សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
តម្លៃសាច់ជ្រូកនៅលើទីផ្សារក្នុងប្រទេសកម្ពុជា នៅបន្តឡើងថ្លៃខ្ពស់ គិតចាប់តាំងពីខែមេសា មុនរដូវបុណ្យចូលឆ្នាំខ្មែរ រហូតមកទល់ពាក់កណ្តាលខែកក្កដា ឆ្នាំ ២០២៦។ នេះបើតាមការឱ្យដឹងពីអាជីវករលក់សាច់ជ្រូក ក៏ដូចជាកសិករចិញ្ចឹមជ្រូកនៅតាមបណ្តាខេត្តនានា។
លោកស្រី អ៊ាង ដាលីន អាជីវករលក់សាច់ជ្រូកនៅផ្សារជម្ពួវ័ន ក្នុងក្រុងភ្នំពេញ ឱ្យដឹងថា សាច់ជ្រូកនៅបន្តឡើងថ្លៃខ្ពស់នៅឡើយ គិតមកទល់ពេលនេះ ពោលសាច់សុទ្ធមានតម្លៃ ២២,០០០ រៀលក្នុងមួយគីឡូក្រាម និងសាច់ជ្រូកបីជាន់រួមនិងឆ្អឹងជំនីមានតម្លៃដូចគ្នា ២៣,០០០ រៀល ក្នុងមួយគីឡូក្រាម។
លោកស្រី បានឱ្យដឹងទៀតថា ការឡើងថ្លៃសាច់ជ្រូកត្រូវគេដឹងថា មានរយៈពេលជិត ០៤ ខែមកហើយ ចាប់តាំងពី ខែមេសា មុនរដូវកាលបុណ្យចូលឆ្នាំខ្មែរឆ្នាំ ២០២៦ រហូតមកទល់បច្ចុប្បន្ននេះ។
យោងតាមតារាងតម្លៃទីផ្សារ ចេញផ្សាយដោយសាលារាជធានីភ្នំពេញបង្ហាញថា សាច់ជ្រូកនៅលើទីផ្សារនានាមានតម្លៃមធ្យម ២៥០០០ រៀល ក្នុងមួយគីឡូក្រាម។
លោក មុត សុភ័ក្រ ម្ចាស់កសិដ្ឋានចិញ្ចឹមជ្រូកមួយកន្លែងនៅផ្សារកំបៅ ក្នុងឃុំកំបៅ ស្រុកកំចាយមារ ខេត្តព្រៃវែងឱ្យដឹងថា តម្លៃជ្រូករស់ចាប់ផ្តើមឡើងថ្លៃចាប់តាំងខែមេសា ដែលកាលណោះជ្រូករស់មានតម្លៃចន្លោះពី ៨,០០០ រៀលទៅដល់ ៩,០០០ រៀលប៉ុណ្ណោះក្នុងមួយគីឡូក្រាម និងបានឡើងថ្លៃជាបន្តបន្ទាប់មកទល់បច្ចុប្បន្ន ចន្លោះពី ១១,០០០ រៀល ដល់ ១២,០០០រៀលក្នុងមួយគីឡូក្រាម។
លោកបានថ្លែងប្រាប់ថា៖
“កាលណាសាច់ជ្រូកក្នុងស្រុកឡើងថ្លៃ ធ្វើឱ្យកសិករមានភាពញញឹម មានក្តីសង្ឃឹមចិញ្ចឹមបន្តទៀត ដោយសារពួកគាត់ទទួលបានប្រាក់ចំណេញគួរសមពីរបរចិញ្ចឹមជ្រូកនៅក្នុងឆ្នាំនេះ ខុសពីឆ្នាំមុនៗសាច់ជ្រូកធ្លាក់ថ្លៃចុះកសិករត្រូវខាតបង់ ឬចិញ្ចឹមមិនសូវបានផលចំណេញច្រើន។”
លោក សួង វាសនា កសិករចិញ្ចឹមជ្រូកនៅភូមិអូររោង ឃុំជ្រៃបាក់ ក្រុងរលាប្អៀរ ខេត្តកំពង់ឆ្នាំង មានប្រសាសន៍ឱ្យដឹងស្រដៀងនេះដែរថា តម្លៃជ្រូករស់បានចាប់ផ្តើមឡើងថ្លៃជាបន្តបន្ទាប់ចាប់តាំងពី ៦,០០០ទៅ ៧,០០០ រៀល ក្នុងមួយគីឡូក្រាមនៅមុនចូលឆ្នាំ រហូតដល់ ៨,០០០ ទៅ ៩,០០០ រៀលនៅពេលបន្ទាប់ ហើយបន្តឡើងថ្លៃចន្លោះពី ១១,០០០ រៀលទៅ ១២,០០០ រៀល ក្នុងមួយគីឡូក្រាមនាពេលបច្ចុប្បន្ន។
ក្រុមអ្នកចិញ្ចឹមជ្រូកខាងលើ អះអាងដូចៗគ្នាថា កត្តាដែលធ្វើឱ្យជ្រូកក្នុងស្រុកមានការឡើងថ្លៃខ្ពស់ នៅលើទីផ្សារនៅរយៈពេលចុងក្រោយនេះ ដោយសារការលុបបំបាត់នៃការនាំចូលសាច់បង្កកគ្មានច្បាប់ ចូលមកទីផ្សារកម្ពុជាពីសំណាក់អាជ្ញាធរ ក៏ដូចជាកត្តាផ្គត់ផ្គង់ជ្រូកក្នុងស្រុកមានការធ្លាក់ចុះ ដែលបណ្តាលមកពីការផ្ទុះជំងឺប៉េសអាហ្វ្រិកនៅអំឡុងមុនចូលឆ្នាំខ្មែរ ធ្វើឱ្យជ្រូកងាប់ជាច្រើននៅតាមកសិដ្ឋាននានា ជាក្តីនាំឱ្យកសិករមួយចំនួនជួបការខាតបង់ធ្ងន់ធ្ងរនាពេលនោះ។
ដោយឡែកលោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា អះអាងថា ការឡើងថ្លៃសាច់ជ្រូកនៅលើទីផ្សារនាពេលបច្ចុប្បន្ន ដោយសារតម្រូវការសាច់ជ្រូកសម្រាប់ធ្វើម្ហូបអាហាររបស់ពលរដ្ឋ នៅរយៈពេលចុងក្រោយមានការធ្លាក់ចុះជាងពេលមុន ដោយសារការចំណាយមានកម្រិត។
លោកបញ្ជាក់ថា
“ដើម្បីទប់ទល់លើការចំណាយ អាជីវករត្រូវលក់ដំឡើងថ្លៃសាច់ជ្រូកខ្ពស់បន្តិច ដែលបច្ចុប្បន្នដូចយើងដឹងហើយថា តម្រូវការបរិភោគសាច់ជ្រូករបស់ពលរដ្ឋមានការធ្លាក់ចុះ ដោយសារកត្តាជីវភាពនិងកត្តាសេដ្ឋកិច្ចធ្លាក់ចុះ បន្តអូសបន្លាយមកទល់បច្ចុប្បន្ន។”
យោងតាមតួលេខរបស់សមាគមចិញ្ចឹមសត្វកម្ពុជា ឱ្យដឹងថា កម្ពុជាមានតម្រូវការសាច់ជ្រូកចន្លោះពី ៨០០០ក្បាលទៅ ៩០០០ក្បាល ឬស្មើហើយជាង ៤០ តោនទៅដល់ជាង ៥០ តោនក្នុងមួយថ្ងៃ ដើម្បីផ្គត់ផ្គង់ដល់ការបរិភោគប្រចាំថ្ងៃរបស់ពលរដ្ឋខ្មែរនៅទូទាំងប្រទេស៕
Account
Security
Favourite Content