សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ធនាគារជាតិនៃកម្ពុជា នៅថ្ងៃទី៣ ខែសីហា ឆ្នាំ២០២៦ បានប្រកាសពីការសម្រេចដកហូតអាជ្ញាបណ្ណ និងការដាក់ឱ្យជម្រះបញ្ជីគ្រឹះស្ថានធនាគារចំនួន ៣ ដែលមិនសូវមានប្រតិបត្តិការសកម្មក្នុងសេដ្ឋកិច្ច បន្ទាប់ពីអាជីវកម្មរបស់គ្រឹះស្ថានទាំងនេះទទួលរងផលប៉ះពាល់ជាបន្តបន្ទាប់ពីកត្តាមួយចំនួន។
គ្រឹះស្ថានធនាគារទាំង ៣ រួមមាន ធនាគារ ស៊ីស៊ីយូ ខមមើសល ប៊ែង ម.ក ធនាគារ ហេង ហ្វឹង (ខេមបូឌា) ម.ក និងធនាគារ អេចអេច (ខេមបូឌា) ម.ក។
យោងតាមសេចក្តីជូនដំណឹងរបស់ធនាគារជាតិនៃកម្ពុជា ធនាគារ ស៊ីស៊ីយូ ខមមើសល ប៊ែង ម.ក ត្រូវបានដាក់ឱ្យជម្រះបញ្ជីដោយក្រុមហ៊ុន រីចឆ៍ & ផាតនើរ ខណៈធនាគារ ហេង ហ្វឹង (ខេមបូឌា) ម.ក និងធនាគារ អេចអេច (ខេមបូឌា) ម.ក ត្រូវបានដាក់ឱ្យជម្រះបញ្ជីដោយក្រុមហ៊ុន បេឃើរ ធីលលី (ខេមបូឌា) ឯ.ក។
តួលេខផ្លូវការរបស់ធនាគារជាតិនៃកម្ពុជា បង្ហាញថា ប្រតិបត្តិការរបស់គ្រឹះស្ថានធនាគារទាំង ៣ បូកបញ្ចូលគ្នា មានចំណែកត្រឹមតែ ០.៥ ភាគរយនៃប្រព័ន្ធធនាគារទាំងមូលប៉ុណ្ណោះ។ ក្នុងនោះ ទ្រព្យសកម្មមានចំណែក ០.៥ ភាគរយ ប្រាក់បញ្ញើ ០.៥ ភាគរយ និងឥណទាន ០.៥ ភាគរយ។
ដោយសារចំណែកទីផ្សាររបស់គ្រឹះស្ថានទាំង ៣ មានទំហំតូចធៀបនឹងប្រព័ន្ធធនាគារទាំងមូល អ្នកជំនាញផ្នែកហិរញ្ញវត្ថុលើកឡើងថា ការសម្រេចដាក់ឱ្យជម្រះបញ្ជីនេះ នឹងមិនបង្កផលប៉ះពាល់ធ្ងន់ធ្ងរដល់វិស័យធនាគារ និងហិរញ្ញវត្ថុនៅកម្ពុជានោះទេ។
អក្នជំនាញក្នុងវិស័យហិរញ្ញវត្ថុ បានឱ្យដឹងថា ការដាក់ឱ្យជម្រះបញ្ជីគ្រឹះស្ថានធនាគារ និងហិរញ្ញវត្ថុដែលមិនមានអនុលោមភាព គឺជាប្រក្រតីភាពនៃការអនុវត្តការងាររបស់ធនាគារកណ្តាល ដែលជាអាជ្ញាធរត្រួតពិនិត្យប្រព័ន្ធធនាគារ ក្នុងគោលដៅរក្សាស្ថិរភាព តម្លាភាព និងកេរ្តិ៍ឈ្មោះនៃប្រព័ន្ធធនាគារទាំងមូល។
ធនាគារជាតិនៃកម្ពុជា បានអនុវត្តនីតិវិធីជម្រះបញ្ជីគ្រឹះស្ថានធនាគារ និងហិរញ្ញវត្ថុដែលមិនមានអនុលោមភាពនេះ តាំងពីទសវត្សរ៍ឆ្នាំ១៩៩០ មកម្ល៉េះ ហើយស្ថិរភាពប្រព័ន្ធធនាគារក៏បានលើកកម្ពស់ជាបន្តបន្ទាប់គិតមកទល់ពេលបច្ចុប្បន្ន។
គួររំលេចថា ថ្មីៗនេះ ធនាគារពាណិជ្ជ ២ ផ្សេងទៀត ក៏ត្រូវបានដាក់ឱ្យជម្រះបញ្ជីរួចហើយដែរ គឺ ធនាគារ ព្រីនស៍ និងធនាគារ ផេនដា។
យ៉ាងណាក៏ដោយ បើទោះបីជាបូកបញ្ចូលទំហំប្រតិបត្តិការរបស់គ្រឹះស្ថានទាំង ៣ ដែលទើបដាក់ឱ្យជម្រះបញ្ជី ជាមួយគ្រឹះស្ថានទាំង ២ ខាងលើ ក៏ចំណែកទីផ្សាររបស់គ្រឹះស្ថានទាំង ៥ បូកបញ្ចូលគ្នាមានប្រមាណត្រឹមតែ ១ ភាគរយប៉ុណ្ណោះនៃប្រព័ន្ធធនាគារទាំងមូល។
អ្នកជំនាញបានបញ្ជាក់ថា ចាប់តាំងពីចាប់ផ្តើមធ្វើអាជីវកម្មក្នុងឆ្នាំ២០១៩ ប្រតិបត្តិការរបស់គ្រឹះស្ថានធនាគារទាំង ៣ បានរងផលប៉ះពាល់ជាបន្តបន្ទាប់ និងមិនអាចស្តារឡើងវិញបាន ដោយសារកត្តាមួយចំនួន ដូចជា វិបត្តិជំងឺកូវីដ-១៩ ស្ថានភាពសេដ្ឋកិច្ចមិនអំណោយផល គួបផ្សំនឹងការប៉ះពាល់ដល់កេរ្តិ៍ឈ្មោះ។
ការប៉ះពាល់ដល់កេរ្តិ៍ឈ្មោះនេះ ក៏ពាក់ព័ន្ធនឹងមតិសាធារណៈមួយចំនួនដែលផ្សារភ្ជាប់គ្រឹះស្ថានទាំងនេះទៅនឹងសកម្មភាពមិនស្របច្បាប់មួយចំនួន។
ការដាក់ឱ្យជម្រះបញ្ជីគ្រឹះស្ថានធនាគារទាំង ៣ នេះ ត្រូវបានធ្វើឡើងក្នុងបរិបទដែលធនាគារជាតិនៃកម្ពុជា បន្តអនុវត្តតួនាទីជាអាជ្ញាធរត្រួតពិនិត្យ ដើម្បីរក្សាស្ថិរភាព តម្លាភាព និងកេរ្តិ៍ឈ្មោះនៃប្រព័ន្ធធនាគារកម្ពុជាទាំងមូល។
ស្របពេលជាមួយគ្នានេះ ទិន្នន័យរបស់ធនាគារជាតិនៃកម្ពុជា បង្ហាញថា ប្រព័ន្ធធនាគារកម្ពុជានៅតែមានទំហំ និងស្ថានភាពរឹងមាំ បើទោះបីជាកំពុងប្រឈមនឹងបញ្ហាប្រឈមមួយចំនួនក៏ដោយ។
លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា ថ្លែងក្នុងឱកាសបើកសន្និបាតបូកសរុបលទ្ធផលការងារប្រចាំឆមាសទី១ និងទិសដៅការងារឆមាសទី២ ឆ្នាំ២០២៦ របស់ធនាគារជាតិនៃកម្ពុជាកាលពីថ្មីៗនេះ ថា ចំពោះប្រព័ន្ធធនាគារ ទោះបីជួបប្រទះបញ្ហាប្រឈមមួយចំនួន ជាពិសេសហានិភ័យដែលកើតឡើងពីកត្តាខាងក្រៅក្តី ប្រព័ន្ធធនាគារកម្ពុជានៅតែបន្តមានសុខភាពរឹងមាំ។
លោកជំទាវបណ្ឌិត បានបន្ថែមថា ក៏ប៉ុន្តែដោយសារអភិរក្សនិយម (Conservatism) នៃការអភិវឌ្ឍប្រព័ន្ធធនាគារក្នុងរយៈពេលជិត ៣ ទសវត្សរ៍កន្លងមកនេះ ប្រព័ន្ធធនាគារក៏ត្រូវបានរំពឹងកាន់តែខ្ពស់ពីរដ្ឋាភិបាល វិស័យឯកជន និង សាធារណជនទូទៅ ទៅលើការចូលរួមចំណែករបស់វិស័យធនាគារក្នុងការទប់ទល់នឹងវិបត្តិ។
លោកជំទាវ ជា សិរី បានថ្លែងដូច្នេះថា៖ “ក្នុងស្ថានភាពនេះ ធនាគារជាតិនៃកម្ពុជា និងប្រព័ន្ធធនាគារកម្ពុជា បានសហការអនុវត្តការងារ យ៉ាងសកម្ម ស្របតាមដែនសមត្ថកិច្ចរបស់ខ្លួន ខណៈដែលការរក្សាស្ថិរភាពថ្លៃនិងហិរញ្ញវត្ថុនៅតែជាអាទិភាពចម្បង។”
គិតត្រឹមឆមាសទី១ ឆ្នាំ២០២៦ ប្រព័ន្ធធនាគារនៅកម្ពុជាមានគ្រឹះស្ថានធនាគារ និងហិរញ្ញវត្ថុទទួលប្រាក់បញ្ញើចំនួន ៦១ ក្នុងនោះមានធនាគារពាណិជ្ជ ៥៨ និងគ្រឹះស្ថានមីក្រូហិរញ្ញវត្ថុទទួលប្រាក់បញ្ញើ ៣។
ប្រព័ន្ធធនាគារក៏មានគ្រឹះស្ថានធនាគារ និងហិរញ្ញវត្ថុមិនទទួលប្រាក់បញ្ញើចំនួន ១០៤ ក្នុងនោះមានធនាគារឯកទេស ៧ គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើ ៨៥ និងគ្រឹះស្ថានភតិសន្យាហិរញ្ញវត្ថុ ១២ ព្រមទាំងគ្រឹះស្ថានឥណទានជនបទចំនួន ៨៨។
ទ្រព្យសកម្មរបស់ប្រព័ន្ធធនាគារមានកំណើន ២.៥ ភាគរយ ដល់ ៣៩៩.៣ ទ្រីលានរៀល ឬប្រមាណ ៩៩.៨ ពាន់លានដុល្លារអាមេរិក។ ក្នុងនោះ ឥណទានអតិថិជនកើនឡើង ៤.៦ ភាគរយ ដល់ ២៥៦.៧ ទ្រីលានរៀល ឬ ៦៤.២ ពាន់លានដុល្លារអាមេរិក។
ប្រាក់បញ្ញើអតិថិជនក៏មានកំណើន ៤.៤ ភាគរយ ដល់ ២៥៧.៤ ទ្រីលានរៀល ឬ ៦៤.៤ ពាន់លានដុល្លារអាមេរិក ខណៈដើមទុនមានកំណើន ៣ ភាគរយ ដល់ ៤២ ទ្រីលានរៀល ឬ ១០.៥ ពាន់លានដុល្លារអាមេរិក៕
Account
Security
Favourite Content