សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងឱកាសអញ្ជើញប្រកាសដាក់ឱ្យអនុវត្តកម្មវិធីនយោបាយអាទិភាព ពាក់ព័ន្ធវិស័យកសិកម្មកាលពីថ្ងៃដើមសប្ដាហ៍កន្លងទៅនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានលើកឡើងថា មិនមែនជារឿងចៃដន្យនោះទេដែលបរទេសទិញផលិតផល និងអង្ករពីប្រទេសកម្ពុជា ពោលគឺកើតចេញពីខិតខំប្រឹងប្រែងស្វះស្វែងរកទីផ្សាររបស់រាជរដ្ឋាភិបាល ខណៈមានប្រទេសជាច្រើនកំពុងប្រកួតប្រជែងក្នុងការនាំចេញ។
សម្ដេចធិបតី ហ៊ុន ម៉ាណែត បានគូសបញ្ជាក់ថា សម្រាប់ទីផ្សារនៅបរទេស រាជរដ្ឋាភិបាលកម្ពុជា តាមរយៈក្រសួង ស្ថាប័ន បានខិតខំប្រឹងប្រែងធ្វើការចរចាតាមគ្រប់លទ្ធភាព ក្នុងនោះមានទាំងកិច្ចព្រមព្រៀងពាណិជ្ជកម្មសេរីផ្សេងៗ ដើម្បីមានឱកាសបើកច្រកនាំអង្ករចេញទៅក្រៅប្រទេស ។
សម្ដេចធិបតី ហ៊ុន ម៉ាណែត បានមានប្រសាសន៍ថា ៖
«ពិតណាស់ទីផ្សារនៅខាងក្រៅយើងខិតខំចរចានៅក្នុងការបើកតាមរយៈកិច្ចព្រមព្រៀងពាណិជ្ជកម្មសេរីផ្សេងៗ ប៉ុន្ដែកុំភ្លេចថា នៅលើពិភពលោកនេះច្រើនប្រទេសណាស់ដែលប្រកួតប្រជែងដូចគ្នា អ៊ីចឹងវាមិនស្វ័យប្រវត្តិទេ ហើយវាក៏មិនមែនជាកត្តាចៃដន្យ ដែលយើងអាចមានអតិរេក នៃផលិតផលកសិកម្ម ហើយអាចនាំចេញ៦លានតោននៅក្នុងរយៈពេល១០ខែ។ មិនមែននៅស្ងៀមៗ ប្រទេសទាំងអស់ទិញផលិតផលពីកម្ពុជានោះទេ»។
សម្ដេចធិបតីបានគូសបញ្ជាក់ថា កម្មវិធីគោលនយោបាយអាទិភាពទី៥ ទី៦របស់រាជរដ្ឋាភិបាល បានប្រកាសនៅពេលនេះ គឺសំដៅពង្រឹងបន្ថែម និងសម្រួចបន្ថែមទៅលើការជួយទាញនូវសក្ដានុពលកសិកម្ម ពោលមិនត្រឹមតែមិនដើរចេញ ឬដើរចោលកសិកម្មនោះទេ ប៉ុន្តែរាជរដ្ឋាភិបាលថែមទាំងដាក់គោលនយោបាយដើម្បីពង្រឹង និងទាញឱ្យបានសក្ដានុពលកាន់ខ្លាំង ធ្វើយ៉ាងណាឱ្យបានផលច្រើនទៅដល់កសិករ។
ពាក់ព័ន្ធការយកចិត្តទុកដាក់ទៅលើទីផ្សារក្រៅប្រទេស សម្តេចស្នើឱ្យក្រសួង និងស្ថាប័នពាក់ព័ន្ធមានការយកចិត្តទុកដាក់ទៅលើយន្តការដែលរៀបចំនេះ គឺយកចិត្តទុកដាក់ក្នុងការលើកកម្ពស់ទីផ្សារក្នុងស្រុក តាមរយៈការពង្រឹងខ្សែច្រវាក់ផលិតកម្ម និងខ្សែច្រវាក់ផ្គត់ផ្គង់ក្នុងស្រុកផងដែរ ។
សម្តេចធិបតី ក៏បានស្នើឱ្យក្រសួងកសិកម្មរុក្ខាប្រមាញ់ និងនេសាទ និងក្រសួងពាក់ព័ន្ធសហការគ្នានាលុបបំបាត់នូវសកម្មភាពណាមួយដែលរារាំងមិនឱ្យប្រជាកសិករ និងវិស័យឯកជនប្រកួតប្រជែងគ្នាក្នុងទីផ្សារដោយស្មើភាព។
សម្តេចធិបតី បានថ្លែងថា វិធានការអន្តរាគមន៍របស់រាជរដ្ឋាភិបាលនៅក្នុងការផ្ដល់ការគាំទ្រជាអ្នកសម្របសម្រួលរបស់រាជរដ្ឋាភិបាលតាមរយៈការផ្តល់ឥណទានកសិកម្ម និងការងារជំនួញធ្វើយ៉ាងណាកុំឱ្យប៉ះពាល់ដល់គោលការណ៍ប្រកួតប្រជែងនៅទីផ្សារ ។ រដ្ឋាភិបាលក៏មិនអាចទៅអន្តរាគមន៍តម្លៃបានរហូតទេ,អន្តរាគមន៍តម្លៃបានតែទៅលើផលិតផលយុទ្ធសាស្ត្រមួយចំនួន ពេលដែលចាំបាច់បំផុត ។
សម្ដេចបានបញ្ជាក់ថា ៖
«បើមិនអញ្ចឹងទេយើងនឹងប្រឈមទី ១-សូម្បីរដ្ឋធម្មនុញ្ញ ដែលធានាសេដ្ឋកិច្ចទីផ្សារ ហ្នឹងក៏កាត់បន្ថយការលូកដៃរបស់រដ្ឋ ។ ទី២- ប្រសិទ្ធភាពធ្វើយ៉ាងណា ដើម្បីអន្តរាគមន៍នៅក្នុងកម្មវិធីរបស់រដ្ឋ ផ្ដល់នៅក្នុងកិច្ចការជាច្រើន ជាពិសេសកិច្ចការបច្ចេកទេសការងារហេដ្ឋារចនាសម្ព័ន្ធ ការងារមួយចំនួនដែលយើងអាចធ្វើរយៈវែងហើយនឹងបន្តតាមដាន ។ ប៉ុន្តែទាមទារឱ្យមានការចូលរួមតាមរូបមន្តរាជរដ្ឋាភិបាលជាមួយវិស័យឯកជន និងកសិករ ដើម្បីចូលរួមអភិវឌ្ឍន៍វិស័យនេះទាំងអស់គ្នា»។
សម្តេចធិបតី ហ៊ុន ម៉ាណែត ក៏បានលើកឡើងដែរថា ការអន្តរាគមន៍របស់រាជរដ្ឋាភិបាល ធ្វើឡើងសម្រាប់ការមានវិបត្តិ និងស្ថានភាពជាក់លាក់ ហើយកិច្ចការទាំងអស់នេះនៅក្នុងគោលដៅជំរុញ និងពង្រឹងវិស័យកសិកម្ម។ ក្នុងន័យនេះសម្តេចយល់ថា ការកសាងបាននៅមូលដ្ឋាននៃការអភិវឌ្ឍកសិកម្មមាននិរន្តរភាព និងម្ចាស់ការមួយ មិនតម្រូវឱ្យមានកិច្ចអន្តរាគមន៍ជានិច្ចពីរាជរដ្ឋាភិបាលនោះទេ។ តែរាជរដ្ឋាភិបាលមានកាតព្វកិច្ចក្នុងការធ្វើឱ្យមានការប្រកួតប្រជែងនៅក្នុងទីផ្សារសេរីកាន់តែស្មើភាព យុត្តិធ៌ម និងបរិយាបន្ន៕
Account
Security
Favourite Content