សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តំបន់ប៉ែកខាងត្បូង រាជធានីភ្នំពេញ ដែលស្ថិតនៅក្នុងខណ្ឌដង្កោ នាពេលបច្ចុប្បន្ននេះ បាន និងកំពុងបន្តផ្លាស់ប្ដូរមុខមាត់ថ្មីនៃការអភិវឌ្ឍយ៉ាងលឿនរហ័ស ជាមួយវត្តមានគម្រោងសំណង់តូចធំ ជាពិសេស បុរី លំនៅឋានតម្លៃមធ្យម ផ្សារទំនើប សាលាឯកជន ព្រមទាំងបណ្តាញហេដ្ឋារចនាសម្ព័ន្ធ ផ្លូវថ្នល់ខ្វាត់ខ្វែងយ៉ាងធំទូលាយ ងាយស្រួលធ្វើដំណើរ ដែលផ្ទុយស្រឡះ ខុសពីមុន ជាតំបន់ស្ងប់ស្ងាត់ លិចទឹក និងជាវាលស្រែ ជាពិសេស ប្រឈមនឹងភាពអសន្តិសុខ។
ជាមួយនឹងទិដ្ឋភាពជាក់ស្ដែងនៃការប្រែក្លាយពីតំបន់ស្ងប់ស្ងាត់ទៅជាតំបន់ដែលមានភាពទាក់ទាញយ៉ាងលឿនរហ័សបែបនេះ ត្រូវបានមើលឃើញថា កើតមានបន្ទាប់ពីរាជរដ្ឋាភិបាលបានអនុវត្តតាមផែនការពង្រីករាជធានី តាមរយៈការវិនិយោគទៅលើហេដ្ឋារចនាសម្ព័ន្ធក្នុងតំបន់ តភ្ជាប់ទៅកាន់បណ្តាញផ្លូវមេធំៗជាបន្តបន្ទាប់ ជាក់ស្ដែងផ្លូវព្រៃស តភ្ជាប់ពីផ្លូវជាតិលេខ៣ មកកាន់ផ្លូវចម្ការដូង រួមជាមួយនឹងផ្លូវក្រវាត់ក្រុងទី២ បានធ្វើឱ្យតំបន់ព្រៃស និងតំបន់ពាក់ព័ន្ធ ចាប់ផ្តើមមានសកម្មភាពសាងសង់គម្រោងលំនៅឋានជាហូរហែ ដោយក្នុងនោះ រួមមានទាំងគម្រោងបុរីលំនៅឋានតម្លៃមធ្យម និងតម្លៃខ្ពស់ ហាងអាហារដ្ឋានបែបទំនើបៗ ដែលកាន់តែជំរុញឱ្យមនុស្សចូលទៅរស់នៅទីនោះកាន់តែច្រើនឡើងៗ ។
លោក ឌិត ចណ្ណា អគ្គនាយកក្រុមហ៊ុន Lucky Realty បានមានប្រសាសន៍ថា ក្នុងចំណោមតំបន់នានានៅជាយរាជធានីភ្នំពេញ សម្រាប់ខណ្ឌដង្កោ ជាតំបន់មួយដែលនៅមានកំណើនតម្លៃដី ពីព្រោះថាតំបន់នេះនៅមានដីទំនេរច្រើនសម្រាប់ការអភិវឌ្ឍ ដូចជា បុរី បណ្តុំលំនៅឋាន ឃ្លាំង និងរោងចក្រជាដើម ។
លោកបន្តថា ៖ តំបន់ប៉ែកខាងត្បូងភ្នំពេញមួយនេះនៅតែមានសក្ដានុពលក្នុងការអភិវឌ្ឍ គឺស្របទៅតាមចក្ខុវិស័យរបស់រាជរដ្ឋាភិបាល ជាក់ស្ដែងប្រព័ន្ធរំដោះទឹកជំនន់នៅប៉ែកខាត្បូងក៏ត្រូវបានសាងសង់រួចជាស្រេច ព្រលានយន្តហោះអន្តរជាតិតេជោក៏បានដាក់ដំណើរការ ខណៈគម្រោងអភិវឌ្ឍន៍របស់រដ្ឋមួយចំនួនទៀតក៏ត្រៀមនឹងអភិវឌ្ឍន៍នាពេលខាងមុខនេះដែរ ។
អ្នកស្រី អាន ធីតា អគ្គនាយិកាក្រុមហ៊ុន PropNex Cambodia បានលើកឡើងថា តំបន់ប៉ែកខាងត្បូងភ្នំពេញ មានការអភិវឌ្ឍលើហេដ្ឋារចនាសម្ព័ន្ធថ្មីៗជាបន្តបន្ទាប់ ហើយតាមរយៈការអភិវឌ្ឍហេដ្ឋារចនាសម្ព័ន្ធទាំងនេះ បានធ្វើឱ្យតំបន់មួយនេះបន្តមានភាពទាក់ទាញអ្នកវិនិយោគឱ្យចូលបណ្ដាក់ទុនវិនិយោគ និងអភិវឌ្ឍលើគម្រោងរបស់ពួកគេ ជាក់ស្ដែងប៉ុន្មានឆ្នាំចុងក្រោយនេះ តំបន់ប៉ែកខាងត្បូង នៅតែមានសកម្មភាពសាងសង់គម្រោងនានា ហើយក៏មានគម្រោងអភិវឌ្ឍន៍ដីឡូតិ៍ផងដែរ៕
Account
Security
Favourite Content