សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កាលពីឆ្នាំ២០២៣ កន្លងទៅនេះ កម្ពុជាទទួលអ្នកដំណើរតាមផ្លូវអាកាសបានចំនួន ៥ ១១១ ៨១០នាក់ កើនឡើងជាងពីរដង បើប្រៀបធៀបនឹងឆ្នាំ២០២២ ដែលមានអ្នកដំណើរចំនួន ២ ៣៨១ ៩៩៥នាក់។ នេះបើតាមការឱ្យដឹងរបស់ឯកឧត្តម បណ្ឌិត ម៉ៅ ហាវណ្ណាល់ រដ្ឋមន្ដ្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិលក្នុងពិធីបើកថ្នាក់បរិញ្ញាបត្រជំនាន់ទី១ គ្រប់គ្រងអាកាសចរណ៍ស៊ីវិល ឆ្នាំសិក្សា២០២៣-២០២៤ នៅថ្ងៃទី១៥ ខែកុម្ភៈ ឆ្នាំ២០២៤។
តាមរយៈទិន្នន័យនេះ ឯកឧត្តម បណ្ឌិត ម៉ៅ ហាវណ្ណាល់ បានលើកឡើងថា នេះជាសញ្ញាមួយបង្ហាញឲ្យឃើញថា ក្រោយពីជំងឺរាតត្បាតកូវីដ-១៩ វិស័យដឹកជញ្ជូនតាមផ្លូវអាកាសងើបឡើងវិញយ៉ាងឆាប់រហ័ស។
វិស័យទេសចរណ៍នៅតែជាសសរស្តម្ភនៃសេដ្ឋកិច្ចរបស់កម្ពុជា ។ វិស័យនេះមានសារៈសំខាន់សម្រាប់យុទ្ធសាស្ត្រអភិវឌ្ឍន៍សេដ្ឋកិច្ច-សង្គមរបស់រដ្ឋាភិបាលកម្ពុជា ខណៈដែលក្រសួងទេសចរណ៍បានកំណត់គោលដៅទទួលភ្ញៀវទេសចរអន្តរជាតិចំនួន ៦,៤ លាននាក់នៅឆ្នាំ២០២៥ និង ៧ លាននាក់នៅឆ្នាំ២០២៦។
បើតាម ឯកឧត្តម ស៊ិន ចាន់សិរីវត្ថា បានឱ្យដឹងថា ក្នុងឆ្នាំ២០២៣ ក្រៅពីការកើនឡើងចំនួនអ្នកដំណើរនោះ ចំនួនជើងហោះហើរ ក៏កើនឡើងជិត៨០ ភាគរយ ខណៈការដឹកជញ្ជូនទំនិញតាមផ្លូវអាកាសកើន១ភាគរយ ។ អាកាសយានដ្ឋានអន្តរជាតិ ភ្នំពេញ ទទួលបានអ្នកដំណើរចេញ-ចូលច្រើនជាងគេសម្រាប់ឆ្នាំ២០២៣ បន្ទាប់មកអាកាសយានដ្ឋានអន្តរជាតិសៀមរាប-អង្គរ និងអាកាសយានដ្ឋានអន្តរជាតិខេត្តព្រះសីហនុ។
ឯកឧត្តម ស៊ិន ចាន់សិរីវត្ថា បានបង្ហាញពីសុទិដ្ឋិនិយមថា ដោយមានការខិតខំប្រឹងប្រែងរបស់រាជរដ្ឋាភិបាលក្នុងការជំរុញ និងលើកកម្ពស់វិស័យទេសចរណ៍ ពិតជានឹងនាំឱ្យចំនួនអ្នកដំណើរតាមផ្លូវ អាកាសរបស់កម្ពុជាបន្តមានវឌ្ឍនភាពសម្រាប់ឆ្នាំ២០២៤ នេះ។
ទាក់ទងនឹងអ្នកដំណើរតាមផ្លូវអាកាសនេះ ឯកឧត្តម បណ្ឌិត ម៉ៅ ហាវណ្ណាល់ បានឲ្យដឹងផងដែរថា បច្ចុប្បន្នការសាងសង់អាកាសយានដ្ឋានអន្ដរជាតិថ្មីមួយទៀត ដែលមានទីតាំងនៅក្រុងតាខ្មៅ ខេត្ដកណ្ដាល នឹងមានលទ្ធភាពទទួលយន្ដហោះប្រភេទធំបាន ហើយការសាងសងនឹងបញ្ចប់ និងដាក់ឲ្យដំណើរការនាឆ្នាំក្រោយ។ ដូច្នេះនឹងមានការកើនឡើងចំនួនអ្នកដំណើរ និងជើងហោះហើរបន្ថែមទៀត។
ជាមួយគ្នានេះ ឯកឧត្តម បណ្ឌិត ម៉ៅ ហាវណ្ណាល់ បានស្នើដល់ក្រុមហ៊ុនអាកាសចរណ៍, ក្រុមហ៊ុនសេវាកម្មចរាចរដែនអាកាសកម្ពុជា, អាកាសយានដ្ឋាន និងដៃគូអភិវឌ្ឍន៍ ព្រមទាំងវិទ្យាស្ថានជាតិ អាកាសចរណ៍ស៊ីវិល ពង្រឹង និងពង្រីកសមត្ថភាពរបស់ខ្លួនឲ្យកាន់តែមានប្រសិទ្ធភាព ធានាឲ្យមានសុវត្ថិភាពខ្ពស់ លើវិស័យដឹកជញ្ជូនផ្លូវអាកាសនៅកម្ពុជា។
ពាក់ព័ន្ធនឹងអាកាសយានដ្ឋានអន្ដរជាតិតេជោ ឯកឧត្តម ស៊ិន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យអាកាសចរស៊ីវិល បានបញ្ជាក់ឲ្យដឹងកាលពីថ្ងៃទី១៥ ខែកុម្ភៈ ឆ្នាំ២០២៤នេះថា អាកាសយានដ្ឋានអន្តរជាតិតេជោ (TIA) គ្រោងដាក់ឲ្យដំណើរការនៅចុងឆមាសទី១ ឆ្នាំ២០២៥ ខាងមុខ។ លទ្ធផលការងារសាងសង់ដែលក្រុមហ៊ុនសម្រេចបានក្នុងដំណាក់កាលទី១ គិតត្រឹមថ្ងៃទី៨ ខែកុម្ភៈ ឆ្នាំ២០២៤ មានចំនួន ៦៤.១ % នៃការងារសរុប ដោយចំណាយទឹកប្រាក់សរុបអស់ចំនួន ៩៣២លានដុល្លារ។
ចំពោះការកសាងសង់ផ្លូវតភ្ជាប់ពី មហាវិថីសម្តេច កាត់ផ្លូវជាតិលេខ២ ឆ្ពោះទៅកាន់អាកាសយានដ្ឋាន ដែលមានទទឹង៦០ម៉ែត្រ និងបណ្តោយប្រវែង ១៣.៥ គីឡូម៉ែត្រ សម្រេចបាន៨៥%ហើយ។
គួររំលឹកថា ៖ អាកាសយានដ្ឋានអន្តរជាតិតេជោ បានចាប់ផ្តើមដំណើរការសាងសង់នៅឆ្នាំ២០១៩ ហើយគ្រោងនឹងបញ្ចប់នៅចុងឆ្នាំឆ្នាំ២០២៤ (ដំណាក់កាលទី១)។ អាកាសយានដ្ឋានអន្តរជាតិតេជោ ជាប្រភេទ 4F គឺប្រភេទព្រលានយន្តហោះធំ ដែលអាចនឹងស្រូបយក និងទទួលបានការហោះហើរពីឆ្ងាយឆ្លងទ្វីប ដែលអាចឲ្យប្រភេទយន្តហោះធុនយក្ស រហូតដល់ Airbus A380-800 និង យន្តហោះ Boeing 747-800 ចុះចតបាន។ ក្រុមហ៊ុនវិនិយោគ មានមហិច្ឆិតាអភិវឌ្ឍន៍ជាព្រលានយន្តហោះថ្មីនេះឲ្យធំ និងទំនើបជាងគេនៅតំបន់អាស៊ី៕
Account
Security
Favourite Content