សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងគោលបំណងជំរុញកំណើនសេដ្ឋកិច្ចជាតិ និងដើម្បីសម្រេចឱ្យបាននូវចក្ខុវិស័យរាជរដ្ឋាភិបាលឆ្នាំ២០៣០ និងឆ្នាំ២០៥០ រាជរដ្ឋាភិបាលកម្ពុជាបានបង្ហាញផែនការអភិវឌ្ឍន៍គម្រោងក្នុងវិស័យហេដ្ឋារចនាសម្ព័ន្ធចំនួន១៧៥គម្រោង និងត្រូវការថវិកាប្រមាណ ៣៦,៦៧ពាន់លានដុល្លារអាម៉េរិក ដោយបែងចែកទៅតាមគម្រោងផ្សេងៗគ្នា ។ ដោយឡែក សម្រាប់គម្រោងផ្លូវដឹកជញ្ជូនតាមសមុទ្រ គិតត្រឹមឆ្នាំ២០២៧ កម្ពុជាត្រូវការវិកាប្រមាណ ២,៥ពាន់លានដុល្លារអាម៉េរិក សម្រាប់អភិវឌ្ឍន៍លើគម្រោងចំនួន១៤គម្រោង និងសរុបប្រមាណ ៥,៤៦ពាន់លានដុល្លារអាម៉េរិកសម្រាប់អភិវឌ្ឍន៍លើគម្រោងចំនួន២០ គិតត្រឹមឆ្នាំ ២០៣៣ ។ នេះបើតាមរបាយការណ៍របស់ក្រសួងសាធារណការ និងដឹកជញ្ជូន ចេញផ្សាយសម្រាប់ឆមាសទី១ឆ្នាំ ២០២៥ ។
យោងតាមក្រសួងសាធារណការ និងដឹកជញ្ជូន បានឱ្យដឹងថា ដើម្បីសម្រេចឱ្យបានតាមចក្ខុវិស័យ មាគ៌ានយោបាយ និងយុទ្ធសាស្ត្របញ្ចកោណរបស់រាជរដ្ឋាភីបាលអាណត្តិទី៧នេះ តាមរយៈផែនការមេគ្រប់ជ្រុងជ្រោយ ក្រសួងសាធារណការ និងដឹកជញ្ជូនក៏បានដាក់ចេញនូវគម្រោងដឹកជញ្ចូនតាមផ្លូវសមុទ្រចំនួន២០គម្រោង ដែលគ្រោងទឹកប្រាក់វិនិយោគសរុបចំនួន ៥ ៤៦១លានដុល្លារអាម៉េរិក ក្នុងនោះគម្រោងរយៈពេលខ្លី និងមធ្យម ត្រឹមឆ្នាំ ២០២៧ មានចំនួន១៤គម្រោង ស្មើនឹងទឹកប្រាក់ ២ ៤៩៤លានដុល្លារអាម៉េរិក និងគម្រោងរយៈពេលវែង ចាប់ពីឆ្នាំ ២០២៨ ដល់ឆ្នាំ ២០៣៣ មានចំនួន៩គម្រោង ស្មើនឹងទឹកប្រាក់ចំនួន ២ ៩៦៧លានដុល្លារអាម៉េរិក ។
បើតាមរបាយការណ៍ដដែលបានបញ្ជាក់ថា ក្នុងចំណោមគម្រោងរយៈពេលខ្លី និងមធ្យមទាំង១៤គម្រោងមានគម្រោងចំនួន១ បានបញ្ចប់រួចរាល់ហើយ ហើយគម្រោងចំនួន១ បាននិងកំពុងអនុវត្ត ។ ដោយឡែកគម្រោងចំនួន១២ផ្សេងទៀត នៅពុំទាន់បានចាប់ផ្ដើមអនុវត្តនៅឡើយ ដោយសារពុំទាន់មានប្រភពថវិកា និងកំពុងស្វែងរកដៃគូអភិវឌ្ឍ ។
គួរបញ្ជាក់ថា ឈ្មោះគម្រោងមួយចំនួនត្រូវបានប្តូរឈ្មោះអាស្រ័យទៅតាមឈ្មោះផ្លូវការរបស់កំពង់ផែ រួមមានដូចជា ១. កំពង់ផែកោះកុងថ្មី ប្តូរទៅជា កំពង់ផែដងទង់ ២. កំពង់ផែក្រុមហ៊ុន Union Development ប្តូរទៅជាកំពង់ផែកោះកុងផតមេនិកមេន ៣. កំពង់ផែអន្តរជាតិកំពត ប្តូរទៅជាកំពង់ផែពហុបំណងកំពត ៤. កំពង់ផែប្រេងឥន្ធនៈ ប៉ាប៉ាភេត្រូលៀម ប្តូរទៅជាកំពង់ផែ ផៅវើឃ្លីន និង៥ . កំពង់ផែស្ទឹងហាវ ប្តូរទៅជាកំពង់ផែ ATTWOOD វិញ ។
ទន្ទឹមគ្នានឹងការអនុវត្តគម្រោងដឹកជញញចូនផ្លូវសមុទ្រនេះដែរ រាជរដ្ឋាភិបាលក៏បានបង្កើតក្រុមការងារជំរុញការវិនិយោគខេត្តព្រះសីហនុ ក៏ដូចជាគម្រោងប្លង់មេទាក់ទាញការវិនិយោគខេត្តជាប់ឆ្នេរសមុទ្រកម្ពុជា ។ក្នុងនោះខេត្តព្រះសីហនុ ជាខេត្តជាប់ឆ្នេរសមុទ្រដែលមានភាពទាក់ទាញការវិនិយោគច្រើនជាងគេ ដោយសារក្នុងខេត្តនេះ មានតំបន់សេដ្ឋកិច្ចពិសេស មានកំពង់ផែទឹកជ្រៅ និងមានផ្លូវល្បឿនលឿន ហើយរាជរដ្ឋាភិបាលក៏បានបណ្ដាក់ទុនសាងសង់ផ្លូវជាច្រើនខ្សែក្នុងខេត្តនេះដើម្បីសម្រួលដល់ការវិនិយោគនិងទេសចរណ៍ ។
ឯកឧត្តម ជា កុកហុង ប្រធានលេខាធិការដ្ឋានផែនការមេខេត្តជាប់ឆ្នេរសមុទ្របានលើកឡើងថា នៅតាមតំបន់ឆ្នេរជាពិសេសនៅខេត្តព្រះសីហនុ ក្រុមការងារមានផែនការអភិវឌ្ឍន៍តំបន់ឆ្នេរដោយបែងចែកដីទៅតាមសក្ដានុពលដូចជាតំបន់ឧស្សាហកម្ម តំបន់ភស្តុភារកម្ម តំបន់ឡូជីស្ទីក តំបន់ទេសចរណ៍ និងពាណិជ្ជកម្មជាងដើម ។ ការបែងចែកបែបនេះនឹងធ្វើឱ្យវិនិយោគិនកាន់តែងាយស្រួលក្នុងការស្វែងរកទីតាំងវិនិយោគទៅតាមគម្រោងរបស់ពួកគាត់ ៕
Account
Security
Favourite Content