បរទេស ៖ អាម៉េរិក បានជំរុញឲ្យបណ្តាក្រុមប្រទេសដែលជាសមាជិក G20 បង្កើនសម្ពាធសេដ្ឋកិច្ចទៅលើប្រទេសអ៊ីរ៉ង់ ដើម្បីឱ្យប្រទេសមួយនេះនៅឯកោតែឯង និងពិនិត្យឡើងវិញនូវលក្ខខណ្ឌពាណិជ្ជកម្មជាមួយមហាយក្សចិន។

ក្នុងពិធីបើកកិច្ចប្រជុំរដ្ឋមន្រ្តីហិរញ្ញវត្ថុក្រុមប្រទេស G20 នៅក្រុង Asheville រដ្ឋ North Carolina កាលពីថ្ងៃចន្ទកន្លងទៅនេះ រដ្ឋមន្ត្រីក្រសួងរតនាគារអាម៉េរិក លោក Scott Bessent បានអំពាវនាវឱ្យប្រទេសជាសមាជិកបង្កើនសម្ពាធបន្ថែមលើសេដ្ឋកិច្ចអ៊ីរ៉ង់ ខណៈដែលអាម៉េរិកកំពុងស្វែងរកជំនួយពីបណ្តាប្រទេសផ្សេងទៀត ដើម្បីដាក់សេដ្ឋកិច្ចអ៊ីរ៉ង់ឱ្យនៅឯកោ។ យុទ្ធសាស្ត្រនេះគឺចង់ឱ្យសេដ្ឋកិច្ចរបស់អ៊ីរ៉ង់ដួលរលំក្នុងរយៈពេលប៉ុន្មានសប្តាហ៍ ឬ ប៉ុន្មានខែខាងមុខទៀត ដើម្បីបង្ខំឱ្យរបបដឹកនាំមួយនេះយល់ព្រមចរចាជាមួយអាម៉េរិក។ យ៉ាងណាមិញ ការដាក់ឱ្យអ៊ីរ៉ង់នៅឯកោពីប្រព័ន្ធហិរញ្ញវត្ថុសកលលោកត្រូវទាមទារឱ្យមានការគាំទ្រពីសម្ព័ន្ធមិត្តរបស់អាម៉េរិក។

សហភាពអឺរ៉ុបបានចេញសេចក្ដីថ្លែងការណ៍មួយថា ប្លុករបស់ខ្លួនបានត្រៀមជាស្រេចក្នុងការចាត់វិធានការបន្ថែមទៀតនៅពេលចាំបាច់ ដើម្បីការពារសន្តិសុខ និងផលប្រយោជន៍របស់ខ្លួន រួមទាំងសេរីភាពនៃការធ្វើនាវាចរណ៍ឆ្លងកាត់ច្រកសមុទ្រ Hormuz ផងដែរ។ យ៉ាងណាក្ដី ចិនដែលជាសមាជិកក្រុម G20 និងជាអ្នកទិញប្រេងធំជាងគេរបស់អ៊ីរ៉ង់បានបដិសេធចំពោះការដាក់ទណ្ឌកម្មនេះ ព្រមទាំង​ប្រកាន់គោលជំហរការពារផលប្រយោជន៍ខ្លួនយ៉ាងមុតមាំ។

សូមជម្រាបថា មុនកិច្ចប្រជុំចាប់ផ្តើម លោក Scott Bessent បានជំរុញឱ្យប្រទេសជាសមាជិកនៃក្រុម G20 ពិនិត្យឡើងវិញនូវលក្ខខណ្ឌពាណិជ្ជកម្មជាមួយចិន ដើម្បីកាត់បន្ថយអតុល្យភាពសកល និងដាក់សម្ពាធឱ្យទីក្រុងប៉េកាំង។ លោក Bessent បានចាត់ទុកអតិរេកពាណិជ្ជកម្មទំហំ ១,២ ទ្រីលានដុល្លាររបស់ចិនថា មិនមាននិរន្តរភាព ខណៈដែលសេដ្ឋកិច្ចក្នុងស្រុករបស់ចិនកំពុងមានភាពទន់ខ្សោយ។ កន្លងមក អាម៉េរិករៀបចំគោលនយោបាយពន្ធគយរបស់ខ្លួនឡើងវិញដើម្បីទប់ស្កាត់ទំនិញចិនមិនឱ្យហូរចូលទីផ្សារខ្លួន ប៉ុន្តែវាបានធ្វើឱ្យទំនិញទាំងនោះហូរចូលទីផ្សារអឺរ៉ុប និងអាមេរិកឡាទីនជំនួសវិញ។

ជាមួយគ្នានេះ ស្របពេលដែលអាម៉េរិកធ្វើជាម្ចាស់ផ្ទះសម្រាប់កិច្ចប្រជុំក្រុមរដ្ឋមន្រ្តី G20 នេះ ខ្លួនក៏កំពុងមានភាពចលាចលជាមួយនឹងសម្ព័ន្ធមិត្តសំខាន់ៗជាច្រើនដោយសារសង្គ្រាមរវាងអាម៉េរិកជាមួយនឹងអ៊ីរ៉ង់ ដែលទទួលបានការរិះគន់យ៉ាងខ្លាំង ក្រោមហេតុផលចម្បងនៃតម្លៃប្រេង និងឧស្ម័នឡើងថ្លៃខ្ពស់។ មិនត្រឹមតែប៉ុណ្ណោះ អាម៉េរិ ក៏កំពុងមានសង្គ្រាមពាណិជ្ជកម្មជាមួយកាណាដា បន្ទាប់ពីការដំឡើងពន្ធរបស់លោក ដូណាល់ ​ត្រាំ ៕