សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ របាយការណ៍សម្ងាត់របស់ទីភ្នាក់ងារស៊ើបការណ៍សម្ងាត់ការពារជាតិអាម៉េរិក និងរូបភាពផ្កាយរណបដែលត្រូវបានបង្ហាញនាពេលថ្មីៗនេះ បានបង្កើនការព្រួយបារម្ភអំពីការពង្រីកកងនាវាស៊ីវិលរបស់ចិន និងលទ្ធភាពដែលនាវាទាំងនេះអាចត្រូវបានប្រើប្រាស់សម្រាប់ប្រតិបត្តិការយោធា ក្នុងករណីមានជម្លោះជុំវិញកោះតៃវ៉ាន់។
យោងតាមសារព័ត៌មាន SlashGear ដែលបានចុះផ្សាយកាលពីចុងខែមីនា អ្នកជំនាញបានលើកឡើងពីលទ្ធភាពដែលនាវាពាណិជ្ជកម្មខ្នាតធំរបស់ចិន អាចត្រូវបានប្រែក្លាយឱ្យមានមុខងារយោធាក្នុងរយៈពេលខ្លី ដើម្បីគាំទ្រផែនការប្រតិបត្តិការយោធានាពេលអនាគត។
តាមតួលេខដែលសារព័ត៌មានអូស្ត្រាលី ABC ធ្លាប់បានចុះផ្សាយ របាយការណ៍សម្ងាត់ដែលត្រូវបានទម្លាយឱ្យដឹងបានបង្ហាញថា ចិនកំពុងឈានទៅរកការសាងសង់នាវាចម្លងប្រភេទ Roll-on/Roll-off (Ro-Ro) ខ្នាតធំជាង ៧០ គ្រឿង នៅត្រឹមដំណាច់ឆ្នាំ ២០២៦។ នាវាប្រភេទនេះត្រូវបានរចនាឡើងសម្រាប់ដឹកជញ្ជូនយានយន្ត និងទំនិញ ដោយអាចឱ្យយានយន្តបើកចេញចូលតាមផ្លូវជម្រាលបាន។
ទោះបីជានាវាទាំងនេះមានគោលបំណងប្រើប្រាស់ក្នុងវិស័យស៊ីវិលក៏ដោយ ក៏ប្រភពបានលើកឡើងថា នាវាមួយចំនួនត្រូវបានសាងសង់តាមលក្ខណៈបច្ចេកទេសដែលអាចគាំទ្រការប្រើប្រាស់ផ្នែកយោធា រួមទាំងសំណង់តួនាវារឹងមាំដែលអាចផ្ទុកយានយោធាធុនធ្ងន់បាន។
ក្តីបារម្ភរបស់ទីក្រុងវ៉ាស៊ីនតោន គឺលទ្ធភាពដែលទីក្រុងប៉េកាំងអាចប្រើប្រាស់នាវាទាំងនេះសម្រាប់គោលបំណងពីរគឺ ពាណិជ្ជកម្ម និងយោធា។ ការវាយតម្លៃដែលត្រូវបានរាយការណ៍ក៏បង្ហាញថា នាវាស៊ីវិលអាចត្រូវបានដាក់បញ្ចូលក្នុងសមយុទ្ធរបស់កងទ័ពរំដោះប្រជាជនចិន (PLA) ដើម្បីបង្កើនសមត្ថភាពដឹកជញ្ជូនកងទ័ព និងសម្ភារយោធា។
កាលពីឆ្នាំ ២០២១ សាឡាងពាណិជ្ជកម្មរាប់សិបគ្រឿងត្រូវបានគេសង្កេតឃើញចូលរួមក្នុងសមយុទ្ធពាក់ព័ន្ធនឹងការដាក់ពង្រាយកងទ័ពជើងទឹកឡើងគោក ដែលជាឧទាហរណ៍មួយនៃការប្រើប្រាស់នាវាស៊ីវិលក្នុងសកម្មភាពហ្វឹកហ្វឺនយោធា។
ក្រៅពីនាវាចម្លង Ro-Ro អ្នកវិភាគក៏បានកត់សម្គាល់ឃើញនាវាធំៗពិសេសមួយចំនួន ដែលមានស្ពានដែកវែងអាចដាក់ពង្រាយបានភ្លាមៗ និងមានប្រវែងរហូតដល់ ១២០ ម៉ែត្រ។ ឧបករណ៍ទាំងនេះអាចដើរតួជាផែចល័ត ដោយជួយឱ្យនាវាចម្លងអាចដឹកជញ្ជូនរថក្រោះ និងកងទ័ពថ្មើរជើងចុះទៅកាន់ឆ្នេរ ឬតំបន់មាត់សមុទ្រ ដោយមិនចាំបាច់ពឹងផ្អែកទាំងស្រុងលើកំពង់ផែដែលមានស្រាប់នោះទេ។
អ្នកជំនាញយោធាមើលឃើញថា ការប្រើប្រាស់នាវាស៊ីវិលអាចជួយបង្កើនសមត្ថភាពភស្តុភារយោធារបស់ចិនយ៉ាងច្រើន ជាពិសេសសម្រាប់ការដឹកជញ្ជូនកងទ័ព និងសម្ភារឆ្លងកាត់ច្រកសមុទ្រតៃវ៉ាន់។ ទោះជាយ៉ាងណា លទ្ធភាពនៃការប្រើប្រាស់នាវាទាំងនេះក្នុងប្រតិបត្តិការយោធានៅតែជាការវាយតម្លៃ និងក្តីបារម្ភដែលត្រូវបានលើកឡើងក្នុងរបាយការណ៍។
ការអភិវឌ្ឍនេះកើតឡើងក្នុងពេលដែលចិនបានពង្រីកឧស្សាហកម្មសាងសង់នាវារបស់ខ្លួនយ៉ាងខ្លាំងក្នុងរយៈពេល ២៥ ឆ្នាំចុងក្រោយនេះ។ ប្រភពបានលើកឡើងថា ចិនបច្ចុប្បន្នមានចំណែកសាងសង់នាវាច្រើនជាងពាក់កណ្តាលនៃចំនួនសាងសង់នាវាសរុបនៅលើពិភពលោក។
សមត្ថភាពផលិតនាវាដឹកទំនិញខ្នាតធំក៏បានគាំទ្រដល់ការដឹកជញ្ជូនរថយន្តរបស់ចិនទៅកាន់ទីផ្សារអន្តរជាតិផងដែរ ដោយនាវាទំនើបមួយចំនួនអាចផ្ទុករថយន្តបានជាង ១០.០០០ គ្រឿងក្នុងមួយជើង។ ការរីកចម្រើននៃឧស្សាហកម្មនេះត្រូវបានលើកឡើងថា ជាផ្នែកមួយនៃមូលដ្ឋានឧស្សាហកម្មដែលគាំទ្រដល់ការពង្រីកការផលិត និងការនាំចេញរថយន្តអគ្គិសនីរបស់ចិនផងដែរ៕
Account
Security
Favourite Content