សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងស្ថានភាពសេដ្ឋកិច្ចបច្ចុប្បន្ន ការទិញអចលនទ្រព្យគឺជារឿងងាយស្រួល ប៉ុន្តែវាពិបាកនៅពេលត្រូវការលក់វិញ ហើយពេលខ្លះ ម្ចាស់អចលនទ្រព្យត្រូវបង្ខំចិត្តលក់ក្រោមតម្លៃទីផ្សារ ឬលក់ទាំងខាតដើម ។ ត្រង់ចំណុចនេះ អ្នកជំនាញអចលនទ្រព្យបានផ្ដល់យោបល់ដល់អ្នកកំពុងស្វែងរកទិញអចលនទ្រព្យថា សូមកុំផ្ដោតលើទ្រព្យណាដែលមានប្រាក់ចំណេញភ្លាមៗ ប៉ុន្តែត្រូវស្វែងរកទ្រព្យណាដែលអាចមានប្រាក់ចំណូល ហើយចំណូលក្នុងរយៈពេលវែង។
អ្នកស្រី អាន សុធីតា អគ្គនាយិកាក្រុមហ៊ុនអចលនទ្រព្យ PropNex Cambodia បានមានប្រសាសន៍ថា ការទិញអចលនទ្រព្យក្នុងឆ្នាំ២០២៦នេះ ឬក្នុងពេលបច្ចុប្បន្ន អ្នកទិញអចលនទ្រព្យត្រូវសម្លឹងរកអចលនទ្រព្យណាដែលអាចផ្ដល់ចំណូលបាន ដោយកុំផ្ដោតតែលើទ្រព្យណាដែលមានតែប្រាក់ចំណេញ ពោលគឺត្រូវស្វែងរកអចលនទ្រព្យនៅទីតាំងដែលអាចដាក់ជួល ឱ្យអាជីវករ ឬធុរជនបាន ។
អ្នកស្រីបន្តថា ការទិញអចលនទ្រព្យក្នុងពេលបច្ចុប្បន្ននេះគឺងាយស្រួល ពីព្រោះតែមានការដាក់លក់ច្រើន ប៉ុន្តែនៅពេលចង់លក់វិញ គឺពិបាកខ្លាំងណាស់ ។ ក្នុងពេលបច្ចុប្បន្ននេះ អ្នកទិញអចលនទ្រព្យមានអំណាចក្នុងការចរចា និងស្វែងរកបាននូវទីតាំងល្អៗ ។
អ្នកស្រីបញ្ជាក់ថា ៖
« យើងត្រូវចាំថា អចលនទ្រព្យ គឺជាប្រភេទទ្រព្យដែលមិនងាយលក់ចេញទេក្នុងពេលបច្ចុប្បន្ន មានន័យថា ជាប្រភេទទ្រព្យដែលមិនងាយផ្លាស់ប្តូរចេញជាសាច់ភ្លាមៗនោះទេ ដូច្នេះហើយ អ្នកទិញអចលនទ្រព្យត្រូវចេះបង្ការខ្លួនឯង ត្រូវមានលុយខ្លះត្រៀមទុកចំណាយ និងមានលុយសម្រាប់ទុកដំណើរការអាជីវកម្មផ្សេងទៀត »។
អ្នកស្រីបន្ថែមថា ការវិនិយោគអចលនទ្រព្យ មិនថាបច្ចុប្បន្ន និងទៅអនាគត គឺត្រូវបែងចែងឱ្យបានច្រើនប្រភេទអចលនទ្រព្យ ដោយមិនត្រូវដាក់ទុនលើប្រភេទអចលនទ្រព្យតែមួយ ។ ការវិនិយោគលើច្រើនប្រភេទអចលនទ្រព្យនឹងអាចឱ្យអ្នកវិនិយោគរកចំណូលបានផង និងរកប្រាក់ចំណេញបានផង ហើយក៏គួរតែវិនិយោគនៅលើទីតាំងផ្សេងៗគ្នា ដោយមិនត្រូវប្រមូលនូវទីតាំងតែមួយនោះដែរ ។
លោក ចេង វុទ្ធី អគ្គនាយកក្រុមហ៊ុន INVA Real Estate Investment and Valuation បានប្រាប់បណ្ដាញព័ត៌មាន AMS ដែរថា ក្នុងស្ថានភាពបច្ចុប្បន្ននេះ អ្នកវិនិយោគគួរតែចាប់ផ្ដើមធ្វើសកម្មភាព ដើម្បីទទួលបានឱកាសរកប្រាក់ចំណេញនៅឆ្នាំខាងមុខ ពីព្រោះថាឆ្នាំ២០២៦នេះ វិស័យអចលនទ្រព្យកំពុងតែវិលទៅរកភាពល្អឡើងវិញជាបណ្រើៗ ប្រៀបដូចជាជំងឺដែលកំពុងតែប្រសើរឡើងបន្តិចម្ដងៗ ហើយអាចនឹងប្រសើរកាន់តែខ្លាំងនៅឆ្នាំ២០២៧ ឬ ឆ្នាំ២០២៨ខាងមុខនេះ។
លោកបន្តថា ៖
«វិស័យអចលនទ្រព្យវាមិនអាចធ្លាក់នៅក្រោមនេះទៀតទេ ផ្ទុយទៅវិញ វានឹងងើបឡើងវិញបណ្ដើរៗ ដែលជាឱកាសសម្រាប់អ្នកស្វែងរកអចលនទ្រព្យ ជាពិសេសអចលនទ្រព្យដែលមានតម្លៃក្រោមទីផ្សារ និងស្ថិតនៅទីតាំងល្អៗ ។ បច្ចុប្បន្ន អ្នកទិញមានអំណាចខ្ពស់ក្នុងការចរចា និងស្វែងរកទីតាំងល្អៗ ហើយម្យ៉ាងវិញទៀត អចលនទ្រព្យដែលបានប្រកាសដាក់លក់ពេលនេះ ភាគច្រើនគឺដាក់លក់ក្រោមតម្លៃទីផ្សារ ដែលជាឱកាសល្អសម្រាប់អ្នកស្វែងរកទិញអចលនទ្រព្យ ដើម្បីចំណេញ» ។
គួរបញ្ជាក់ថា វិស័យអចលនទ្រព្យកម្ពុជា បានផ្ដើមជួបប្រទះនឹងបញ្ហាចាប់តាំងពីផ្ទុះជំងឺកូវីដ១៩ ក្នុងអំឡុឆ្នាំ២០២០ ហើយបានអូសបន្លាយជាបន្តបន្ទាប់រហូតដល់បច្ចុប្បន្ន ។ ប៉ុន្តែ ទោះជាយ៉ាងណា អ្នកជំនាញនៃវិស័យអចលនទ្រព្យបានបញ្ជាក់ថា បើទោះបីវិស័យនេះជួបបញ្ហាយ៉ាងណាក៏ដោយ ក៏វានៅតែមានដំណើរការទិញ-លក់ និងវិនិយោគជាបន្តបន្ទាប់ ជាពិសេសលើដីធ្លីសម្រាប់បម្រើក្នុងវិស័យឧស្សាហកម្ម ដោយសារតែកំណើននៃការវិនិយោគលើឧស្សាហកម្មកើនឡើងខ្ពស់ ទាំងក្នុងតំបន់សេដ្ឋកិច្ចពិសេស និងក្រៅតំបន់សេដ្ឋកិច្ចពិសេស ៕
Account
Security
Favourite Content