សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
តាកែវ ៖ ដោយមើលឃើញសក្តានុពល និងភាពងាយស្រួលក្នុងការស្វែងរកវត្ថុធាតុដើមដ៏សំបូរបែប កូនខ្មែរមួយរូបបានខិតខំរិះរកគំនិតកែច្នៃរុក្ខជាតិធ្វើជាគ្រឿងសំអាង ហើយដាក់លក់នៅលើទីផ្សារក្នុងស្រុកដោយទទួលបានការគាំទ្រយ៉ាងច្រើនពីសំណាក់អតិថិជន ជាពិសេសជនជាតិខ្មែរ។
អ្នកនាង ខុន សំណាង ប្រធានផ្នែកលក់សិប្បកម្មផលិតគ្រឿងសំអាង ឯកប៊ីយូធី បានឱ្យដឹងថា សិប្បកម្ម ឯកប៊ីយូធី ស្ថិតនៅខេត្តតាកែវ បានចាប់ផ្តើមដំណើរការអស់រយៈពេល៥ឆ្នំាមកហើយ ដោយមានផលិតសាប៊ូកក់សក់ សាប៊ូដុសខ្លួន សាប៊ូលាងមុខ ក្រែមលាបបបូរមាត់ ប្រេងបណ្តុះសក់និងថែរក្សាសក់ ជាពិសេសសាប៊ូសូត្រមាសដែលផលិតចេញពីសំបុកដង្កូវនាង និងទទួលបានការគាំទ្រច្រើននៅលើទីផ្សារ។
ដោយឈរលើគុណភាពល្អមិនចាញ់ផលិតផលនាំចូលពីក្រៅប្រទេស បានធ្វើឱ្យផលិតផលគ្រឿងសំអាងដែលផលិតដោយសិប្បកម្មក្នុងស្រុកមួយនេះទទួលបានការគាំទ្រច្រើនពីអតិថិជនកាន់តែច្រើនឡើងៗ និងបានទទួលស្គាល់ជាផ្លូវការដោយក្រសួងសុខាភិបាលថែមទៀតផង។
ប្រធានផ្នែកលក់ខាងលើបញ្ជាក់ថា ៖ «ក្នុងចំណោមផលិតផលខាងលើ មានផលិតថ្មីមួយកំពុងពេញនិយម គឺផលិតផលថែរក្សាសក់ និងបណ្តុះសក់ មានប្រសិទ្ឋិភាពខ្ពស់ ដែលទើបចរាចរណ៍ថ្មីៗនៅលើទីផ្សារ ពោលគឺត្រឹមតែរយៈពេលមិនដល់មួយឆ្នាំផង មានអតិថិជនប្រមាណជាង២០០០នាក់ បាន និងកំពុងប្រើប្រាស់ ហើយក៏មានអតិថិជនខ្លះទិញយកទៅលក់បន្តនៅក្រៅប្រទេសទៀតផង»។
អ្នកនាងបានបញ្ជាក់ទៀតថា ៖ «ផលិតថែរក្សាសក់ និងបណ្តុះសក់នេះ គឺចម្រាញ់ចេញពីវត្ថុធាតុដើមដែលជារុក្ខជាតិក្នុងស្រុករួមមានដូចជា ប្រេងដូង ប្រេងល្ហុងខ្វង ប្រេងល្ង ម្សៅអង្ករសំរ៉ូប និងផលិតផលប្រេងរុក្ខជាតិមួយចំនួនទៀត ដែលងាយស្រួលរកនៅក្នុងស្រុកយើង។
វាមានភាពងាយស្រួលប្រើ មិនតម្រូវឱ្យប្រើប្រាស់រាល់ថ្ងៃនោះទេ ដោយគេអាចប្រើ ២ថ្ងៃម្តង ឬ ៣ថ្ងៃម្តងក៏បាន ដោយគ្រាន់តែយកប្រេងបណ្តុះសក់នេះទៅអប់សក់ នៅពេលមានតម្រូវការកក់សក់ ហើយអប់ទុករយៈពេល៣០នាទីរួចហើយ ចាំយកសាប៊ូមកកក់សក់សម្អាតចេញ»។
គួរបញ្ជាក់ថា ដោយសារមានការគាំទ្រពីអតិថិជនក្នុងស្រុកកាន់តែច្រើន បានធ្វើឱ្យសិប្បកម្មមួយនេះមានដំណើរការទៅមុខជាលំដាប់ ហើយបានផ្តល់ឱកាសការងារដល់ពលរដ្ឋក្នុងតំបន់មួយចំនួន ជាពិសេសបានទិញវត្ថុធាតុដើមពីកសិករក្នុងស្រុក ដែលជាចលករមួយជួយឱ្យសេដ្ឋកិច្ចគ្រួសារកសិករមានភាពល្អប្រសើរបានមួយកម្រិតផងដែរ៕ វិន ឈុនហ៊ាត
Account
Security
Favourite Content