សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កិច្ចព្រមព្រៀង DEFA ( Digital Economy Framework Agreement ) ជាកិច្ចព្រមព្រៀងកម្រិតតំបន់អាស៊ានដំបូងគេបង្អស់លើពិភពលោក ដែលផ្ដោតជាពិសេសទៅលើការជួយសម្រួល និងពង្រឹងពាណិជ្ជកម្មតាមប្រព័ន្ធឌីជីថល និងសេដ្ឋកិច្ចឌីជីថលរវាងប្រទេសសមាជិកអាស៊ានទាំង១០ ។ កិច្ចព្រមព្រៀងនេះ គ្រោងនឹងចុះហត្ថលេខានៅអំឡុងខែវិច្ឆិកាខាងមុខនេះក្នុងកិច្ចប្រជុំកំពូលអាស៊ាននៅប្រទេសហ្វីលីពីន ដោយរំពឹងថា វានឹងជំរុញការធ្វើសេដ្ឋកិច្ចអនឡាញកើនឡើងទ្វេដង។
លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្មបានថ្លែងក្នុងពិធីបើកវេទិកាពាណិជ្ជកម្មឌីជីថល កម្ពុជា និងពិព័រណ៍អនឡាញ លើកទី៣ កាលពីចុងសប្ដាហ៍កន្លងទៅនេះថា នៅក្នុងក្របខណ្ឌតំបន់ និងសកល ការធ្វើពាណិជ្ជកម្មឌីជីថល និងការធ្វើពាណិជ្ជកម្មតាមប្រព័ន្ធអេឡិចត្រូនិក កំពុងតែក្លាយជាសមភាគស្នូលនៃការធ្វើពាណិជ្ជកម្មក្នុងសម័យទំនើបនេះ និងបានដាក់បញ្ចូលទៅក្នុងក្របខណ្ឌនៃកិច្ចព្រមព្រៀងពាណិជ្ជកម្មក្នុងតំបន់ជាច្រើន ដូចជា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ កិច្ចព្រមព្រៀងអាស៊ាន ស្ដីពីពាណិជ្ជកម្មតាមប្រព័ន្ធអេឡិចត្រូនិក ការដំឡើងកម្រិតកិច្ចព្រមព្រៀងស្ដីពីការបង្កើតតំបន់ពាណិជ្ជកម្មសេរី អាស៊ាន-អូស្ត្រាលី , អាស៊ាន-ណូវែលហ្សេឡង់ និងកិច្ចព្រមព្រៀងពាណិជ្ជកម្មសេរីអាស៊ាន-ចិន ៣.០ កិច្ចព្រមព្រៀងក្របខណ្ឌសេដ្ឋកិច្ចអាស៊ាន និងកិច្ចព្រមព្រៀងពាណិជ្ជកម្មសេរីអាស៊ាន-កាណាដាជាដើម ។
លោកជំទាវបន្តថា ក្នុងចំណោមកិច្ចព្រមព្រៀងដែលបានរៀបរាប់នេះ មានមួយគឺកិច្ចព្រមព្រៀងសេដ្ឋកិច្ចឌីជីថល ហៅកាត់ថា DEFA ។ កិច្ចព្រមព្រៀងនេះ ត្រូវបានបិទបញ្ចប់ការចរចាដោយជោគជ័យ និងគ្រោងចុះហត្ថលេខានៅថ្ងៃ១២ ខែវិច្ឆិកា ឆ្នាំ២០២៦ខាងមុខ ក្នុងអំឡុងពេលកិច្ចប្រជុំកំពូលអាស៊ានលើកទី៤៩ នាប្រទេសហ្វីលីពីន ។ កិច្ចព្រមព្រៀងនេះដែរ ជាយន្តការយុទ្ធសាស្ត្រដ៏សំខាន់សម្រាប់ធ្វើសមាហរណកម្មពាណិជ្ជកម្មឌីជីថល និងការតភ្ជាប់ឌីជីថលនៅក្នុងតំបន់ ។
លោកជំទាវបន្ថែមថា តាមការព្យាករដែលទទួលបានពីការសិក្សាឱ្យឃើញថា បើសិនជាសមាជិកក្នុងតំបន់អាស៊ាន អនុវត្តន៍បាននូវអ្វីដែលជាផែនការសកម្មភាពសេដ្ឋកិច្ចឌីជីថលនៅក្នុងក្របខណ្ឌដែលបានចរចាលើកិច្ចព្រមព្រៀង DEFAនេះ នឹងធ្វើឱ្យពាណិជ្ជកម្មក្នុងតំបន់អាស៊ានកើនឡើងទ្វេដង ខណៈបច្ចុប្បន្ននេះ ទំហំនៃការធ្វើពាណិជ្ជកម្មតាមអនឡាញនៅអាស៊ាន មានប្រហែលជា ១ទ្រីលានដុល្លារអាម៉េរិក ដូច្នេះ អាចនឹងកើនឡើងដល់ ២ទ្រីលានដុល្លារអាម៉េរិក នៅពេលប្រទេសទាំងអស់អនុវត្តន៍បានទៅតាមក្របខណ្ឌ ។
លោកជំទាវបញ្ជាក់ថា តាមរយៈកិច្ចព្រមព្រៀងនេះដែរ នឹងអាចធ្វើឱ្យកម្ពុជាសម្រេចបាននូវចក្ខុវិស័យរបស់ខ្លួនក្នុងឆ្នាំ២០៣០ ដែលធ្វើឱ្យកម្ពុជាអាចចាកចេញពីប្រទេសអភិវឌ្ឍន៍តិចតួចនៅចុងឆ្នាំ២០២៩ និងឡើងកម្រិតជាប្រទេសមានចំណូលមធ្យមកម្រិតខ្ពស់ ។ លោកជំទាវមានប្រសាសន៍ថា ៖
« នៅពេលកិច្ចព្រមព្រៀង DEFA ចូលជាធរមាន សហគ្រិនរបស់យើងត្រូវត្រៀមខ្លួនឱ្យរួចរាល់ ដោយរាល់ទំនិញរបស់ខ្លួនមិនត្រឹមតែដាក់លក់ក្នុងហាងប៉ុណ្ណោះទេ តែត្រូវមាននៅក្នុងថ្នាលឌីជីថលសម្រាប់ដាក់លក់ជូនអតិថិជនឆ្ងាយៗពីទីតាំងរបស់យើង » ។
គួរបញ្ជាក់ថា កិច្ចព្រមព្រៀង DEFA ត្រូវបានប្រកាសបើកកិច្ចចរចាជាផ្លូវការកាលពីអំឡុងខែកញ្ញា ឆ្នាំ២០២៣ ក្នុងកិច្ចប្រជុំកំពូលអាស៊ានលើកទី៤៣ នាទីក្រុងហ្សាកាតា ប្រទេសឥណ្ឌូនេស៊ី មានគោលដៅ ជួយសម្រួលពាណិជ្ជកម្មឌីជីថល ដោយជំរុញការប្រើប្រាស់វិក្ក័យបត្រឌីជីថល ការទូទាត់ប្រាក់ឆ្លងដែនតាមប្រព័ន្ធឌីជីថល និងការកាត់បន្ថយរាំងស្ទះផ្នែករដ្ឋបាល ។ ក្រៅពីនេះកិច្ចព្រមព្រៀងនេះនឹងជំរុញលំហូរចូលនៃទិន្នន័យឆ្លងដែន ការអភិវឌ្ឍជំនាញ និងធុរកិច្ចថ្មី ផងដែរ៕
Account
Security
Favourite Content