សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្វាងស៊ី ប្រទេសចិន ៖ រាជរដ្ឋាភិបាលកម្ពុជា តាមរយៈក្រសួងកសិកម្ម រុក្ខាប្រមាញ់ និងនេសាទ ជាសេនាធិការ បានបន្តពង្រឹងកិច្ចសហប្រតិបត្តិការកសិកម្មជាមួយស្ថាប័នជំនាញរបស់ចិន ក្នុងងគោលបំណងលើកកម្ពស់វិស័យ និងឈានទៅកាត់បន្ថយភាពក្រីក្រឱ្យបានកាន់តែប្រសើរ។
ឯកឧត្តម ហុង ណារិត អនុរដ្ឋលេខាធិការ តំណាងក្រសួងកសិកម្ម រុក្ខាប្រមាញ់ និងនេសាទ នៃព្រះរាជាណាចក្រកម្ពុជា នៅថ្ងៃទី១៧ ខែកញ្ញា ឆ្នាំ២០២៦ បានអញ្ជើញដឹកនាំគណៈប្រតិភូកម្ពុជា ចូលរួមសន្និសីទចិន(ក្វាងស៊ី)-អាស៊ាន ស្តីពីកិច្ចសហប្រតិបត្តិការកសិកម្ម និងការកាត់បន្ថយភាពក្រីក្រ ឆ្នាំ២០២៦ ដែលបានប្រព្រឹត្តទៅនៅទីក្រុងណាននីង តំបន់ស្វយ័តក្វាងស៊ី នៃសាធារណរដ្ឋប្រជាមានិតចិន។
នាឱកាសនោះ ឯកឧត្តម បានលើកឡើងថា វិស័យកសិកម្មនៅតែជាវិស័យដ៏សំខាន់សម្រាប់សេដ្ឋកិច្ចជនបទ និងជាផ្នែកសំខាន់ក្នុងការចូលរួមកាត់បន្ថយភាពក្រីក្រ។ កម្ពុជាបានវាយតម្លៃខ្ពស់ចំពោះកិច្ចសហប្រតិបត្តិការអាស៊ាន-ចិន និងផែនការសកម្មភាពអាស៊ាន-ចិន ឆ្នាំ២០២៦-២០៣០ ដែលបានរួមចំណែកក្នុងការកសាងបណ្តាញកសិកម្មប្រកបដោយសមាហរណកម្ម និងពង្រឹងភាពធន់របស់កសិករខ្នាតតូច តាមរយៈការលើកកម្ពស់កសិកម្មបៃតង ពាណិជ្ជកម្មបៃតង និងក្របខ័ណ្ឌអនាម័យ និងភូតគាមអនាម័យ (SPS)។
សម្រាប់កិច្ចសហប្រតិបត្តិការទ្វេភាគី កម្ពុជា-ចិន កំពុងមានការរីកចម្រើនយ៉ាងសកម្ម ក្រោមភាពជាដៃគូយុទ្ធសាស្ត្រគ្រប់ជ្រុងជ្រោយ និងក្របខ័ណ្ឌ «កិច្ចសហប្រតិបត្តិការត្បូងពេជ្រ»។ ជាពិសេស គម្រោង «ច្រករបៀងមច្ឆា និងអង្ករ» ត្រូវបានជំរុញតាមរយៈផែនការកិច្ចសហប្រតិបត្តិការដែលគ្របដណ្តប់លើការផលិតដំណាំ ការចិញ្ចឹមសត្វ ជលផល ការលើកកម្ពស់ជីវភាព ពាណិជ្ជកម្ម និងការវិនិយោគក្នុងវិស័យកសិកម្ម។
ជាមួយគ្នានេះ គម្រោងសហប្រតិបត្តិការឧស្សាហកម្មអង្ករទំនើបកម្ពុជា-ចិន នៅខេត្តកំពង់ឆ្នាំង ត្រូវបានលើកឡើងជាឧទាហរណ៍ជាក់ស្តែងនៃកិច្ចសហប្រតិបត្តិការដែលបានចូលរួមលើកកម្ពស់ខ្សែច្រវាក់តម្លៃកសិ-អាហារ។ តាមរយៈការផ្ទេរបច្ចេកវិទ្យា ការធ្វើទំនើបកម្មកសិកម្ម និងការវិនិយោគពីភាគីចិន កម្ពុជាកំពុងបង្កើនតម្លៃបន្ថែមនៃផលិតផលកសិកម្ម និងពង្រីកឱកាសទីផ្សារសម្រាប់កសិករ។
មុនពេលបញ្ចប់ ឯកឧត្តមបានផ្តល់ជាអនុសាសន៍ដល់ភាគីចិនចំនួន ៣ ចំណុច រួមានទី១.ពន្លឿនការធ្វើសមាហរណកម្មបច្ចេកវិទ្យាកសិកម្ម (ការដាំដុះច្បាស់លាស់ និងប្រព័ន្ធឌីជីថល) ទី២.ពង្រឹងភាពធន់នឹងការប្រែប្រួលអាកាសធាតុ តាមរយៈកសិកម្មបៃតង និងហេដ្ឋារចនាសម្ព័ន្ធស្តុកទុក និងទី៣ធ្វើសុខដុមនីយកម្មហេដ្ឋារចនាសម្ព័ន្ធពាណិជ្ជកម្ម កាត់បន្ថយឧបសគ្គ និងពង្រឹងបណ្តាញដឹកជញ្ជូនឆ្លងកាត់ព្រំដែន៕
Account
Security
Favourite Content