សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សមាគម អ្នកវិនិយោគ អ្នកសាងសង់ និងស្ថាបត្យករ កម្ពុជា (ស.វ.ស.ស.ក) បានរៀបចំសិក្ខាសាលាស្តីពី «តួនាទីទីប្រឹក្សាគម្រោង និងអាជីពវិស្វករក្នុងវិស័យសំណង់នៅកម្ពុជា» ក្រោមអធិបតីភាព ឯកឧត្តម ហង្ស សុតសំភារ អនុរដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ និងជាអគ្គលេខាធិការ គណៈស្ថាបត្យករកម្ពុជា នាព្រឹកថ្ងៃទី២៩ ខែកញ្ញា ឆ្នាំ២០២៣ នាសាលប្រជុំ នៃទីស្តីការក្រសួងរៀបចំដែនដី នគរូបនីយកម្ម និងសំណង់។ កម្មវិធីនេះក៏មានការអញ្ជើញចូលរួមពីថ្នាក់ដឹកនាំ គណៈស្ថាបត្យករកម្ពុជា គណៈវិស្វករកម្ពុជា ថ្នាក់ដឹកនាំ សមាជិកសមាជិកា សមាគម ស.វ.ស.ស.ក និងភ្ញៀវកិត្តិយសពីសំណាក់សាកលវិទ្យាល័យ និងក្រុមហ៊ុនឯកជនក្នុងវិស័យស្ថាបត្យកម្ម និងសំណង់ រួមជាមួយនិស្សិតផ្នែកស្ថាបត្យកម្ម វិស្វកម្មសំណង់ស៊ីវិល វិស្វកម្មអគ្គិសនី និងទឹក សរុបចំនួន ៣០០នាក់ ។
លោក សេង ប៊ុនវីរៈ ប្រធានសមាគម ស.វ.ស.ស.ក បានថ្លែងស្វាគមន៍ក្នុងកម្មវិធីដោយបានកោតសរសើរដល់ក្រុមការងាររៀបចំកម្មវិធីចំពោះកិច្ចខិតខំប្រឹងប្រែង និងបានថ្លែងអំណរគុណដល់ឯកឧត្តមគណៈអធិបតី ឯកឧត្តម លោកជំទាវ ជាវាគ្មិន សាស្ត្រាចារ្យ និងវិស្វករអាជីព ដែលបានចំណាយពេលវេលាដ៏មានតម្លៃក្នុងការធ្វើជាគ្រូឧទ្ទេស និងវាគ្មិន។ លើសពីនេះទៀតសោត លោកបានលើកទឹកចិត្តដល់និស្សិតយកចិត្តទុកក្រេបយកចំណេះដឹង និងបទពិសោធន៍ល្អៗពីឯកឧត្តមគណៈអធិបតី គ្រូឧទ្ទេស និងវាគ្មិនផងដែរ។
ឯកឧត្តម ហង្ស សុតសំភារ អនុរដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ និងជាអគ្គលេខាធិការ គណៈស្ថាបត្យករកម្ពុជា បានថ្លែងសុន្ទរកថាគន្លឹះដោយបានបង្ហាញពីភាពរីកចម្រើនក្នុងវិស័យសំណង់នៅកម្ពុជា ទំនើបកម្មស្ថាប័ន និងលើកទឹកចិត្តនិស្សិតដែលបានចូលរួមសិក្ខាសាលាយកចិត្តទុកដាក់ និងកត់ត្រាចំនុចសំខាន់ៗពីបទបង្ហាញរបស់គ្រូឧទ្ទេស ក៏ដូចជាវាគ្មិន និងបានកោតសរសើរចំពោះសមាគម ស.វ.ស.ស.ក ដែលបានរៀបចំកម្មវិធីសិក្ខាសាលាដ៏មានសារប្រយោជន៍នេះឡើង ក្នុងការផ្តល់ចំណេះដឹង និងបទពិសោធន៍ល្អៗជាក់ស្តែងជូនដល់ក្មួយៗនិស្សិត។ ក្នុងឱកាសជាមួយគ្នានេះ ឯកឧត្តមគណៈអធិបតីក៏បានប្រកាសបើកសិក្ខាសាលាជាផ្លូវការផងដែរ។
សូមជម្រាបថា សិក្ខាសាលានេះបានផ្តល់ជា២វគ្គ ដោយវគ្គទី១ ធ្វើបទបង្ហាញដោយ លោក ឡាយ ហ្សានឹត អគ្គនាយក ក្រុមហ៊ុន ស្លេបឆេក ខនសាល់ធេន ឯ.ក លើប្រធានបទ «តើអ្វីជាការប្រឹក្សាយោបល់ផ្នែកគ្រប់គ្រងគម្រោង(PMC) តួនាទី និងសារសំខាន់អ្វីខ្លះក្នុងវិស័យសាងសង់ក្នុងប្រទេសកម្ពុជា» និងបទបង្ហាញដោយ លោក ប៉ុល លីកាតូ អគ្គនាយក ក្រុមហ៊ុន កាតូ អ៊ី ស៊ី (ខេមបូឌា) ឯ.ក លើប្រធានបទ «ដំណើរការនៃការសាងសង់គ្រឿងបង្គុំអំពីដែក»
វគ្គទី២: វេទិកាពិភាក្សាលើប្រធានបទ «អាជីពវិស្វករក្នុងវិស័យសំណង់នៅកម្ពុជា» ដោយមានលោកបណ្ឌិតវិស្វកម្ម ឃី គឹមឡេង ជាអ្នកសម្របសម្រួល និងវាគ្មិន ដោយលោក លាង វាសនា អគ្គនាយកក្រុមហ៊ុន V2 Build D.E.C លោក ប្រុស ពិសិដ្ឋ នាយកក្រុមហ៊ុន ESD MEP Consultant Service លោក ឡាយ ហ្សានឹត និងលោក ប៉ុល លីកាតូ។
សិក្ខាសាលានេះធ្វើឡើងក្នុងគោលបំណងសំខាន់ៗដូចខាងក្រោម ៖
១- លើកកម្ពស់ និងចែករំលែកចំណេះដឹង បទពិសោធន៍ ដល់និស្សិត ស្ថាបត្យករ និងវិស្វករវ័យក្មេងលើជំនាញជាទីប្រឹក្សាគ្រប់គ្រងគម្រោងសំណង់ ដែលមានស្តង់ដាស្របតាមស្តង់ដាប្រទេសសិង្ហបុរី និងកម្ពុជា និងអាជីពជាវិស្វករ។
២- លើកកម្ពស់ការចូលរួមរបស់ស្ថាបត្យករ និងវិស្វករវ័យក្មេង ដើម្បីចូលរួមយ៉ាងសកម្មក្នុងដំណើរការអភិវឌ្ឍវិស័យសំណង់ និងស្ថាបត្យកម្មនៅកម្ពុជា។
៣- ផ្សារភ្ជាប់ទំនាក់ទំនងរវាងវិស្វករ ស្ថាបត្យកជើងចាស់ ជាមួយវិស្វករ ស្ថាបត្យករវ័យក្មេង ដើម្បីបន្តចែករំលែកចំណេះដឹង បទពិសោធន៍ និងឱកាសការងារក្នុងវិស័យសំណង់ និងស្ថាបត្យកម្មនៅកម្ពុជា។ នៅចុងបញ្ចប់នៃសិក្ខាសាលា ក៏មានការប្រគល់លិខិតសរសើរ និងថតរូបជាក្រុមជាមួយប្អូនៗនិស្សិតទាំងអស់ជាអនុស្សាវរីយ៍ផងដែរ។
Account
Security
Favourite Content