សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នាពេលបច្ចុប្បន្ននេះ អ្នកប្រកបដោយអាជីវកម្មលើសេវាកម្មអចលនវត្ថុនៅកម្ពុជា មានទាំងស្របច្បាប់ និងអត់ច្បាប់ (អ្នកអត់ច្បាប់ ធ្វើរដ្ឋាភិបាលត្រូវបាត់បង់ចំណូលមួយចំនួនតាមរយៈការបង់ពន្ធ)។ អ្វីដែលសំខាន់ការប្រកបអាជីវកម្មសេវាកម្មអចលនវត្ថុនេះដែរ ក៏អាចធ្វើឱ្យបាត់បង់ទំនុកចិត្តពីសំណាក់អ្នកវិនិយោគផងដែរ។ តើការប្រកបអាជីវកម្មសេវាកម្មក្នុងវិស័យអចលនវត្ថុនៅកម្ពុជាឱ្យបានត្រឹមត្រូវស្របច្បាប់ ត្រូវមានលក្ខខណ្ឌអ្វីខ្លះ?
លោកបណ្ឌិត ឆាក់ លឹមឈាង មេធាវីមកពីការិយាល័យមេធាវីរឹទ្ធស័ក្ តិបានបកស្រាយនិងចែករំលែកពីបទប្បញ្ញត្តិអំពី វិជ្ជាជីវៈការប្រកបអាជីវកម្មអចលនវត្ថុនៅកម្ពុជា។ លោកបានមានប្រសាសន៍ថា វិស័យអចលនវត្ថុនៅកម្ពុជាបានរួមចំណែកដល់ការទាក់ទាញការវិនិយោគ ក៏ដូចជា ចូលរួមជំរុញកំណើនសេដ្ឋកិច្ចនៅក្នុងប្រទេសកម្ពុជា ក៏ប៉ុន្តែដើម្បីធានាបាននូវតម្លាភាព ក៏ដូចជាការប្រកបវិជ្ជាជីវៈប្រកបដោយគុណភាព និងទំនុកចិត្តពីសាធារណជន រាល់ការប្រកបអាជីវកម្ម ពាក់ព័ន្ធនឹងវិស័យអចលនវត្ថុ ត្រូវតែមានអនុលោមភាពជាមួយនឹងបទប្បញ្ញតិ្តដែលមានជាធរមាន។
លោកបណ្ឌិត បានឱ្យដឹងទៀតថា រាល់ការធ្វើអាជីវកម្មផ្ដល់សេវាកម្មអចលនវត្ថុនៅក្នុងព្រះរាជាណាចក្រកម្ពុជា តម្រូវឱ្យមានការស្នើសុំអាជ្ញាបណ្ណឬវិញ្ញាបនបត្រវិជ្ជាជីវៈ។
លោកបណ្ឌិតបន្តថា អាជ្ញាបណ្ណ ដែលផ្ដល់ជូនចំពោះក្រុមហ៊ុនឬក៏សាខាក្រុមហ៊ុន មាន ៣ ប្រភេទ រួមមាន ទី១.អាជ្ញាបណ្ណភ្នាក់អចលនវត្ថុ ទី២.អាជ្ញាបណ្ណវាយតម្លៃអចលនវត្ថុ និងទី៣.អាជ្ញាបណ្ណគ្រប់គ្រងអចលនវត្ថុ។ ចំពោះវិញ្ញាបនបត្រវិជ្ជាជីវៈ ត្រូវបានផ្ដល់ជូនចំពោះរូបវ័ន្តបុគ្គលទាំងឡាយណាដែលមានគុណវុឌ្ឍគ្រប់គ្រាន់ ដូចមានចែងក្នុងប្រការ ១១ នៃប្រកាសលេខ ០៦៤។ ការផ្ដល់អាជ្ញាបណ្ណ ឬវិញ្ញាបនបត្រវិជ្ជាជីវៈសម្រាប់ការប្រកបអាជីវកម្មអចលនវត្ថុ គឺស្ថិតនៅក្រោមសមត្ថកិច្ចរបស់និយ័តករអាជីវកម្មអចលនវត្ថុ និងបញ្ចាំ។
ទន្ទឹមនេះ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ក៏បានអំពាវនាវ និងស្នើសុំឱ្យអ្នកប្រកបអាជីវកម្មផ្ដល់សេវា អចលនវត្ថុនៅកម្ពុជា សូមឱ្យស្វែងរកភាពស្របច្បាប់ ដោយត្រូវដាក់ស្នើសុំអាជ្ញាបណ្ណ និងវិញ្ញាបនបត្រវិជ្ជាជីវៈឱ្យបានគ្រប់គ្នា ដើម្បីផ្ដល់ទំនុកចិត្តដល់វិនិយោគិន ជាពិសេស វិនិយោគបរទេសដែលចូលមកបណ្ដាក់ទុនវិនិយោគនៅកម្ពុជា។
សមាគមបានលើកឡើងថា បើសិនជាអ្នកប្រកបដអាជីវកម្មផ្ដល់សេវាកម្មអចលនវត្ថុនៅកម្ពុជាភាគច្រើនអត់មានច្បាប់ទម្លាប់ អត់មានអាជ្ញាបណ្ណ ហើយផ្ដល់សេវាដល់អតិថិជន វិនិយោគិន និងនៅពេលអតិថិជនមានបញ្ហា តើគួរដោះស្រាយយ៉ាងណា? បើសិនជាករណីនេះ ចេះតែកើតឡើងញឹកញាប់នោះ នឹងធ្វើឱ្យវិនិយោគិនទាំងក្នុង និងក្រៅប្រទេសនឹងបាត់ទំនុកចិត្តលែងជឿជាក់លើអ្នកផ្ដល់សេវាអចលនវត្ថុនៅកម្ពុជា ។
លោកឧកញ៉ា សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ថា ការធ្វើអាជីវកម្មផ្ដល់សេវាអចលនវត្ថុមិនមានអាជ្ញាបណ្ណ ឬមិនមានវិញ្ញាបនបត្របញ្ជាក់ត្រឹមត្រូវពីអាជ្ញាធរ គឺជាការធ្វើអាជីវកម្មដែលមិនស្មើភាពគ្នា ហើយវានឹងធ្វើឱ្យបាត់បង់ចំណូលរដ្ឋមួយចំណែកផងដែរ ព្រោះថាអ្នកដែលមានអាជ្ញាបណ្ណ ឬវិញ្ញាបនបត្រត្រឹមត្រូវ គេត្រូវបង់ពន្ធជូនរដ្ឋទៅតាមច្បាប់ ៕
Account
Security
Favourite Content