សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ជើងហោះហើរក្នុងស្រុកចំនួនពីរ និងជើងហោះហើរអន្តរជាតិ១ បានចុះចតនៅអាកាសយានដ្ឋានអន្តរជាតិសៀមរាប-អង្គរ កាលពីថ្ងៃទី៥ ខែតុលា ឆ្នាំ២០២៣ នៅក្នុងការធ្វើតេស្តសាកល្បងលើប្រតិបត្តិការហោះហើរ។
រដ្ឋលេខាធិការដ្ឋានអាកាសចរណ៍ស៊ីវិល នៅថ្ងៃទី៥ ខែតុលា ឆ្នាំ២០២៣នេះ បានរៀបចំការធ្វើតេស្តសាកល្បងលើប្រតិបត្តិការអាកាសយានដ្ឋានអន្តរជាតិសៀមរាប-អង្គរ ក្រោមវត្តមានលោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល។ ការធ្វើតេស្តសាកល្បងលើប្រតិបត្តិការនេះគឺផ្តោតសំខាន់លើការទទួលជើងហោះហើរក្នុងស្រុកចំនួន២ គឺ÷ ១. ក្រុមហ៊ុនអាកាសចរណ៍ Sky Angkor Airlines ហោះចេញពីរាជធានីភ្នំពេញ មកកាន់ខេត្តសៀមរាប និង ២. ក្រុមហ៊ុនអាកាសចរណ៍ Cambodia Airways ហោះចេញពីរាជធានីភ្នំពេញ ទៅកាន់ខេត្តព្រះសីហនុ និងមកកាន់ខេត្តសៀមរាប។
ចំណែកជើងហោះហើរអន្តរជាតិ ដែលហោះសាកល្បងដែរនោះ គឺក្រុមហ៊ុនអាកាសចរណ៍ China Eastern ហោះចេញពីទីក្រុងគុនមីង ប្រទេសចិន មកកាន់ខេត្តសៀមរាប។
បើតាមលោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល អាកាសយានដ្ឋានអន្តរជាតិសៀមរាប-អង្គរ នឹងសម្ពោធជាផ្លូវការនៅថ្ងៃទី០១ ខែធ្នូ ឆ្នាំ២០២៣ខាងមុខនេះ។ បច្ចុប្បន្ននេះ អាកាសយានដ្ឋានអន្តរជាតិសៀមរាប-អង្គរ បានរៀបចំរួចរាល់នូវហេដ្ឋារចនាសម្ព័ន្ធទាំងខាងក្នុង និងខាងក្រៅ ហើយនៅពេលដល់វេលានឹងផ្ដើមតែម្ដងដោយមិនមានការយឺតយ៉ាវ ឬត្រូវលើកពេលនោះទេ។
គួរឱ្យដឹងថា អាកាសយានដ្ឋានអន្តរជាតិសៀមរាប ត្រូវបានសាងសង់លើផ្ទៃដីប្រមាណ៧០០ហិកតា ស្ថិតក្នុងភូមិក្រៀលពង ឃុំពពេល និងភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាប ជាមួយនឹងទុនវិនិយោគប្រមាណជាង១ពាន់លានដុល្លារអាមេរិក ។
អាកាសយានដ្ឋាននេះអាចមានសមត្ថភាពទទួលអ្នកដំណើរប្រមាណ ៧លាននាក់ក្នុងមួយឆ្នាំនៅក្នុងដំណាក់កាលទី១ ហើយនៅក្នុងដំណាក់កាលទី២ អាចទទួលអ្នកដំណើរដល់ ១០លាននាក់ក្នុងមួយឆ្នាំ និងដំណាក់កាលទី៣ អាចទទួលអ្នកដំណើរបានរហូតដល់ ២០លាននាក់នៅក្នុងមួយឆ្នាំ៕ ដោយ ៖ ញ៉ែម សុផល
Account
Security
Favourite Content