សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រដ្ឋាភិបាលបានសម្រេចបោះផ្សាយមូលបត្ររដ្ឋ ក្នុងគោលបំណងរួមចំណែកអភិវឌ្ឍន៍ទីផ្សារហិរញ្ញវត្ថុកម្ពុជា និងកេណ្ឌប្រមូលមូលធនក្នុងស្រុកជាប្រាក់រៀល ដើម្បីប្រើប្រាស់ក្នុងការវិនិយោគរយៈពេលមធ្យម និងវែង។ ធនាគារជាតិនៃកម្ពុជាបានទទួលបន្ទុកជាភ្នាក់ងារបោះផ្សាយ និងទូទាត់មូលបត្រនៅលើទីផ្សារដំបូង (Primary Market) ដែលមានគ្រឹះស្ថានធនាគារ និងហិរញ្ញវត្ថុ ជាអ្នកចូលរួមជាវ។
យោងតាមរបាយការណ៍របស់ធនាគារជាតិនៃកម្ពុជា បានឱ្យដឹងថា នៅឆ្នាំ ២០២២ នេះ មូលបត្ររដ្ឋត្រូវបានបោះផ្សាយចំនួន ៥ លើក តាមរយៈការដេញថ្លៃនៅ លើផ្លែតហ្វម NBCP ដែលមានទឹកប្រាក់ចំនួន ៧២,១ ពាន់លានរៀល (១៧,៦ លានដុល្លារអាមេរិក) ទាបជាងការគ្រោងទុក (១,២ ទ្រីលានរៀល ឬ៣០០លានដុល្លារអាមេរិក)។ ការបោះផ្សាយបានក្នុង ចំនួនទាបជាងការគ្រោងទុកនេះ គឺដោយសារការពន្យារពេលនៃការចេញបោះផ្សាយ” ក៏ដូចជា ការដេញថ្លៃមួយចំនួនមិនទទួលបានជោគជ័យ។ ឥណប្រតិទាននៃមូលបត្ររដ្ឋដែលបានបោះផ្សាយមានរយៈពេល ១ ឆ្នាំ ក្នុងអត្រាចំណូលជាមធ្យម ២,២%។
ការបោះផ្សាយមូលបត្ររដ្ឋគឺជាជំហានយ៉ាងសំខាន់ក្នុងការរួមចំណែកអភិវឌ្ឍទីផ្សារហិរញ្ញវត្ថុ ក្នុងស្រុកបន្ថែមទៀត ក៏ដូចជាការលើកកម្ពស់ការអនុវត្តនយោបាយរូបិយវត្ថុ ផ្អែកលើយន្តការទីផ្សារតាមរយៈការបង្កើតឧបករណ៍រូបិយវត្ថុមួយដែលគ្មានហានិភ័យ ការផ្តល់ជាឧបករណ៍សម្រាប់ប្រើជាប្រាតិភោគដើម្បីទទួលបានហិរញ្ញប្បទាន ជាប្រភពទុនដែលមានស្ថិរភាពធៀបនឹងប្រភពទុនក្រៅប្រទេស និងជួយជំរុញការប្រើប្រាស់ប្រាក់រៀលនៅកម្ពុជា។
ទោះជាយ៉ាងក្តី ទាក់ទងនឹងការបោះផ្សាយមូលបត្ររដ្ឋទាបជាងការគ្រោងទុក ឯកឧត្តម វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ បានលើកឡើងកាលពីថ្មីៗនេះថា ការបោះលក់មូលបត្របំណុលរបស់រដ្ឋាភិបាល មិនមែនដោយសាររដ្ឋខ្វះលុយទេ តែជាការសាកល្បងយន្តការទីផ្សារមូលបត្រ ដើម្បីឈានទៅរកពេលអនាគត ប្រើប្រាស់បំណុលសាធារណៈក្នុងស្រុក កុំពឹងផ្អែកតែបំណុលពីបរទេស។
ឯកឧត្តមបានថ្លែងថា ការបោះលក់មូលបត្របំណុលរបស់រដ្ឋ ក្នុងឆ្នាំ ២០២២ គ្រោងបោះលក់ ៣០០ លានដុល្លារ ប៉ុន្ដែជាក់ស្ដែងបានតែជិត ២០លានដុល្លារប៉ុណ្ណោះ ចំពោះការបោះផ្សាយបានតិចត្រឹមតែជិត ២០ លានដុល្លារនេះ មិនបានប៉ះពាល់ដល់ការចំណាយថវិកាឆ្នាំ ២០២២ នោះឡើយ។
ឯកឧត្តមបានបញ្ជាក់ថា ៖
“ការបោះលក់មូលបត្របំណុលនេះ តាមពិតយើងអត់ត្រូវការលុយប៉ុន្មាននោះទេ យើងចង់សាកល្បងយន្តការ នៃប្រព័ន្ធប្រតិបត្តិទីផ្សារមូលបត្ររបស់យើងទេ ដើម្បីគោលដៅទី ១ ចង់ពីដំណើរការនៃយន្តការនេះ និងទី ២ នៅថ្ងៃក្រោយវាក្លាយជាគោលមួយ សម្រាប់ធ្វើមូលបត្របំណុលឯកជន ដែលជាគោលដៅរយៈពេលវែង យើងចង់ធ្វើពិពិធកម្មបំណុលរបស់យើង កុំឱ្យពឹងទៅលើក្រៅប្រទេសពេក ព្រោះក្នុងស្រុកយើងក៏មានសល់លុយច្រើនដែរ”
សូមបញ្ជាក់ផងដែរថា ក្រសួងសេដ្ឋកិច្ច និងហិរញ្ញវត្ថុ ពីខែមករា ឆ្នាំ ២០២៣ នេះ បានចេញសេចក្តីប្រកាសព័ត៌មាន បង្ហាញពីផែនការបោះផ្សាយលក់មូលបត្ររដ្ឋ ក្នុងទំហំទឹកប្រាក់ ៨១៣ ០០០ ០០០ ០០០រៀល ស្មើនឹង ២០០ លានដុល្លារ ក្នុងឆ្នាំ២០២៣ នេះ។
ក្រសួងបញ្ជាក់ថា មូលបត្ររដ្ឋដែលនឹងបោះផ្សាយលក់នាពេលខាងមុខនេះ ក្នុងមួយបណ្ណមានតម្លៃ ១ លានរៀល, ប្រភេទអត្រាគូប៉ុង ថេរ, ការទូទាត់គូប៉ុងរៀងរាល់ ៦ខែម្ដង គិតចាប់ពីថ្ងៃបោះផ្សាយ, គម្លាតនៃការបោះផ្សាយ មានរយៈពេល ៤ សប្ដាហ៍។
ប្រភេទមូលបត្រឥណប្រតិទានមានចំនួន ៥ ប្រភេទរួមមាន៖ ១ ឆ្នាំ ២ ឆ្នាំ, ៣ ឆ្នាំ, ៥ ឆ្នាំ និង ១៥ ឆ្នាំ។ ប្រភេទប្រតិទាន ១ ឆ្នាំបោះផ្សាយចំនួន ៣ ដង ក្នុងទំហំបោះផ្សាយចំនួន ២០០ ពាន់លានរៀល។ ប្រតិទាន២ឆ្នាំ បោះផ្សាយចំនួន ២ ដង ក្នុងទំហំបោះផ្សាយចំនួន ១២០ ពាន់លានរៀល។ ប្រតិទាន ៣ ឆ្នាំ បោះផ្សាយចំនួន៣ដង ក្នុងទំហំបោះផ្សាយចំនួន ២០០ ពាន់លានរៀល។ ប្រតិទាន ៥ ឆ្នាំ Private Placement។ ប្រតិទាន ១០ ឆ្នាំ បោះផ្សាយចំនួន ២ ដង ក្នុងទំហំបោះផ្សាយចំនួន ៤០ ពាន់លានរៀល និងប្រតិទាន ១៥ ឆ្នាំ បោះផ្សាយចំនួន ២ ដង ក្នុងទំហំបោះផ្សាយចំនួន ៤០ ពាន់លានរៀល៕
Account
Security
Favourite Content