សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ផ្លូវ៦០ម៉ែត្រ ឬមហាវិថីសម្ដេចអគ្គមហាសេនាបតីតេជោ ហ៊ុន សែន បានក្លាយទៅជាផ្លូវមួយខ្សែដែលមានភាពមមាញឹកខ្លាំង ជាពិសេស ចាប់តាំងពីអាកាសយានដ្ឋានអន្តរជាតិ តេជោ បានបើកដំណើរការជាផ្លូវការ ហើយនៅពេលខាងមុខនេះនឹងជំរុញឱ្យកាន់តែមមាញឹកដូចស្ថានភាពមហាវិថីសហព័ន្ធរុស្ស៊ី ពោរពេញដោយអាជីវកម្មចម្រុះនៅអមតាមបណ្ដោយផ្លូវ ។
ជាការកត់សម្គាល់ នៅតាមបណ្ដោយផ្លូវ៦០ម៉ែត្របច្ចុប្បន្ននេះ ឃើញមានអាជីវកម្មថ្មីៗជាច្រើន កំពុងបើកដំណើរការ ដោយក្នុងនោះមានទាំងអគារតាំងបង្ហាញរថយន្តប្រណីតស្ទើរគ្រប់ម៉ាកយីហោ មានផ្សារទំនើបតូច-ធំ ភោជនីយដ្ឋាន ផ្សាររាត្រី មានអគារខ្ពស់ៗ និងអាជីវកម្មចម្រុះជាច្រើនទៀត។
អ្នកជំនាញអចលនទ្រព្យបានបានបង្ហាញការយល់ឃើញស្រដៀងគ្នាថា បណ្ដោយផ្លូវ៦០ម៉ែត្រ អាចនឹងដូចមហាវិថីសហព័ន្ធរុស្ស៊ី ក្រោយអាកាសយានដ្ឋានអន្តរជាតិ តេជោ បើកដំណើរការ ដោយសារតែអ្នកដំណើរទាំងក្នុងស្រុកនិងបរទេសដែលត្រូវចេញចូលប្រទេសកម្ពុជាតាមផ្លូវអាកាសត្រូវឆ្លងកាត់ផ្លូវ ៦០ម៉ែត្រ ដូច្នេះ ការបង្កើតអាជីវកម្មនៅតាមបណ្ដោយផ្លូវមួយនេះហាក់ដូចជាការដាក់តាំងបង្ហាញផលិតផល និងសេវាកម្មសម្រាប់ភ្ញៀវទេសចរដែលឆ្លងកាត់តាមបណ្ដោយផ្លូវនេះផងដែរ ។
អ្នកស្រី អាន សុធីតា នាយិកាប្រតិបត្តិក្រុមហ៊ុនអចលនទ្រព្យ PropNex Cambodia បានលើកឡើងថា ប៉ែកខាងត្បូងរាជធានីភ្នំពេញ នឹងកាន់តែមានសក្ដានុពលកាន់តែខ្លាំង ដោយសារតែអាកាសយានដ្ឋានអន្តរជាតិតេជោ ជាពិសេស ការអភិវឌ្ឍទៅលើវិស័យលំនៅឋាន មណ្ឌលពាណិជ្ជកម្ម និងឧស្សាហកម្មកាន់តែច្រើន ។ តំបន់នេះនឹងមានមនុស្សរស់នៅកាន់តែច្រើន និងកាន់តែអ៊ូរអរ ដោយសារតែមនុស្សនឹងទៅរស់នៅតំបន់ជុំវិញព្រលានយន្តហោះកាន់តែច្រើន ការធ្វើដំណើរតាមផ្លូវ៦០ម៉ែត្រក៏កាន់តែមមាញឹក ស្របនឹងអាជីវកម្មជាច្រើនបានបង្កើតឡើងថ្មីៗនៅតំបន់នោះ ដើម្បីបំពេញតម្រូវការ ។
អ្នកស្រីបន្តថា នៅពេលអនាគត តំបន់ប៉ែកខាងត្បូងភ្នំពេញ នឹងកាន់តែទាក់ទាញខ្លាំង ខណៈហេដ្ឋារចនាសម្ព័ន្ធខ្វាត់ខ្វែងរីកដុះដាលឡើងដែលធ្វើឱ្យការរស់នៅរបស់ពលរដ្ឋកាន់តែងាយស្រួលជាងមុន ។
គួររម្លឹកថា ថ្មីៗនេះ ក្រុមហ៊ុនអភិវឌ្ឍន៍អាកាសយានដ្ឋានអន្តរជាតិតេជោ បានប្រកាសពីគម្រោងអភិវឌ្ឍន៍លំនៅឋានតម្លៃសមរម្យនៅក្បែរនឹងអាកាសយានដ្ឋានអន្តរជាតិតេជោ ហើយគម្រោងនេះ នឹងទាក់ទាញប្រជាពលរដ្ឋទៅរស់នៅកាន់តែច្រើន ធ្វើឱ្យតំបន់នេះកាន់តែមានសក្ដានុពលក្នុងការទាក់ទាញការវិនិយោគ និងបង្កើតថ្មីៗជាច្រើនទៀតស្របទៅតាមកំណើនរបស់ពលរដ្ឋ ហើយក៏ជំរុញឱ្យតម្លៃដីធ្លីមានកំណើនស្របគ្នាជាមួយនឹងកំណើននៃការទិញលក់ផងដែរ ៕
Account
Security
Favourite Content