គនាយកដ្ឋានកៅស៊ូ ក្នុងរយៈពេល២ខែ ឆ្នាំ២០២៤ កម្ពុជារកចំណូលបានជាង៨៣លានដុល្លារអាមេរិក ពីការលក់ផលិតផលកៅស៊ូ។

តាមរបាយការណ៍បានបង្ហាញឱ្យដឹងថា ចំណូលពីការនាំចេញជ័រកៅស៊ូ គិតត្រឹមខែកុម្ភៈ ឆ្នាំ២០២៤ មានចំនួន៨៣ ៥៥៥ ៦៩០ដុល្លារ ចំណែកការនាំចេញឈើកៅស៊ូ មានចំនួន២០៩ ៧១៣ដុល្លារ។

គិតត្រឹមខែកុម្ភៈ ឆ្នាំ២០២៤ ជ័រកៅស៊ូមានតម្លៃ ១ ៤៣៤ដុល្លារ ក្នុង១តោន កើនឡើងចំនួន២៥ដុល្លារ ក្នុង១តោន ធៀបនឹងរយៈពេលដូចគ្នានៃឆ្នាំមុន។ ចំណែកតម្លៃ នៃការនាំចេញឈើកៅស៊ូ ជាមធ្យមក្នុងខែកុម្ភៈ ឆ្នាំ២០២៤ មានតម្លៃ១១០ដុល្លារ ក្នុងមួយម៉ែត្រគីប។

សូមជម្រាបថា ផ្ទៃដីកៅស៊ូសរុបមានចំនួន ៤០៧ ១៧២ហិកតា ក្នុងនោះ ផ្ទៃដីចៀរជ័រមានចំនួន ៣២០ ១៨៤ហិកតា ស្មើនឹង៧៩% និងផ្ទៃដីថែទាំមានចំនួន ៨៦ ៩៨៨ហិកតា ស្មើនឹង២១%។

យោង​តាម​ក្រសួង​កសិកម្ម​ ​រុក្ខា​ប្រមាញ់​ ​និង​នេសាទ​ ​នៅ​ឆ្នាំ​២​០​២​១​ ​កម្ពុជា​មានផ្ទៃ​ដី​ដាំ​កៅស៊ូ​ជាង​ ​៤​០​ម៉ឺន​ហិកតា​។​ ​កម្ពុជា​ក៏មាន​រោងចក្រ​កែច្នៃ​កៅស៊ូ​ ​និង​មជ្ឈមណ្ឌល​សិប្បកម្ម​ចំនួន​ ​១​៦​៨​ទីតាំង​ ​ក្នុង​ខេត្ត​ចំនួន​១​១​។​ ​កំពង់ធំ​ ​គឺជា​ខេត្ត​ដែល​ផលិត​កៅស៊ូ​នាំមុខ​គេ​ក្នុង​ប្រទេស​កម្ពុជា​ ​ដែល​មានផ្ទៃ​ដី​ដាំ​សរុប​ចំនួន​ ​១​៥​,​៤​ ​បន្ទាប់មក​ខេត្ត​មណ្ឌល​គិរី​ (​៨​,​៤​ ​ភាគរយ​) ​និង​ស្ទឹង​ត្រែង​ (​៤​,​២​ ​ភាគរយ​) ​។​

​រាជរដ្ឋាភិបាល តាមរយៈអគ្គនាយកដ្ឋាន​គយ ​បានពិភាក្សា​លើ​ពន្ធ​នាំចេញ​ ​ដោយបន្ត​សម្រួល​អត្រាពន្ធ​នាំចេញ​ផលិត​ផល​កៅស៊ូ​ទៅ​ទីផ្សារ​អន្តរជាតិ​ ​ចាប់ពី​ថ្ងៃទី​១ ​ខែមករា​ឆ្នាំ២០២៤ ​តទៅ ដើម្បី​ជាការ​​លើកទឹកចិត្ត​ដល់​ការដាំដុះ និង​ការជួយ​ដល់​អ្នក​ដាំ​ដុះ និង​ក្រុមហ៊ុននាំចេញ​ ដែល​បាន​កំពុង​ប្រឈម​នឹង​ការធ្លាក់​ថ្លៃ​ជ័រកៅស៊ូ​អស់​រយៈពេល​ជាច្រើន​ឆ្នាំ​មកនេះ ​ដោយសារតែ​តម្រូវ​ការ​អន្តរជាតិ​ធ្លាក់ចុះ​។​​ ក្នុងនោះ​វិស័យឯកជន​បានទទួល​នូវ​លទ្ធផល​វិជ្ជមាន​ពី​រដ្ឋាភិបាល​ ដោយការសម្រេច​កាលពី​ពេល​ថ្មីៗ​នេះ បាន​បន្ត​លើកលែង​ពន្ធ​នាំចេញ​កៅស៊ូ​រយៈពេល​ ២​ ឆ្នាំ​បន្តទៀត​។​

ដោយឡែក ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីដើមឆ្នាំ២០២៤ ក្នុងពិធីបិទកិច្ចប្រជុំបូកសរុបលទ្ធផលការងារឆ្នាំ២០២៣ និងលើកទិសដៅឆ្នាំ២០២៤ របស់អគ្គនាយកដ្ឋានកៅស៊ូ បានណែនាំអគ្គនាយកដ្ឋាន ត្រូវជំរុញវិស័យកៅស៊ូឱ្យមានភាពម្ចាស់ការ ពិនិត្យនិងយកចិត្តទុកដាក់បន្ថែមទៀតក្នុងខ្សែច្រវាក់ផលិតកម្ម និងតម្លៃឱ្យបានល្អ តាមរយៈការកៀរគរការវិនិយោគឧស្សាហកម្ម សំដៅធានាទាំងការផ្គត់ផ្គង់ក្នុងស្រុក និងការនាំចេញ ប្រកបដោយគុណភាព និងតម្លៃបន្ថែមខ្ពស់។

ឯកឧត្តម ឌិត ទីណា បានបញ្ជាក់ថា ការផ្សព្វផ្សាយគឺជាកត្តាសំខាន់ក្នុងការជំរុញឱ្យវិស័យកៅស៊ូឱ្យកាន់តែមានភាពសកម្មរស់រវើក។ ដូច្នេះឯកឧត្តមរដ្ឋមន្ដ្រីបានលើកទឹកចិត្តឱ្យបង្កើតការប្រកួតប្រជែងអ្នកចៀរជ័រ ដើម្បីលើកទឹកចិត្ត និងជំរុញឱ្យមានអ្នកជំនាញចៀរជ័រក្នុងស្រុកឱ្យបានកាន់តែច្រើនថែមទៀត។

ក្នុងឆ្នាំ២០២៣កន្លងទៅ កម្ពុជារកចំណូលបាន ពីការលក់ផលិតផលកៅស៊ូ មានប្រមាណចំនួន៥៣៧.៩លានដុល្លារអាមេរិក កើនឡើងប្រមាណចំនួន៦.២លានដុល្លាអាមេរិក ស្មើនឹង១.២% ធៀបឆ្នាំ២០២២។

សូមជម្រាបថា នៅ​ទូទាំង​ពិភពលោក​ ​ប្រទេស​ថៃ​គឺជា​ប្រទេស​ផលិត​កៅស៊ូ​ធម្មជាតិ​ដ៏​ធំបំផុត​កាលពីឆ្នាំមុន​ ​បន្ទាប់មក​គឺ​ប្រទេស​ឥណ្ឌូ​នេ​ស៊ី​ ​វៀតណាម​ ​ចិន​ ​ឥណ្ឌា​ ​ម៉ាឡេស៊ី​ ​និង​កម្ពុជា​។​ ចំណែកប្រទេស​ចិន​បាន​បន្ត​ជា​អ្នកប្រើប្រាស់​កៅស៊ូ​ធម្មជាតិ​ធំ​ជាងគេ​បន្ទាប់មក​មាន​ប្រទេស​ឥណ្ឌា​ ​ថៃ​ ​និង​ម៉ាឡេស៊ី​។​ ​ប្រទេស​ចិន​គឺជា​ប្រទេស​ផលិត​សំបក​កង់​ធំបំផុត​នៅ​លើ​ពិភពលោក​ក ​ដោយទិន្នផល​សំបក​កង់​ប្រចាំ​ឆ្នាំ​របស់​ប្រទេស​ចិន​មាន​ចំនួន​ច្រើនជាង​ពាក់កណ្តាល​នៃ​ចំនួន​សរុប​ទូទាំង​ពិភពលោក​៕