សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ អគារតាំងបង្ហាញរថយន្តស្ទើរតែគ្រប់ម៉ាកយីហោ បាន និងកំពុងលេចវត្តមាននៅតាមបណ្ដោយផ្លូវ៦០ម៉ែត្រ ដែលធ្វើឱ្យមហាវិថីមួយនេះកាន់តែមានសក្ដានុពលក្នុងការទាក់ទាញការវិនិយោគថ្មីៗជាបន្តបន្ទាប់ និងកំពុងធ្វើឱ្យតំបន់នៅតាមបណ្ដោយផ្លូវមួយនេះក្លាយទៅជាតំបន់ពាណិជ្ជកម្មដ៏មមាញឹក ។
ជាការកត់សម្គាល់ បើសិនជាធ្វើដំណើរពីស្ពានអាកាសមរតកតេជោ ទៅកាន់ស្ពានអាកាសមហាបវរធិបតី ហ៊ុន ម៉ាណែត នោះអ្នកទាំងអស់គ្នានឹងឃើញអគារតាំងបង្ហាញរថយន្តស្ទើរតែគ្រប់ម៉ាកយីហោទាំងរថយន្តប្រណីត និងរថយន្តថ្មីៗ តម្លៃសមរម្យ ហើយក្នុងនោះដែរក៏ឃើញថាក្រុមហ៊ុនរថយន្តទាំងនោះបានពង្រីកអគារតាំងបង្ហាញកាន់តែធំ ហាក់ដូចជាកំពុងប្រកួតប្រជែង ។
បើតាមអ្នកជំនាញអចលនទ្រព្យនៅកម្ពុជាបានបញ្ជាក់ស្រដៀងៗគ្នាថា វត្តមានអគារតាំងបង្ហាញរថយន្តនៅតាមបណ្ដោយផ្លូវ៦០ម៉ែត្របានលេចរូបរាងឡើងតាំងតែពីពេលគម្រោងវិនិយោគលើអាកាសយានដ្ឋានអន្តរជាតិតេជោដំបូងម្ល៉េះ ប៉ុន្តែវាមានមិនសូវច្រើនទេ រហូតដល់អាកាសយានដ្ឋានអន្តរជាតិនេះសង់រួច និងបានដាក់ឱ្យដំណើរការ អគារតាំងបង្ហាញរថយន្តកាន់តែច្រើនបានសាងសង់ និងដាក់តាំងបង្ហាញរថយន្តរបស់ខ្លួនកាន់តែច្រើន ។
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានមានប្រសាសន៍ថា ចាប់តាំងពីអាកាសយានដ្ឋានអន្តរជាតិតេជោ បានចាប់ផ្ដើមដំណើរការ តំបន់តាមបណ្ដោយផ្លូវ៦០ម៉ែត្រ ក៏មានអាជីវកម្មជាច្រើនបើកដំណើរការជាបន្តបន្តាំប់ ក្នុងនោះក៏ឃើញមានវត្តមានអគារតាំងបង្ហាញរថយន្តជាច្រើនផងដែរ ។
លោកបន្តថា តាមរយៈសកម្មភាព និងវត្តមានអាជីវកម្មក៏ដូចជាអគារតាំងបង្ហាញរថយន្តនៅតាមបណ្ដោយផ្លូវមួយនេះ ក៏បានធ្វើឱ្យតំបន់មួយនេះ នៅតែបន្តទាក់ទាញ និងនៅតែមានសក្ដានុពលខ្ពស់ បើទោះបីជាតំបន់ផ្សេងៗទៀត ក្នុងរាជធានីភ្នំពេញ និងជុំវិញរាជធានីភ្នំពេញ មានសភាពស្ងប់ស្ងាត់ក៏ដោយ ។
លោកថា ៖
« ការដាក់តាំងបង្ហាញរថយន្តនៅក្នុងអគារតាំងបង្ហាញនៅតាមបណ្ដោយផ្លូវ៦០ម៉ែត្រ វានឹងជំរុញសកម្មភាពពាណិជ្ជកម្មនៅតំបន់បណ្ដោយផ្លូវនោះកាន់តែមមាញឹកហើយក៏បានធ្វើឱ្យតំបន់តាមបណ្ដោយផ្លូវនេះតែទទួលបានការវិនិយោគ និងកំណើនអាជីវកម្ម » ។
លោកបន្ថែមថា សម្រាប់វត្តមានអគារតាំងបង្ហាញរថយន្តនៅតាមបណ្ដោយផ្លូវមួយនេះ ខាងក្រុមហ៊ុនលក់រថយន្ត គេត្រូវការរកតំបន់ណាដែលមានសកម្មភាពពាណិជ្ជកម្មអន្តរជាតិ ហើយផ្លូវ៦០ម៉ែត្រនេះ គឺជាទីតាំងដែលភ្ញៀវទេសចរ ឬវិនិយោគិនអន្តរជាតិចេញចូល ដោយសារតែពួកគេត្រូវធ្វើដំណើរឆ្លងកាត់តាមផ្លូវមួយនេះ ទៅកាន់អាកាសយានដ្ឋានអន្តរជាតិ ឬពេលដែលគេចុះមកដល់កម្ពុជាភ្លាម គឺត្រូវឆ្លងកាត់តំបន់នេះមុនគេតែម្ដង ។ បច្ចុប្បន្ននេះ តំបន់តាមបណ្ដោយផ្លូវ៦០ម៉ែត្រ ឬតំបន់តំបន់ជុំវិញ ក៏កំពុងតែក្លាយជាតំបន់លំនៅឋានផង និងតំបន់ពាណិជ្ជកម្មផង ដោយមានក្រុមហ៊ុនអភិវឌ្ឍន៍ជាច្រើនបានធ្វើសកម្មភាពអភិវឌ្ឍលំនៅឋាន និងបង្កើតផ្សារទំនើបខ្នាតតូចជាច្រើន ។
ឧកញ៉ា សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បានលើកឡើងថា ទីផ្សារអចលនទ្រព្យនាពេលបច្ចុប្បន្ននេះ នៅតែមានការទិញលក់ សម្រាប់ទីទាំងឬទ្រព្យដែលមានតម្រូវការ ។ ទីតាំងដែលល្អ ទីតាំងដែលអាចប្រកបអាជីវកម្មនិងរកចំណូលបាននៅតែមានអ្នកត្រូវការទិញដដែល ។
លោកបន្តថា នៅតំបន់ប៉ែកខាងត្បូងភ្នំពេញ នៅតែជាទីចាប់អារម្មណ៍សម្រាប់វិនិយោគិនទាំងក្នុងនិងក្រៅប្រទេស ព្រោះតំបន់នេះ ជាតំបន់ដែលអាចអភិវឌ្ឍហើយផ្ដល់ចំណូលដល់អ្នកអភិវឌ្ឍន៍ត្រលមកមកវិញ ។ យ៉ាងណាក្ដៅ ក្នុងបរិបទនៃស្ថានភាពសេដ្ឋកិច្ចមិនសូវជាអំណោយផល ការវិនិយោគក៏គួរមានប្រយ័ត្តប្រយែងខ្ពស់ ៕
Account
Security
Favourite Content