សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កម្មវិធីពន្លឿនអាជីវកម្មកសិកម្មឌីជីថលរដូវកាលទី ២ ក្នុងគម្រោងគាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារកសិករ និងពាណិជ្ជូបណីយកម្មកសិកម្ម (SAAMBAT) ត្រូវបានប្រកាសផ្សព្វផ្សាយ និងដាក់ឱ្យដំណើរការជាផ្លូវការហើយ។
នារសៀលថ្ងៃទី២៤ ខែតុលា ឆ្នាំ២០២៣ អនុសមាសភាគទី២.២ នៃគម្រោង SAAMBAT បានរៀបចំសិក្ខាសាលាផ្សព្វផ្សាយ និងដាក់ដំណើរការជាផ្លូវការនូវកម្មវិធីពន្លឿនអាជីវកម្មកសិកម្មឌីជីថលរដូវកាលទី ២ ដែលកម្មវិធីនេះត្រូវបានរៀបចំឡើងនៅការិយាល័យកណ្តាលរបស់មជ្ឈមណ្ឌលបណ្តុះធុរកិច្ចថ្មី ”តេជោ” ក្រោមអធិបតីភាពដ៏ខ្ពង់ខ្ពស់របស់ឯកឧត្តមបណ្ឌិត តាំង ងួនលី នាយកប្រតិបត្តិនៃមជ្ឈមណ្ឌលបណ្តុះធុរកិច្ចថ្មី “តេជោ” ។
សិក្ខាសាលានេះ ត្រូវបានរៀបចំឡើងក្នុងគោលបំណងដើម្បីផ្សព្វផ្សាយ និងដាក់ឱ្យដំណើរការជាផ្លូវការកម្មវិធីពន្លឿនអាជីវកម្មកសិកម្មឌីជីថលរដូវកាលទី ២ ដល់ធុរជន សាធារណជន និង ដៃគូពាក់ព័ន្ធនានាដែលធ្វើការក្នុងវិស័យកសិកម្ម, កសិ-ពាណិជ្ជកម្ម, ធុរកិច្ចថ្មី, ឬថ្នាលឌីជីថលដែលមានស្រាប់ ប៉ុន្តែនៅខ្វះខាតការគាំទ្រ ទាំងធនធាន និងបច្ចេកទេស អាចមានសិទ្ធិក្នុងការស្នើសុំមូលនិធិពន្លឿនអាជីវកម្មកសិកម្មឌីជីថល ដើម្បីស្វែងរកនវានុវត្តន៍ថ្មីៗបន្ថែមទៀត ។
កម្មវិធីពន្លឿនអាជីវកម្មកសិកម្មឌីជីថល ដើរស្របទៅនឹង “យុទ្ធសាស្ត្របញ្ចកោណ ដំណាក់កាលទីមួយ” ដើម្បីកំណើនការងារ សមធម៌ ប្រសិទ្ធភាព និងចីរភាព ដែលទើបត្រូវបានប្រកាសឱ្យអនុវត្តជាផ្លូវការកាលពីថ្មីៗនេះដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ។
នៅក្នុងបញ្ចកោណទី ៥ រាជរដ្ឋាភិបាលកម្ពុជាបានផ្តោតចំបងលើ “ការអភិវឌ្ឍសេដ្ឋកិច្ច និងសង្គមឌីជីថល” ដែលរួមមានកិច្ចការអាទិភាពចំនួន ៥ ដោយក្នុងនោះមុំទី២ គឺ ផ្តោតលើការអភិវឌ្ឍសេដ្ឋកិច្ច និងធុរកិច្ចឌីជីថល, ពាណិជ្ជកម្មតាមប្រព័ន្ធអេឡិចត្រូនិក និងប្រព័ន្ធនវានុវត្តន៍ឌីជីថល តាមរយៈការជំរុញការធ្វើបរិវត្តកម្មឌីជីថលក្នុងវិស័យសេដ្ឋកិច្ច, ការបង្កើតធុរកិច្ចឌីជីថលថ្មី, ការជំរុញការធ្វើបរិវត្តកម្មឌីជីថលសហគ្រាស, ការជំរុញ និងការអភិវឌ្ឍខ្សែច្រវាក់ឌីជីថល និង ការជំរុញការកសាង និងការអភិវឌ្ឍប្រព័ន្ធនវានុវត្តន៍ឌីជីថលដើម្បីសម្រួលធុរកិច្ច និង ជំរុញសន្ទុះកំណើនសេដ្ឋកិច្ច ។
តំណាងមកពីដៃគូពាក់ព័ន្ធសំខាន់ៗរបស់គម្រោងដែលទទួលបានហិរញ្ញប្បទានពី IFAD ក៏ដូចជាធុរកិច្ចកសិកម្ម, កសិ-ពាណិជ្ជកម្ម, ក្រុមហ៊ុនដឹកជញ្ជូន, និង ស្ថាប័នហិរញ្ញវត្ថុនានា ដែលបាននិងកំពុងប្រើប្រាស់បច្ចេកវិទ្យាឌីជីថលដើម្បីដោះស្រាយបញ្ហាប្រឈមក្នុងវិស័យកសិកម្ម និង វិស័យផ្សេងៗទៀតក្នុងក្របខណ្ឌសេដ្ឋកិច្ចឌីជីថល ត្រូវបានអញ្ជើញមកចូលរួមក្នុងអង្គសិក្ខាសាលានេះ។
ជាលទ្ធផល អ្នកចូលរួមមិនត្រឹមតែបានចូលរួមជជែកវែកញែកប្រកបដោយផ្លែផ្កាប៉ុណ្ណោះទេ ថែមទាំងទទួលបានព័ត៌មាន ស្តីពីវិធីនៃការដាក់ពាក្យចូលរួមក្នុងកម្មវិធីពន្លឿនអាជីវកម្មកសិកម្មឌីជីថល ដើម្បីទទួលបានរង្វាន់ជ័យលាភីយកទៅធ្វើអាជីវកម្ម រួមទាំងជ្រួតជ្រាបកាន់តែច្បាស់ អំពីអត្ថប្រយោជន៍នៃដំណើរការនៃការធ្វើនវានុវត្តន៍បច្ចេកវិទ្យា ដែលមានសារៈសំខាន់ក្នុងការកាត់បន្ថយភាពក្រីក្រដោយផ្តល់នូវឱកាសសេដ្ឋកិច្ចដល់ប្រជាជននៅទីជនបទ ។
Account
Security
Favourite Content