ភ្នំពេញ៖តំណាងមកពីបណ្តាប្រទេសសមាជិកកិច្ចសហប្រតិបត្តិការឡានឆាង-មេគង្គ រួមមានចិន កម្ពុជា ឡាវ មីយ៉ាន់ម៉ា ថៃ និងវៀតណាម បានប្រកាសដាក់ឱ្យដំណើរការច្រករបៀងនវានុវត្តន៍ ឡានឆាង-មេគង្គ ដោយប្រែក្លាយគំនិតផ្តួចផ្តើមនេះ ពីវេទិកាពិភាក្សា ទៅជាការអនុវត្តជាក់ស្តែង ដើម្បីជំរុញកិច្ចសហការវិទ្យា​សាស្ត្រ និងបច្ចេកវិទ្យា ឆ្លងដែននៅតំបន់អាស៊ីអាគ្នេយ៍។

ការប្រកាសដាក់ឱ្យដំណើរការច្រករបៀងនវានុវត្តន៍នាថ្ងៃទី២ខែធ្នូនេះ  ត្រូវបានធ្វើឡើងនៅក្នុងកិច្ចប្រជុំឧត្តមមន្ត្រីលើកទី២ ដែលរៀបចំឡើងនៅទីក្រុងភ្នំពេញ ដោយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ របស់កម្ពុជា។ ក្នុងកិច្ចប្រជុំនោះ ក្រុមឧត្តមមន្ត្រីនៃប្រទេសសមាជិក បានពិភាក្សាអំពីយុទ្ធសាស្ត្រ ពន្លឿនកិច្ចខិតខំប្រឹងប្រែងរួមផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ ក្នុងគោលបំណងដោះស្រាយបញ្ហាប្រឈមជាសកល និងជំរុញការអភិវឌ្ឍទៅវិញទៅមកក្នុងតំបន់។

ឯកឧត្តមបណ្ឌិត ទ្រី សុផល អគ្គនាយកនៃអគ្គនាយកដ្ឋានវិទ្យាសាស្ត្រ បច្ចេកវិទ្យា និងនវានុវត្តន៍ បានហៅច្រករបៀងនេះថាជា ជំហានទៅមុខដ៏សំខាន់មួយ ក្នុងការលើកកម្ពស់នវានុវត្តន៍សម្រាប់កំណើនប្រកប​ដោយចីរភាព។ ឯកឧត្តមបានជំរុញឱ្យប្រទេសជាសមាជិក តម្រង់ទិសគោលនយោបាយវិទ្យាសាស្ត្រ និងបច្ចេកវិទ្យារបស់ខ្លួន បង្កើនការសម្របសម្រួល និងគាំទ្រគម្រោងស្រាវជ្រាវរួមគ្នា និងការផ្ទេរបច្ចេកវិទ្យា។

ឯកឧត្តមបានលើកឡើងថា ការតម្រង់ទិសគោលនយោបាយប្រកបដោយប្រសិទ្ធភាព នឹងជួយលុបបំបាត់របាំងនានា ធ្វើឱ្យមានសុខដុមនីយកម្មស្តង់ដារ និងជំរុញការស្រាវជ្រាវ ការផ្លាស់ប្តូរបច្ចេកវិទ្យា និងការអភិវឌ្ឍទេពកោសល្យឆ្លងដែន។

លោក Dai Gang នាយកប្រតិបត្តិនៃនាយកដ្ឋានសហប្រតិបត្តិការអន្តរជាតិ នៃក្រសួងវិទ្យាសាស្ត្រ និងបច្ចេកវិទ្យា នៃសាធារណរដ្ឋប្រជាមានិតចិន បានលើកឡើងពីសារៈសំខាន់នៃកិច្ចប្រជុំឧត្តមមន្ត្រីលើកទី២នេះ សម្រាប់តំបន់។ លោកបានបញ្ជាក់ការប្តេជ្ញា ចិត្តរបស់រដ្ឋាភិបាលចិន ក្នុងការធ្វើឱ្យច្រករបៀងនេះក្លាយជាគម្រោងឈានមុខមួយ និងបានលើកឡើងពីអាទិភាពនានា នៅក្នុងផែនការរយៈពេល៥ឆ្នាំ លើទី១៥ របស់ចិននាពេលខាងមុខ រួមទាំងការបង្កើនភាពជាម្ចាស់ កិច្ចសហប្រតិបត្តិការអន្តរជាតិ និងការវិនិយោគដ៏សន្ធឹកសន្ទាប់លើការស្រាវជ្រាវ និងអភិវឌ្ឍន៍ ក្នុងទំហំទឹកប្រាក់ជាង ៤៩៦ ពាន់លានដុល្លារ ក្នុងឆ្នាំ២០២៤។

លោក Dai Gang បានលើកឡើងថា ក្រសួងវិទ្យាសាស្ត្រ និងបច្ចេកវិទ្យា របស់ចិន បានគាំទ្រអ្នកវិទ្យាសាស្ត្រ វ័យក្មេងជាង ១២៩ រូបមកពីប្រទេសឡាវ មីយ៉ានម៉ា និងកម្ពុជា និងបានផ្តល់ការបណ្តុះបណ្តាលដល់ បុគ្គលិកបច្ចេកទេស និងអ្នកគ្រប់គ្រងជាង ៣.៤០០ រូប។

វិស័យអាទិភាពៗដែលបានពិភាក្សារួមមាន ការកាត់បន្ថយភាពក្រីក្រដោយប្រើបច្ចេកវិទ្យា ការស្រាវជ្រាវរួមគ្នាលើ បញ្ញាសិប្បនិម្មិត និងកិច្ចសហការលើវិស័យឱសថបុរាណចិន ដោយចិនសន្យាផ្តល់ការគាំទ្របន្ថែមទៀត។ កិច្ចប្រជុំក៏បានស្នើបង្កើតកម្មវិធីសហប្រតិបត្តិការពិសេស ដើម្បីប្រយុទ្ធប្រឆាំងនឹងភាពក្រីក្រតាមរយៈវិទ្យាសាស្ត្រ និងបច្ចេកវិទ្យា និងបានពិភាក្សាអំពីការបង្កើតលេខាធិការដ្ឋានច្រករបៀងនេះ៕