សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ វិស័យអាកាសចរណ៍កម្ពុជាកាន់តែឈានឡើងមួយកម្រិតទៀត ដោយក្នុងរយៈតែប៉ុន្មានឆ្នាំប៉ុណ្ណោះ កម្ពុជាសម្រេចបើកដំណើរការអាកាសយានដ្ឋានអន្តរជាតិថ្មីៗជាបន្តបន្ទាប់ ជាក់ស្ដែងអាកាសយានដ្ឋានអន្តរជាតិសៀមរាបអង្គរបានបើកដំណើរការកាលពីឆ្នាំ២០២៣ ហើយនៅចុងឆ្នាំ២០២៤នេះ និងឆ្នាំ២០២៥ ខាងមុខ កម្ពុជាក៏ត្រៀមបើកដំណើរការអាកាសយានដ្ឋានអន្តរជាតិចំនួន ២ បន្ថែមទៀត គឺអាកាសយានដ្ឋានអន្តរជាតិតេជោ ក្រុងតាខ្មៅ និងអាកាសយានដ្ឋានអន្តរជាតិ តារាសាគរ នៅខេត្តកោះកុង ។
អាកាសយានដ្ឋានអន្តរជាតិតេជោ ក្រុងតាខ្មៅ ដែលមានទុនសរុបជាង១,៥ពាន់លានដុល្លារអាមេរិក បានធ្វើការហោះហើរសាកល្បង រួមជាមួយនឹងការធ្វើតេស្តឧបករណ៍នៅក្នុងអាកាសយានដ្ឋានកាលពីថ្ងៃទី៨ ដល់ថ្ងៃទី១២ ខែកញ្ញា ឆ្នាំ២០២៤ កន្លងទៅប្រកបដោយភាពជោគជ័យ ។ អាកាសយានដ្ឋានអន្តរជាតិនេះគ្រោងនឹងបើកដំណើរការជាផ្លូវការនៅដំណាក់កាលទី១ នាអំឡុងពាក់កណ្ដាលឆ្នាំ២០២៥ខាងមុខ ខណៈដែលបច្ចុប្បន្ននេះ គម្រោងសាងសង់អាកាសយានដ្ឋានអន្តរជាតិមួយនេះក៏សម្រេចបាននូវវឌ្ឍនភាពជាង៨០ភាគរយហើយ និងរំពឹងថា វឌ្ឍនភាពនៃការសាងសង់នឹងសម្រេចបានទាំងស្រុងស្របតាមផែនការដូចដែលបានគ្រោងទុក ។
គិតត្រឹមដើមខែកញ្ញា ឆ្នាំ ២០២៤ អាកាសយានដ្ឋានអន្តរជាតិតេជោ បានចំណាយថវិកាអស់ប្រមាណ១២០០លានដុល្លារអាមេរិកហើយ ដោយប្រើប្រាស់កម្លាំង បុគ្គលិកកម្មករ សរុបជាង១ម៉ឺន៥ពាន់នាក់ ក្នុងការងារនានាក្នុងការសាងសង់អាកាសយានដ្ឋានអន្តរជាតិធំមួយនេះ ។
ដោយឡែកក្រលេកទៅមើលអាកាសយានដ្ឋានអន្តរជាតិតារាសាគរនាខេត្តកោះកុង ឯណោះវិញ ក៏បាន និងកំពុងធ្វើតេស្តហោះហើរសាកល្បង ដើម្បីត្រួតពិនិត្យឧបករណ៍ រយៈពេល២ថ្ងៃដែរ គឺនៅថ្ងៃទី២៩ និង៣០ ខែកញ្ញា ឆ្នាំ២០២៤ ដើម្បីត្រៀមបើកដំណើរការហោះហើរយន្តហោះប្រភេទស្រាល ខ្នាតតូចនៅក្នុងស្រុកនៅចុងខែវិច្ឆិកា ឆ្នាំ២០២៤ខាងមុខនេះដែរ ។
បើតាមសេចក្ដីប្រកាសព័ត៌មានរបស់រដ្ឋលេខាធិការដ្ឋានអាកាសចរណ៍ស៊ីវិល នៅថ្ងៃទី២៩ ខែកញ្ញា ឆ្នាំ២០២៤ បានឱ្យដឹងថា ការហោះហើរសាកល្បង(Flight Inspection) នៃអាកាសយានដ្ឋានតារាសាគរនេះ ដើម្បីពិនិត្យមើលផ្នែកបច្ចេកទេស និងឧបករណ៍ចាំបាច់មួយចំនួនដែលបានបំពាក់រួច ដំណើរការប្រកបដោយសុវត្ថិភាព ក្នុងការត្រៀមលក្ខណៈសម្រាប់ការហោះហើរក្នុងស្រុក ប្រភេទយន្តហោះខ្នាតតូច នៅចុងខែវិច្ឆិកា ឆ្នាំ២០២៤ ខាងមុខ ។
អាកាសយានដ្ឋាននេះ ត្រូវបានវិនិយោគដោយក្រុមហ៊ុន Tianjin Union Development Group(UDG) និងទុនវិនិយោគសរុបប្រមាណជាង២០០លានដុល្លារអាមេរិក ហើយក្រោយបើកដំណើរការហោះហើរនៅពេលខាងមុខ អាកាសយានដ្ឋាននេះ រំពឹងនឹងទទួលបានភ្ញៀវទេសចរ និងវិនិយោគបរទេសបន្ថែមកកាន់តំបន់សមុទ្រ ជាពិសេសវិនិយោគិនមកពីប្រទេសចិន ។
លោកជំទាវ មិថុនា ភូថង អភិបាលខេត្តកោះកុង ធ្លាប់បានថ្លែងប្រាប់អ្នកសារព័ត៌មានកាលពីពេលកន្លងទៅនេះថាកោះកុងជាខេត្តមួយក្នុងតំបន់សមុទ្រនៃប្រទេសកម្ពុជា និងជាខេត្តដែលមានទំនាក់ទំនងល្អជាមួយបណ្ដាខេត្តមួយចំនួនក្នុងប្រទេសចិន ដូច្នេះវិនិយោគិននឹងអាចចូលមកបណ្ដាក់ទុនវិនិយោគ នៅក្នុងប្រទេសកម្ពុជាកាន់តែច្រើនឡើងជាពិសេសនៅក្នុងខេត្តកោះកុងផ្ទាល់តែម្ដង ។
ទន្ទឹងមនឹងនេះដែរ ខេត្តកោះកុងនាពេលបច្ចុប្បន្ននេះ ក៏បានបង្ហាញសក្ដានុពលកាន់ តែទាក់ទាញបន្ថែមទៀត ដូចជាផ្លូវល្បឿនលឿនភ្នំពេញ ក្រុងព្រះសីហនុ ក៏បានឆ្លងកាត់ខេត្តកោះកុង ផ្លូវជាតិលេខ១០ តភ្ជាប់ពីខេត្តបាត់ដំបង ពោធិ៍សាត់ មកកាន់ទីរួមខេត្តកោះកុង និង គម្រោងលើកកម្រិតគុណភាពផ្លូវជាតិលេខ៤៨តភ្ជាប់ពីផ្លូវជាតិលេខ៤ កាន់ទីរួមខេត្តកោះកុងជាដើម ។
Account
Security
Favourite Content