បរទេស៖ សង្គ្រាមនៅមជ្ឈិមបូព៌ា និងការបិទច្រកសមុទ្រ Hormuz បានគំរាមកំហែងដល់សន្តិសុខថាមពល និងសេដ្ឋកិច្ចរបស់ថៃយ៉ាងខ្លាំង ដោយសារតម្លៃប្រេង និងជីគីមីនាំចូលឡើងថ្លៃ ខណៈអ្នកជំនាញបានជំរុញឱ្យរដ្ឋាភិបាលបោះបង់ចោលនូវវិធានការបណ្តោះអាសន្ន ហើយពន្លឿនការរៀបចំយុទ្ធសាស្ត្រកែទម្រង់រចនាសម្ព័ន្ធសេដ្ឋកិច្ចរយៈពេលវែង និងការផ្លាស់ប្តូរទៅរកថាមពលបៃតងជាបន្ទាន់។

យោងតាម East Asia Forum បានបង្ហាញថា ប្រទេសថៃ បានពឹងផ្អែកខ្លាំងលើការនាំចូលពីមជ្ឈិមបូព៌ា ដោយក្នុងនោះរួមមានការនាំចូលប្រេងឆៅ ៦០%, ប្រេងធុនស្រាល ៩០%, ជីអ៊ុយរ៉េ ៧០% និងហ្គាសធម្មជាតិ ២៨%។ ជាលទ្ធផល តម្លៃប្រេងលក់រាយឡើងថ្លៃ ៣៤% និងតម្លៃជីអ៊ុយរ៉េឡើងថ្លៃពី ៥០ ភាគរយទៅ ៧៥ ភាគរយក្នុងចន្លោះខែមករា-ឧសភា។

គោលនយោបាយបណ្តោះអាសន្នរបស់ទីក្រុងបាងកក បានរងការរិះគន់ដូចជា ការកាត់បន្ថយប្រាក់ឧបត្ថម្ភធនសម្រាប់ប្រេងភ្លាមៗ ដែលផ្តល់ផលប្រយោជន៍ដល់រោងចក្រចម្រាញ់ប្រេង និងក្រុមបក្ខពួករបស់រដ្ឋាភិបាល ខណៈជំនួយសម្រាប់អ្នកងាយរងគ្រោះមានភាពយឺតយ៉ាវ។ លើសពីនេះ កម្មវិធីជួយជ្រោមជ្រែងផ្នែកថវិកា ហាក់ខ្វះប្រសិទ្ធភាព ដោយសារវាគឺជាក្រឹត្យអាសន្នសម្រាប់ខ្ចីលុយចំនួន ៤០០ ពាន់លានបាត (១២ ពាន់លានដុល្លារ) បង្កឱ្យមានការប្តឹងតវ៉ាពីសំណាក់គណបក្សប្រឆាំងថា រដ្ឋាភិបាលកំពុងរំលោភអំណាចប្រើផ្លូវកាត់តាមរយៈការអនុម័តក្រឹត្យអាសន្ន ដើម្បីជៀសវាងការត្រួតពិនិត្យ និងដេញដោលពីសភា។ គេព្រួយបារម្ភថា ទំហំថវិកាធំពេកអាចធ្វើឲ្យជំនួយធ្លាក់មិនចំគោលដៅដែលជាពលរដ្ឋក្រីក្រ ឬ ក្រុមជនងាយរងគ្រោះបំផុតដែលកំពុងត្រូវការជំនួយពិតប្រាកដនោះទេ ប៉ុន្តែបែរជាបានទៅលើអ្នកដែលមានលទ្ធភាពស្រាប់ទៅវិញ។ ក្តីព្រួយបារម្ភមួយទៀត គឺគោលបំណងនៃការជួយឧបត្ថម្ភធនរបស់រដ្ឋាភិបាលចង់ឱ្យពលរដ្ឋបង្កើនការចំណាយ ដើម្បីឲ្យចរន្តក្នុងស្រុកដើរជំរុញសេដ្ឋកិច្ចជាតិ។ ជាក់ស្តែង ពលរដ្ឋអាចយកលុយជំនួយទាំងនោះទៅទិញទំនិញនាំចូលពីបរទេស ជាពិសេសទំនិញតម្លៃថោកពីប្រទេសចិន។ កត្តានេះធ្វើឱ្យប្រាក់ជំនួយរបស់រដ្ឋាភិបាលថៃហូរធ្លាយទៅក្រៅប្រទេសវិញ ដែលបាត់បង់ឱកាសក្នុងការជួយស្តារអាជីវកម្មខ្នាតតូច និងមធ្យម (SMEs) នៅក្នុងស្រុក។ មួយវិញទៀតនោះ គឺរដ្ឋាភិបាលកាត់បន្ថយពន្ធសម្រាប់ឡានអគ្គិសនី EV ដើម្បីលើកទឹកចិត្តឱ្យពលរដ្ឋបង្កើនប្រើប្រាស់កាន់តែច្រើន ខណៈដែលគ្មានផែនការផលិតឡានអគ្គិសនី EV ក្នុងស្រុកច្បាស់លាស់។​ បញ្ហានេះអាចបំផ្លាញមហិច្ឆតារបស់ថៃក្នុងការក្លាយជាមជ្ឈមណ្ឌលផលិត និងផ្គត់ផ្គង់រថយន្តកែច្នៃបៃតងប្រចាំតំបន់ ដោយសារការកើនឡើងនៃការនាំចូលឡាន EV ពីបរទេស ជាពិសេសពីប្រទេសចិន។

យ៉ាងណាក្ដី បើទោះបីជារដ្ឋាភិបាលថៃប្រកាសពីបំណងស្វែងរកដៃគូផ្គត់ផ្គង់ប្រេងថ្មីៗ និងត្រៀមថវិកាប្រមាណ ២០០ ពាន់លានបាត (៦ ពាន់លានដុល្លារ) សម្រាប់ការកែទម្រង់សេដ្ឋកិច្ចបៃតង និងការអភិវឌ្ឍជំនាញកម្លាំងពលកម្មក៏ដោយ ប៉ុន្តែមិនទាន់មានផែនការជាក់លាក់នៅឡើយ។ ដូច្នេះហើយ អ្នកជំនាញបានលើកឡើងថា រដ្ឋាភិបាលថៃ គួរបោះបង់ចោលនូវវិធានការបណ្តោះអាសន្ន ហើយពន្លឿនការរៀបចំយុទ្ធសាស្ត្រកែទម្រង់រចនាសម្ព័ន្ធសេដ្ឋកិច្ចរយៈពេលវែង និងផ្លាស់ប្តូរទៅរកថាមពលបៃតងជាបន្ទាន់ ដោយសារថៃចង់ក្លាយជាមជ្ឈមណ្ឌលសម្រាប់បញ្ញាសិប្បនិម្មិត AI, ទិន្នន័យ, ឈីបគ្រឿងពាក់កណ្តាលចម្លង, និងឡានអគ្គិសនី EV ។ វិស័យទាំងនេះមានតម្រូវការថាមពលខ្ពស់ ដែលទាមទារឲ្យថៃត្រូវពង្រឹងហេដ្ឋារចនាសម្ព័ន្ធថាមពលកកើតឡើងវិញ។ លើសពីនេះ ការគ្រប់គ្រងទឹក ដូចជា ការកែច្នៃទឹកកខ្វក់ និងការចម្រោះទឹក ត្រូវតែជាអាទិភាព ព្រោះឧស្សាហកម្មបច្ចេកវិទ្យាខ្ពស់ត្រូវការទឹកច្រើនសម្រាប់ប្រព័ន្ធត្រជាក់។ យ៉ាងណាមិញ បច្ចុប្បន្ននេះ ថៃកំពុងជួបនឹងវិបត្តិកង្វះខាតទឹក គំរាមកំហែងដល់វិស័យកសិកម្ម ដែលមានកម្លាំងពលកម្មជិត ១/៣ នៃប្រជាជនសរុប៕