ភ្នំពេញ ៖ គ្រឹះស្ថានឥណទានជនបទ បន្តចូលរួមលើកកម្ពស់ជីវភាពប្រជាជនដែលមានប្រាក់ចំណូលទាប ជាពិសេសនៅតាមទីជនបទ តាមរយៈការផ្តល់សេវាឥណទានខ្នាតតូច ស្របពេលដែលរដ្ឋាភិបាល បាន និងកំពុងជំរុញការងារបរិយាបន្នហិរញ្ញវត្ថុ សំដៅធានាឱ្យប្រជាជនទូទៅមានលទ្ធភាពទទួលបាន និងប្រើប្រាស់សេវាហិរញ្ញវត្ថុផ្លូវការ ទាន់ពេលវេលា សមស្របតាមតម្រូវការ មានតម្លៃសមរម្យ និងមានកិច្ចការពារតាមផ្លូវច្បាប់។

ជាក់ស្តែង គ្រឹះស្ថានឥណទានជនបទមានចំនួន ២២៣ ដោយមានទំហំទ្រព្យសកម្មសរុប ២៣៤ ពាន់លានរៀល (៥៦,៨ លានដុល្លារអាមេរិក)។ ជាមួយគ្នានេះ ឥណទានសរុបមាន ២១១,១ ពាន់លានរៀល (៥១,៣ លានដុល្លារអាមេរិក) ត្រូវបានបែងចែកទៅវិស័យនានា ដូចជាកសិកម្ម ៣២,៥% គ្រួសារ ២៩,១% ពាណិជ្ជកម្ម ២០% សេវាកម្ម ៧,២% សំណង់ ៥,៩% ក្រុមដឹកជញ្ជូន ០,២% និងផ្សេងៗ ៥,១%។ នេះបើយោងតាមរបាយការណ៍ត្រួតពិនិត្យប្រចាំ ២០២២ របស់ធនគារជាតិនៃកម្ពុជា ដែលចេញផ្សាយកាលពីថ្មីៗនេះ

សូមបញ្ជាក់ផងដែរថា គ្រឹះស្ថានឥណទានជនបទ ក៏ស្ថិតក្នុងក្នុងប្រព័ន្ធធនាគារនៅកម្ពុជាផងដែរ ដែលបន្តរក្សាបានភាពធន់ ភាពរឹងមាំ និងជំនឿទុកចិត្តរបស់សាធារណជន ជាតិនិងអន្តរជាតិ។

ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា មានប្រសាសន៍ថា ធនាគារជាតិនៃកម្ពុជាបន្តពង្រឹងស្ថិរភាព ភាពធន់ និងវឌ្ឍនភាពក្នុងប្រព័ន្ធធនាគារ ដោយបានដាក់ចេញនូវវិធានការម៉ាក្រូប្រុងប្រយ័ត្ននានា ដើម្បីកាត់បន្ថយហានិភ័យជាប្រព័ន្ធ និងការប៉ះទង្គិច មកលើសេដ្ឋកិច្ចជាតិ។

ទន្ទឹមនេះ ការត្រួតពិនិត្យគ្រឹះស្ថានធនាគារនិងហិរញ្ញវត្ថុនៅតែជាការងារអាទិភាពមួយ ដែលត្រូវអនុវត្តឱ្យស្របតាមនិយាមថ្មីនៃការត្រួតពិនិត្យផ្អែកលើហានិភ័យ និងទស្សនៈអនាគត។ បច្ចុប្បន្ន ធនាគារជាតិនៃកម្ពុជា កំពុងអនុវត្តផែនទីចង្អុលផ្លូវ ស្តីពីការត្រួតពិនិត្យផ្អែកលើហានិភ័យ និងទស្សនៈអនាគត ដោយបានធ្វើកំណែទម្រង់រចនាសម្ព័ន្ធថ្មីរបស់អគ្គនាយកដ្ឋានត្រួតពិនិត្យ និងដាក់ចេញបទប្បញ្ញត្តិជាបន្តបន្ទាប់ ស្របតាមការអភិវឌ្ឍរបស់ទីផ្សារក្នុង និងក្រៅប្រទេស និងស្ដង់ដារ ត្រួតពិនិត្យអន្តរជាតិ ជាពិសេសស្តង់ដារបាសែល។

ឯកឧត្តម ជា ចាន់តូ បានថ្លែងថា ធនាគារជាតិនៃកម្ពុជា បាន និងកំពុងបន្តអនុវត្តការងារបរិយាបន្នហិរញ្ញវត្ថុការអប់រំផ្នែកហិរញ្ញវត្ថុ និងកិច្ចការពារអតិថិជន ដែលដើរតួនាទីយ៉ាងសំខាន់ក្នុងការរួមចំណែកកាត់បន្ថយភាពក្រីក្រ និងជំរុញ កំណើនសេដ្ឋកិច្ចជាតិ តាមរយៈការអនុវត្តផែនការសកម្មភាពនៃយុទ្ធសាស្ត្រជាតិ ស្ដីពីបរិយាបន្នហិរញ្ញវត្ថុ ឆ្នាំ២០១៩-២០២៥ និងគំនិតផ្តួចផ្តើមផ្សេងៗ។ ការជំរុញការងារបរិយាបន្នហិរញ្ញវត្ថុ សំដៅធានាឱ្យប្រជាជនទូទៅមានលទ្ធភាពទទួលបាននិងប្រើប្រាស់សេវាហិរញ្ញវត្ថុផ្លូវការ ទាន់ពេលវេលា សមស្របតាមតម្រូវការ មានតម្លៃសមរម្យ និងមានកិច្ចការពារតាមផ្លូវច្បាប់។

សូមបញ្ញាក់ផងដែរថា បរិយាបន្នហិរញ្ញវត្ថុ នៅតែដើរតួនាទីយ៉ាងសំខាន់ក្នុងការផ្តល់សេវាហិរញ្ញវត្ថុផ្លូវការដល់ប្រជាជន និងអាជីវកម្ម ព្រមទាំងបានរួមចំណែកកាត់បន្ថយភាពក្រីក្រ និងជំរុញកំណើនសេដ្ឋកិច្ចរបស់ប្រទេស។ ធនាគារជាតិនៃកម្ពុជា បានផ្តួចផ្តើមបន្ថែមនូវសកម្មភាពនិងយុទ្ធនាការនានា និងអនុវត្តការលើកកម្ពស់ចំណេះដឹងផ្នែកហិរញ្ញវត្ថុ ក៏ដូចជាកិច្ចការពារអតិថិជន ព្រមទាំងបានសហការយ៉ាងជិតស្និទ្ធជាមួយ ស្ថាប័នជាតិ និងអន្តរជាតិពាក់ព័ន្ធ ដើម្បីលើកកម្ពស់កម្រិតបរិយាបន្នហិរញ្ញវត្ថុនៅកម្ពុជា ស្របតាមផែនការសកម្មភាពនៃយុទ្ធសាស្ត្រជាតិ ស្តីពីបរិយាបន្នហិរញ្ញវត្ថុ ឆ្នាំ២០១៩-២០២៥។

ទន្ទឹមនឹងនេះ ប្រព័ន្ធធនាគារនៅកម្ពុជាបន្តរក្សាបានភាពធន់ ភាពរឹងមាំ និងជំនឿទុកចិត្តរបស់សាធារណជន ជាតិនិងអន្តរជាតិ តាមរយៈកិច្ចខិតខំប្រឹងប្រែងរបស់ធនាគារជាតិនៃកម្ពុជា ក្នុងការចូលរួមចំណែកជាមួយរាជរដ្ឋាភិបាល ដើម្បីដាក់ចេញនូវវិធានការចាំបាច់ជាបន្តបន្ទាប់ ធានាទប់ស្កាត់និងកាត់បន្ថយឱ្យបានជា អតិបរមានូវផលប៉ះពាល់នានា។  ប្រព័ន្ធធនាគារនៅកម្ពុជា រួមមាន ធនាគារពាណិជ្ជ ៥៨ ធនាគារ ឯកទេស ៩ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ ៥ គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើ ៨២ គ្រឹះស្ថានភតិសន្យាហិរញ្ញវត្ថុ ១៦ គ្រឹះស្ថានឥណទានជនបទ ២២៣ អ្នកដំណើរការតតិយភាគី ៦ គ្រឹះស្ថានផ្តល់សេវាទូទាត់សងប្រាក់ ៣៥ ក្រុមហ៊ុនចែករំលែកព័ត៌មានឥណទាន ១ ការិយាល័យ តំណាងធនាគារបរទេស ៦ និងអាជីវកម្មប្តូរប្រាក់ ២ ៨៦៦៕