សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ផ្លូវ២០០៤ បើនិយាយកាលពីជាង១០ឆ្នាំមុន ត្រូវបានគេចាត់ទុកជាតំបន់ជាយក្រុងមួយក្នុងរាជធានីភ្នំពេញ និងមិនសូវមានមនុស្សម្នារស់នៅកុះករដូចពេលនេះទេ ហើយកាលពីជាង១០ឆ្នាំមុនតំបន់នេះ ជាតំបន់ឃ្លាំងលក់រថយន្តជជុះដែលគេនាំចូលពីក្រៅប្រទេសមកស្តុកតែប៉ុណ្ណោះ ប៉ុន្តែក្រោយពេលផ្លុវ២០០៤មានការអភិវឌ្ឍ បានប្រែក្លាយជាតំបន់ពាណិជ្ជកម្ម មានសាលាឯកជនលំដាប់អន្តរជាតិ និងលំនៅឋានក៏ទាក់ទាញមួយ និងបានក្លាយជាតំបន់ទីប្រជុំជនដូចនឹងតំបន់កណ្ដាលក្រុងភ្នំពេញដែរ ។
បច្ចុប្បន្ននេះផ្លូវ២០០៤ គេឃើញមានការអភិវឌ្ឍទៅលើផ្ទះល្វែង ផ្ទះអាជីវកម្ម ធនាគារ សាលារៀនអន្តរជាតិល្បីៗ ផ្សារទំនើប ហាងកាហ្វេម៉ាកល្បីៗនៅលើពិភពលោក អាហារដ្ឋាន បុរីផ្ទះល្វែង វីឡា និងខុនដូជាដើម ។ នៅតាមបណ្ដោយផ្លូវនេះដែរ គេក៏សង្កេតឃើញមានមនុស្សម្នាជាច្រើនធ្វើដំណើរឆ្លងកាត់ និងរស់នៅក្នុងតំបន់នេះ ដែលធ្វើឱ្យម្ចាស់អាជីវកម្មជាច្រើនចូលទៅកាន់ទឹកដីនេះ ដើម្បីធ្វើសកម្មភាពរកប្រាក់ចំណេញទៅតាមជំនាញរបស់ពួកគេ ។
អ្វីដែលជាការកត់សម្គាល់នោះ រាជរដ្ឋាភិបាល និងវិស័យឯកជន ក៏បានសហការគ្នាក្នុងការកសាងហេដ្ឋារចនាសម្ព័ន្ធថ្មីៗ ពង្រីកហេដ្ឋារចនាសម្ព័ន្ធចាស់ៗឱ្យកាន់តែទំនើប ជាពិសេសទៅលើបណ្តាញទឹកស្អាត និងអគ្គិសនី ។ ជាមួយគ្នានេះ រាជរដ្ឋាភិបាលក៏គ្រោងនឹងសាងសង់ស្ពានអាកាសមួយទៀតនៅបណ្ដោយផ្លូវសហព័ន្ធរុស្ស៊ីកែងនឹងផ្លូវ២០០៤នេះដែរ ដែលនឹងធ្វើឱ្យផ្លូវមួយនេះកាន់តែមានភាពទាក់ទាញបន្ថែមទៀតនៅពេលអនាគតដ៏ខ្លីនេះ ។
អ្នកជំនាញនៃវិស័យអចលនទ្រព្យជាច្រើនបានលើកឡើងថា ការរីកចម្រើននៃទីក្រុង បានជំរុញឱ្យតំបន់ជាយក្រុងក្លាយជាតំបន់ទីប្រជុំជន និងមានអាជីវកម្មចម្រុះ ហើយតំបន់ដែលស្ងាត់ ឬដាច់ស្រយាលកាលពីមុននោះ ក៏ក្លាយជាតំបន់ជាយក្រុងកំពុងមានការអភិវឌ្ឍយ៉ាងមមាញឹកផងដែរ ។
លោក ប៉ូ អ៊ាវគង់ នាយកប្រតិបត្តិក្រុមហ៊ុនអចលនទ្រព្យ Advance Real Estate បានមានប្រសាសន៍ឱ្យដឹងថា តំបន់ជាយក្រុងកាលពីជាង១ទសវត្សរ៍មុន បានក្លាយជាតំបន់ទីប្រជុំជនហើយតំបន់ឧស្សាហកម្ម ឃ្លាំង រោងចក្រជាដើមនោះ បានក្លាយទៅជាតំបន់ពាណិជ្ជកម្ម និងលំនៅឋាន ដោយអាជីវកម្មឃ្លាំង រោងចក្រ ឧស្សាហកម្មនានាត្រូវផ្លាស់ទៅតំបន់ថ្មីដែលនៅឆ្ងាយពីទីប្រជុំជនកណ្ដាលទីក្រុង ។
លោកបន្តថា នៅមានការកែប្រែតំបន់ពីមួយទៅមួយបែបនេះ ក៏នឹងធ្វើឱ្យតម្លៃដីធ្លីនៅតំបន់មានការឡើងថ្លៃជាបន្តបន្ទាប់ផងដែរ តួយ៉ាងតំបន់តាមបណ្ដោយផ្លូវ២០០៤នេះក៏មានការហក់ឡើងថ្លៃគួរឱ្យកត់សម្គាល់ដែរ ក្នុងរយៈពេល១០ឆ្នាំមកនេះ ។
លោកប៉ូ អ៊ាវគង់ បានបន្ថែមថា ការពង្រីកទីក្រុង អ្វីដែលត្រូវធ្វើនោះគឺការអភិវឌ្ឍហេដ្ឋារចនាសម្ព័ន្ធ ដូចជាផ្លូវ ភ្លើង និងទឹក ។ នៅពេលមានហេដ្ឋារចនាសម្ព័ន្ធទាំងនេះ នឹងទាក់ទាញមនុស្សទៅរស់នៅកាន់តែច្រើន ហើយការរៀបចំផែនការមេ ដូចជាការរៀបចំសុរិយោដី បានត្រឹមត្រូវក៏ជាកត្តាចម្បងសម្រាប់សម្រួលដល់ប្រជាពលរដ្ឋទៅរស់នៅតំបន់នោះផងដែរ ៕
Account
Security
Favourite Content