ភ្នំពេញ៖ ក្រុមការងារជំរុញការវិនិយោគក្នុងខេត្តព្រះសីហនុ បានដឹកនាំកិច្ចប្រជុំលើកទី១២ ដើម្បីពិនិត្យគម្រោងវិនិយោគ និងធុរកិច្ចដែលបានស្នើការលើកទឹកចិត្តការអនុគ្រោះ និងការសម្រួលនីតិវិធីក្នុងក្រប​ខ័ណ្ឌ “កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤” នាព្រឹកថ្ងៃទី៣ ខែធ្នូ ឆ្នាំ២០២៤ នៅទីស្តីការក្រសួងសេដ្ឋកិច្ច និង ហិរញ្ញវត្ថុ។

ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី និងជាប្រធានក្រុមការងារជំរុញការវិនិយោគក្នុងខេត្តព្រះសីហនុ បានមានប្រសាសន៍ឱ្យដឹងថា ៖ អង្គប្រជុំបានសម្រេចជាគោលការ​ណ៍​ផ្តល់ការលើកទឹកចិត្តពិសេសដល់គម្រោងចំនួន ៤៨ គម្រោង ដែលមានទុនវិនិយោគសរុប ៤៨៧ លានដុល្លារអាមេរិក។

ឯកឧត្តមបណ្ឌិត បានបន្តថា៖ ក្នុងចំណោមគម្រោងវិនិយោគ និងធុរកិច្ចទាំង ៤៨ មានគម្រោងពាក់ព័ន្ធនឹងអគារជាប់គាំង ចំនួន ១៦, គម្រោងថ្មី ចំនួន ២៨, និង ការពង្រីកគម្រោង ចំនួន ៤ ដែលមានទុនវិនិយោគជិត៥០០លានដុល្លារអាម៉េរិក ។ គម្រោងទាំងនេះរួមមានគម្រោងបង្កើតតំបន់សេដ្ឋកិច្ចពិសេសនៅស្រុកព្រៃនប់, គម្រោងរោងចក្រផលិត និង កែច្នៃអាលុយ​មីញ៉ូម, គម្រោងរោងចក្រផលិតសម្ភារៈប្រើប្រាស់ក្នុងផ្ទះដើម្បីនាំចេញទៅទីផ្សារអ៊ឺរ៉ុប និង អាម៉េរិក,គម្រោងបង្កើតសហគមន៍អាជីវកម្មនៅក្រុងរាម,និងគម្រោ​ង​អាទិភាពផ្សេងៗទៀត។

ជាមួយគ្នានេះ ក្រុមការងារបានសម្របសម្រួលដោះស្រាយវិវាទពាក់ព័ន្ធអគារជាប់គាំងដែលអូសបន្លាយ អស់រយៈពេល ៤-៥ ឆ្នាំកន្លងមកបានចំនួន ៦ គម្រោងដែលអនុញ្ញាតឱ្យ​ម្ចាស់​គម្រោងអាចប្រើប្រាស់អគារឡើងវិញសម្រាប់ប្រកបធុរកិច្ច។

សូមជម្រាបជូនថា បន្ទាប់ពីការប្រកាសដាក់ឱ្យអនុវត្តជាផ្លូវការដោយសម្តេចមហាបវរធិបតី នាយករដ្ឋមន្ត្រីនៃព្រះរាជាណាចក្រកម្ពុជា កាលថ្ងៃទី ៣១ ខែមករា ឆ្នាំ ២០២៤,ក្រុមការ​ងា​របានសម្រេចជាគោលការ​ណ៍ផ្តល់ការលើកទឹកចិត្តពិសេស ចំនួន ២១៣ គម្រោង រួចមកហើយ គិតត្រឹមខែ ធ្នូ ឆ្នាំ២០២៤ នេះ ដែលក្នុងនោះរួមមាន គម្រោងពាក់ព័ន្ធនឹងអគារជាប់គាំង មានចំនួន ១០១, គម្រោងថ្មី មានចំនួន ៨៩, ការពង្រីកគម្រោង មានចំនួន ១៩ និង គម្រោងមានស្រាប់ មានចំនួន ៤ ។

គម្រោងទាំងនេះក៏រាប់បញ្ចូលគម្រោងដែលមានសក្តានុពលសំខាន់ៗ ដូចជា គម្រោងបង្កើតតំបន់សេដ្ឋកិច្ចពិសេសនៅស្រុកព្រៃនប់, គម្រោងរោងចក្រផលិត និង កែច្នៃអាលុយមីញ៉ូម, គម្រោងផលិតផ្ទាំងសូឡា និង គ្រឿងបង្គុំ, គម្រោងមជ្ឈមណ្ឌលពាណិជ្ជកម្មផ្កាយ ៥, និង គម្រោងសួនកសិ-ឧស្សាហកម្ម ជាដើម ។ ក្នុងនោះផងដែរ, គម្រោងដែលមានទុនវិនិយោគ លើសពី ១០០ លានដុល្លារអាម៉េរិក មានចំនួន ២៣ គម្រោង ។

លោកបណ្ឌិតបានលើកឡើងថា៖

«ការលើកទឹកចិត្តពិសេសពីរាជរដ្ឋាភិបាលនេះរួមចំណែកលើកកម្ពស់បរិយាកាសធុរកិច្ចក្នុងខេត្តព្រះសីហនុ ឱ្យកាន់តែល្អប្រសើរ »។

សម្តេចមហា​បវរ​ធិបតី ហ៊ុន ម៉ាណែត នាយករដ្ឋមន្ត្រី ធ្លាប់បានមានប្រសាសន៍ថា៖កម្មវិធីពិសេសនេះ គឺជាគំនិតផ្តួចផ្តើមថ្មីមួយទៀត ដែលបញ្ជាក់ពីកិច្ចខិតខំប្រឹងប្រែង និងការប្តេជ្ញាចិត្តខ្ពស់ ដោយឥតងាករេ ក្នុងការបម្រើជាតិ និងការអភិវឌ្ឍសង្គម-សេដ្ឋកិច្ច របស់រាជរដ្ឋាភិបាល ក្នុងនីតិកាលទី ៧ នៃរដ្ឋសភា ។កម្មវិធីពិសេសនេះ នឹងចូលរួមចំណែកប្រែក្លាយមុខមាត់ និង អនាគត ខេត្តព្រះសីហនុ ឱ្យទៅជាប៉ូលសេដ្ឋកិច្ចចម្បង និងគំរូមួយរបស់កម្ពុជា តាមរយៈការដោះស្រាយបញ្ហាដែលមានចំពោះមុខ ក៏ដូចជា ការប្រើប្រាស់នូវសក្តានុពល និងធនធានអំណោយផលដែលមានស្រាប់ ក្នុងខេត្តជាប់តំបន់មាត់សមុទ្រមួយនេះ ប្រកប​ដោយប្រសិទ្ធភាព ។

សម្តេចធិបតី ហ៊ុន ម៉ាណែត បានលើកឡើងថា៖

«កម្មវិធីពិសេសនេះបង្កើតឡើងសំដៅដោះស្រាយគម្រោងវិនិយោគជាប់គាំង និងបញ្ហាប្រឈមនានា របស់វិស័យឯកជន ជាមួយនឹងការសម្របសម្រួលនៅនឹងកន្លែង និង ការផ្តល់ការគាំទ្រ ទាំងផ្នែកសារពើពន្ធ និងមិនមែនសារពើពន្ធ ជូនវិនិយោគិន និងធុរជន ព្រមជាមួយនឹងការជំរុញលើកកម្ពស់វិស័យឧស្សាហកម្មនានាដោយផ្តោតលើការអភិវឌ្ឍតំបន់ឧស្សាហកម្មនិងហេដ្ឋា រចនា​សម្ព័ន្ធពាក់ព័ន្ធក៏ដូចជាការបង្កើនសមត្ថភាពស្ថាប័នអនុវត្តនិងភាគីពាក់ព័ន្ធក្នុងខេត្តព្រះសីហនុ »។

អ្នកឧកញ៉ា លឹម ហេង អនុប្រធានសភាពាណិជ្ជកម្ម បានប្រាប់ EMS Economy នាព្រឹកថ្ងៃទី៤ ខែធ្នូ ឆ្នាំ២០២៤ ថា ៖ ការប្រកាសដាក់ឱ្យអនុវត្តជាផ្លូវការរបស់សម្តេចមហាបវរធិបតី នាយករដ្ឋមន្ត្រីនៃព្រះរាជាណាចក្រកម្ពុជានូវការលើកទឹកចិត្តពិសេសរបស់រាជរដ្ឋាភិបាលដល់គម្រោងវិនិយោគ និងធុរកិច្ចនេះ មានការទាក់ទាញវិនិយោគិនបរទេស និងក្នុងស្រុក ទទួលបានគម្រោងថ្មីៗ និងជួយស្តារគម្រោងជាប់គាំងនានា។

អ្នកឧកញ៉ាបានលើកឡើងថា៖

«ការលើកទឹកចិត្តពិសេសនេះមានប្រសិទ្ធភាពទាក់ទាញដ៏ល្អប្រសើរ និងទទួល​បានការចាប់អារម្មណ៍ពីអ្នកវិនិយោគឱ្យមកបណ្តាក់ទុននៅខេត្តព្រះសីហនុ ដែលជាតំបន់សេដ្ឋកិច្ចពហុបំណង បណ្តុំដោយកំពង់ផែ  ឆ្នេរសមុទ្រ  ទេសចរណ៍ ឧស្សាហកម្ម»។

អ្នកឧកញ៉ាអនុប្រធានសភាពាណិជ្ជកម្ម  បានឱ្យដឹងថា៖ បន្ថែមពីលើការលើកទឹកចិត្តពិសេសនេះ ក្រុមប្រឹក្សាអភិវឌ្ឍន៍កម្ពុជាថ្មីៗនេះ ទើបបានដាក់ឱ្យប្រើប្រាស់ជាផ្លូវការប្រព័ន្ធគ្រប់គ្រងគម្រោងវិនិយោគកម្ពុជា  cdcIPM ដែលជាច្រកស្វាគមអ្នកវិនិយោគមកកាន់កម្ពុជា និងផ្តល់សេវាចុះបញ្ជីគម្រោងវិនិយោគ ពន្លឿននីតិវិធីផ្តល់សេវាពាក់ព័ន្ធ និងបង្កើនទំនុកចិត្តជូនវិនិយោគិនប្រក​ប​ដោយតម្លាភាពប្រសិទ្ធភាព និងនិរន្តរភាព​។

ជាងនេះទៅទៀត រដ្ឋាភិបាលក្រោមការដឹកនាំរបស់សម្តេចធិបតី ហ៊ុន ម៉ាណែត និងសម្តេចតេជោ ហ៊ុន សែន អតីតនាយករដ្ឋមន្ត្រី បានយកចិត្តទុកដាក់ និងថែទាំអ្នកវិនិយោគ។តាមរយៈយុទ្ធសាស្ត្រនេះឃើញថាក្រុមហ៊ុនជាច្រើនដូចជាអាមេរិក ជប៉ុននិងក្រុមហ៊ុនបរទេសផ្សេងៗបានពង្រីកក្រុមហ៊ុនជាបន្តបន្ទាប់។

អ្នកឧកញ៉ា លឹម ហេង បានបន្តថា៖

« ដើម្បីទាក់ទាញ និងរក្សាការវិនិយោគ សភាពាណិជ្ជកម្ម  ទទួលនូវកង្វល់ បញ្ហាប្រឈម សំណូមពរ របស់វិស័យឯកជន ដាក់ជូនរដ្ឋាភិបាលដើម្បីស្វែងរកដំណោះស្រាយ»។

លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានលើកឡើងថា៖ កម្មវិធីលើកទឹកចិត្តពិសេសនេះ ជាគោលនយោបាយដ៏សំខាន់របស់រដ្ឋាភិបាល ដើម្បីលើកទឹកចិត្តវិនិយោគិនគ្រប់ជាតិសាសន៍ទាំងអស់ដែលមានបំណងមកវិនិយោគ និងកំពុងវិនិយោគនៅកម្ពុជា។

លោកបណ្ឌិតបានបញ្ជាក់ឱ្យដឹងថា៖ គម្រោងវិនិយោគ និងធុរកិច្ចចំនួន៤៨ដែលមានទុនវិនិយោគសរុប ជិត៥០០ លានដុល្លារនេះ នឹងអាចរួមចំណែកទៅក្នុងការជំរុញ និងកែប្រែមុខមាត់ទីក្រុងព្រះសីហនុ ជាពិសេសជួយរុញឱ្យមានការហក់ឡើងសេដ្ឋកិច្ចសង្គមមួយកម្រិតទៀតព្រមទាំងផ្តល់ឱកាសការងារដល់ប្រជាពលរដ្ឋ។

លោកបានបន្ថែមថា៖

«គម្រោងវិនិយោគ និងធុរកិច្ចពហុវិស័យនេះ គឺជាគំរូ និងជាសម្មត្តិកម្មមួយបង្ហាញទៅដល់វិនិយោគិនដទៃទៀតឱ្យចាប់អារម្មណ៍មកវិនិយោគនៅខេត្តព្រះសីហនុនិងខេត្តផ្សេងៗទៀតដោយ​សារតែការទទួលបានផលប្រយោជន៍ពីគម្រោងលើកទឹកចិត្តរបស់រាជរដ្ឋាភិបាលនេះ។ កញ្ចប់លើកទឹកចិត្តពិសេសនេះ ជាឱសថដ៏ស័ក្តិសិទ្ធសម្រាប់ការទាក់ទាញនិងបន្តការវិនិយោគនៅកម្ពុជា»។