សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ វិធីសាស្ត្រក្នុងការសន្សំមានច្រើនប្រភេទដែលបត់បែនទៅតាមស្ថានភាពជាក់ស្ដែងនៃប្រាក់ចំណូល និងការចំណាយចាំបាច់របស់បុគ្គលម្នាក់ៗ។ យ៉ាងណាមិញ មូលដ្ឋានគ្រឹះនៃការសន្សំគឺមិនសូវជាខុសគ្នាប៉ុន្មាននោះទេ ដូច្នេះសូមទាញអារម្មណ៍អ្នកអានទាំងអស់គ្នាទៅស្វែងយល់នូវបទពិសោធន៍ជាក់ស្ដែងរបស់បុគ្គលិកក្រុមហ៊ុនម្នាក់ដែលតែងអនុវត្តជាប្រចាំ។
លោក ហ៊ន់ សីហា គឺជាមន្ត្រីឯកទេសវិភាគអាជីវកម្មរបស់ក្រុមហ៊ុនឯកជនមួយកន្លែងដែលធ្លាប់ជួបប្រទះបញ្ហាលុយកាក់ដោយសារតែមិនមានផែនការគ្រប់គ្រងចំណាយ-ចំណូលបានល្អ។ យ៉ាងណាក៏ដោយ បើទោះបីជាបានកំណត់នូវចំនួនទឹកប្រាក់ដែលត្រូវចាយប្រចាំខែយ៉ាងណាក្ដី ក៏លោកនៅតែចាយលើសខ្ទង់ ហើយឈានទៅដល់ការខ្ចីប្រាក់ពីមិត្តភ័ក្ដិទៀតផង។
បុរសសម្បុរសណ្ដែកបាយរូបនេះបានរៀបរាប់យ៉ាងដូច្នេះថា៖
«ខ្ញុំក៏មានផែនការចំណាយប្រចាំខែដែរ ដែលយើងកំណត់ថា យើងមានលុយប៉ុន្មានសម្រាប់ចាយលើម្ហូបប្រចាំថ្ងៃ តែដល់ពេលចាយជាក់ស្ដែងគឺចាយលើស អត់ត្រូវតាមអ្វីដែលយើងបានកំណត់ទុក»។
លោក សីហា បានបន្តទៀតថា ចំណាយភាគច្រើនរបស់លោកគឺទាក់ទងនឹងតម្រូវការប្រចាំថ្ងៃ ដូចជា ម្ហូបអាហារ សម្ភារៈប្រើប្រាស់ផ្សេងៗ និងមធ្យោបាយធ្វើដំណើរ ដែលជាតម្រូវការមូលដ្ឋានដូចមនុស្សគ្រប់គ្នាដែរ។ រីឯមូលហេតុដែលលោកចាយលើសផែនការនោះក៏ដោយសារតែលោកមិនបានកត់ចំណាំចំនួនទឹកប្រាក់ជាក់លាក់នៅក្នុងការចាយវាយ។
ជាក់ស្ដែង លោកមិនបានដឹងទេថា ជារៀងរាល់ខែ ខ្លួនបានចំណាយលើការធ្វើដំណើរអស់ប៉ុន្មាន ចំណាយលើម្ហូបអាហារប្រចាំថ្ងៃប៉ុន្មាន ហើយចំណាយលើកម្មវិធីជាមួយមិត្តភ័ក្ដិអស់ប៉ុន្មាននោះទេ។ ពោលគឺលោកបានត្រឹមកំណត់លេខមូល ដែលជាក់ស្ដែងទៅវាមិនមានប្រសិទ្ធភាពឡើយ។
បន្ទាប់ពីជួបប្រទះបញ្ហាខ្វះខាតលុយសម្រាប់ចាយវាយជាច្រើនខែ លោក សីហា បានព្យាយាមស្វែងយល់ពីមូលដ្ឋានគ្រឹះនៃចំណេះដឹងហិរញ្ញវត្ថុតាមអ៊ីនធឺណិត និងបានស្ដាប់អ្នកជំនាញពន្យល់ពីរបៀបគ្រប់គ្រងលើការចាយវាយឱ្យបានល្អប្រសើរ។ បន្ទាប់មក លោកបានសាកល្បងកត់ដោយលម្អិតនូវចំណូល-ចំណាយប្រចាំថ្ងៃរបស់ខ្លួន។
លោកបញ្ជាក់ថា ៖
ពេលនោះខ្ញុំបានចាប់ផ្ដើមកត់អ្វីដែលខ្ញុំចំណាយក្នុងមួយថ្ងៃៗ បន្ទាប់មក មួយខែម្ដង ខ្ញុំយកមកមើលថាតើមានអ្វីដែលយើងគិតថាវាអត់ចាំបាច់ចំណាយ ត្រូវដកវាចេញ ឬក៏កាត់បន្ថយវាបានអត់? បន្ទាប់ពីរកការចំណាយពិតប្រាកដឃើញហើយ ខ្ញុំក៏អាចរៀបចំផែនការត្រូវដែរ។
ការរៀបចំផែនការចំណូល-ចំណាយបានត្រឹមត្រូវ មិនត្រឹមតែជួយលោកមិនឱ្យខ្វះខាតលុយកាក់ចុងខែនោះទេ ប៉ុន្តែក៏បានជួយឱ្យលោកសល់មួយចំណែកសម្រាប់សន្សំទៀតផង។
ទាក់ទិននឹងការសន្សំនេះទៀតសោត លោក ហ៊ន់ សីហា បានរៀបរាប់ថា លោកបានផ្លាស់ប្ដូរពីរបៀបសន្សំដោយរក្សាប្រាក់ទុកខ្លួនឯង ទៅជារបៀបសន្សំដែលផ្ញើនៅធនាគារ។ សម្រាប់លោកផ្ទាល់ ការសន្សំនៅធនាគារគឺពិតជាមានប្រសិទ្ធភាព សុវត្ថិភាព ជាពិសេសជួយឱ្យទប់ស្កាត់ការចំណាយមិនឱ្យលើសបន្ទាត់ក្រហមដូចគ្រាដែលសន្សំទុកដាក់នៅជាប់ខ្លួន ដែលអាចអនុញ្ញាតឱ្យដកចាយវាយបានតាមចិត្តទៀតនោះទេ។ លោកថា ការសន្សំមានប្រសិទ្ធភាព គឺសន្សំជាមួយធនាគារ ដែលជាការកំណត់សន្សំមុនចំណាយ មិនមែនសល់ពីការចាយទើបសន្សំនោះទេ៕
Account
Security
Favourite Content