សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ កម្ពុជាបាននាំចេញអង្ករចំនួន ១៧៧,៧០០ តោនទៅកាន់ប្រទេសចិន ក្នុងរយៈពេល ៨ ខែដំបូងនៃឆ្នាំ២០២៦ កើនឡើង ៥២.៧ ភាគរយ បើធៀបនឹងរយៈពេលដូចគ្នាកាលពីឆ្នាំ២០២៥ និងរកចំណូលបានប្រមាណ ១០៥ លានដុល្លារ។
តាមទិន្នន័យរបស់សហព័ន្ធស្រូវអង្ករកម្ពុជា (CRF) ប្រទេសចិននៅតែជាទីផ្សារនាំចេញអង្ករសំខាន់បំផុតរបស់កម្ពុជា ខណៈកំណើននេះត្រូវបានចាត់ទុកថា ជាសញ្ញានៃការពង្រឹងកិច្ចសហប្រតិបត្តិការកាន់តែស៊ីជម្រៅរវាងកម្ពុជា និងចិន ក្នុងវិស័យកសិកម្ម និងពាណិជ្ជកម្ម។
ឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតចិនប្រចាំកម្ពុជា បានឱ្យដឹងថា តាមទិន្នន័យរបស់ CRF ក្នុងរយៈពេល ៨ ខែដំបូងនៃឆ្នាំ២០២៦ កម្ពុជាបាននាំចេញអង្ករចំនួន ១៧៧,៧០០ តោនទៅកាន់ប្រទេសចិន កើនឡើង ៥២.៧ ភាគរយ បើធៀបនឹងរយៈពេលដូចគ្នាកាលពីឆ្នាំ២០២៥ ដោយមានទំហំទឹកប្រាក់ប្រមាណ ១០៥ លានដុល្លារ។
ឯកឧត្តមបានថ្លែងថា៖ «ប្រទេសចិននៅតែជាទីផ្សារនាំចេញអង្ករសំខាន់របស់កម្ពុជា ដែលនេះបានបង្ហាញយ៉ាងពេញលេញអំពីកិច្ចសហប្រតិបត្តិការវិស័យកសិកម្មនិងពាណិជ្ជកម្មរវាងចិននិងកម្ពុជាត្រូវបានជំរុញកាន់តែស៊ីជម្រៅ»។
ឧកញ៉ា ឡាយ ឈុនហួរ ប្រធានសហព័ន្ធស្រូវអង្ករកម្ពុជា បានគូសបញ្ជាក់ថា រាជរដ្ឋាភិបាលបានកំណត់គោលដៅនាំចេញអង្ករកិនរួចចំនួន ១ លានតោនក្នុងមួយឆ្នាំ។
លោកបានបន្តថា គោលដៅនេះអាចសម្រេចបាន ឬលើសការរំពឹងទុកនៅឆ្នាំនេះ ប្រសិនបើមានកិច្ចសហការកាន់តែរឹងមាំរវាងស្ថាប័នពាក់ព័ន្ធ និងសហព័ន្ធស្រូវអង្ករកម្ពុជា។ ដោយសារលទ្ធផលល្អតាំងពីដើមឆ្នាំ លោករំពឹងថា កម្ពុជានឹងអាចសម្រេចបានតាមគោលដៅដែលបានកំណត់។
សម្រាប់ទីផ្សារចិន អង្ករក្រអូបប្រណិតគឺជាប្រភេទអង្ករឈានមុខគេ និងមានតម្រូវការខ្ពស់ពីអ្នកប្រើប្រាស់ចិន។ ក្នុងនោះមានអង្ករផ្ការំដួល ដែលធ្លាប់ឈ្នះពានរង្វាន់អង្ករល្អបំផុតនៅលើពិភពលោក និងអង្ករសែនក្រអូប (SKO) ដែលទើបឈ្នះពានរង្វាន់មាសផ្នែករសជាតិឆ្ងាញ់នៅក្នុងប្រទេសចិន។
ក្រៅពីអង្ករក្រអូប អង្ករសគ្រាប់វែងក៏ជាប្រភេទអង្ករដែលមានការនាំចេញក្នុងបរិមាណច្រើន ដោយមានតម្លៃសមរម្យ ខណៈអង្ករសរីរាង្គ ដែលផលិតដោយមិនប្រើប្រាស់សារធាតុគីមី ក៏ទទួលបានការចាប់អារម្មណ៍ពីអ្នកប្រើប្រាស់ចិនដែលយកចិត្តទុកដាក់លើសុខភាព។
ការកើនឡើងនៃការនាំចេញទៅចិន រួមជាមួយនឹងការស្ទុះងើបឡើងវិញនៃទីផ្សារចិន និងការកើនឡើងនៃតម្រូវការនៅសហភាពអឺរ៉ុប ត្រូវបានរំពឹងថា នឹងជួយកម្ពុជាខិតកាន់តែជិតគោលដៅនាំចេញអង្ករ ១ លានតោនក្នុងមួយឆ្នាំ ខណៈស្ថាប័នហិរញ្ញវត្ថុរដ្ឋបានត្រៀមទុន ដើម្បីគាំទ្រ និងពង្រឹងខ្សែច្រវាក់ផ្គត់ផ្គង់។
យោងតាមរបាយការណ៍របស់ CRF ក្នុងរយៈពេល ៨ ខែដំបូងនៃឆ្នាំ២០២៦ កម្ពុជាបាននាំចេញអង្ករសរុបចំនួន ៧៩២,២១២ តោន កើនឡើង ៦៧.៥ ភាគរយ ពី ៤៧២,៨០៣ តោនក្នុងរយៈពេលដូចគ្នានៃឆ្នាំ២០២៥៕
Account
Security
Favourite Content