សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពពីបរទេសបានលើកឡើងថា ជាមួយនឹងកំណើនប្រជាជនវ័យក្មេងដែលមានចំណេះដឹងផ្នែកបច្ចេកវិទ្យា អាស៊ីអាគ្នេយ៍កំពុងទាក់ទាញចំណាប់អារម្មណ៍ និងការវិនិយោគយ៉ាងច្រើនពីសំណាក់បណ្តាក្រុមហ៊ុនបច្ចេកវិទ្យាយក្ស រួមមាន Microsoft, Amazon, Nvidia, និង Apple ជាដើម។
ក្នុងរយៈពេល ២ ឆ្នាំចុងក្រោយនេះ ភាពជាដៃគូរវាងក្រុមហ៊ុនបច្ចេកវិទ្យាធំៗជាមួយរដ្ឋាភិបាលក្នុងតំបន់អាស៊ីអាគ្នេយ៍ បាន និងកំពុងកើនឡើង លើការកសាងសមត្ថភាពក្នុងតំបន់ ជាមួយនឹងការទទួលយកបច្ចេកវិទ្យាដែលកំពុងរីកចម្រើន រួមមាន AI, cloud, បច្ចេកវិទ្យា 5G និងច្រើនទៀត។ បន្ថែមពីនេះ ស្របពេលដែលបណ្តាប្រទេសនៅអាស៊ីអាគ្នេយ៍ដាក់ចេញនូវផែនការរបស់ពួកគេជុំវិញការប្រើប្រាស់ និងគ្រប់គ្រង AI នោះ ពួកគេក៏ប្រឈមមុខទៅនឹងបញ្ហាជាច្រើនដូចជា គម្លាតទេពកោសល្យឌីជីថល និងហេដ្ឋារចនាសម្ព័ន្ធ ដែលចាំបាច់ត្រូវពង្រឹងសម្រាប់ប្រជាជនក្នុងការទទួលបានអត្ថប្រយោជន៍ច្រើនបំផុតពីបច្ចេកវិទ្យា។ យ៉ាងណាមិញ ក្រុមហ៊ុនបច្ចេកវិទ្យាធំៗកំពុងប្រជែងគ្នាដើម្បីក្លាយជាអ្នកដំបូងគេក្នុងតំបន់ដែលកំពុងមានការអភិវឌ្ឍន៍ តាមរយៈការជំរុញនូវដំណោះស្រាយ និងបច្ចេកវិទ្យារបស់ពួកគេក្នុងការកសាងសមត្ថភាពទាំងនេះ។ ជាមួយគ្នានេះ ដើម្បីដោះស្រាយគម្លាតទេពកោសល្យឌីជីថលដែលមាននៅតាមបណ្តាប្រទេសកំពុងអភិវឌ្ឍន៍ ក្រុមហ៊ុនបច្ចេកវិទ្យាធំៗទាំងនោះត្រូវផ្តល់ការបណ្តុះបណ្តាលទៅកាន់ពួកគេ។ ជាឧទាហរណ៍ ក្រុមហ៊ុន Microsoft បានកំណត់គោលដៅបណ្តុះបណ្តាលអ្នកអភិវឌ្ឍន៍កម្មវិធីឥណ្ឌូនេស៊ី ១ ម៉ឺននាក់ឱ្យក្លាយជាអ្នកជំនាញផ្នែក AI តាមរយៈកម្មវិធី AI Odyssey របស់ខ្លួន ដែលនឹងអនុញ្ញាតឱ្យពួកគេទទួលបានលិខិតទទួលស្គាល់ពី Microsoft ។ លើសពីនេះ កិច្ចខិតខំប្រឹងប្រែងបង្កើនជំនាញរបស់ Microsoft គឺជាផ្នែកមួយនៃការវិនិយោគចំនួន ១,៧ ពាន់លានដុល្លារអាមេរិកក្នុងរយៈពេល ៤ ឆ្នាំនៅក្នុងហេដ្ឋារចនាសម្ព័ន្ធ Cloud និង AI ថ្មី របស់ឥណ្ឌូនេស៊ី ខណៈដែល Microsoft បានបណ្តាក់ទុនចំនួន ២,២ ពាន់លានដុល្លារអាមេរិកនៅម៉ាឡេស៊ីផងដែរ។
ដោយឡែក ចំពោះ Huawei ICT Academy ក៏កំពុងចាប់ដៃគូជាមួយគ្រឹះស្ថានឧត្តមសិក្សាជុំវិញពិភពលោក ដើម្បីផ្តល់នូវវគ្គសិក្សាស្តីពីបច្ចេកវិទ្យា Huawei ជាមួយនឹងការផ្តល់ជូនវិញ្ញាបនបត្រផងដែរ។ មិនត្រឹមតែប៉ុណ្ណោះ Amazon Web Services និង Google Cloud ទទួលបានជោគជ័យពី AI ជំនាន់ថ្មីរបស់ពួកគេជាមួយរដ្ឋាភិបាលសិង្ហបុរី ហើយបានបង្កើនភាពជាដៃគូ និងការវិនិយោគលើការបង្កើនជំនាញបន្ថែមទៀត។ ផ្អែកទៅលើរបាយការណ៍ស្តីពីសន្ទស្សន៍ការត្រៀមខ្លួនទទួលយក AI របស់រដ្ឋាភិបាលពី Oxford សម្រាប់ឆ្នាំ២០២៣ បានឲ្យដឹងថា សិង្ហបុរី គឺជាប្រទេសដែលត្រៀមរួចជាស្រេចសម្រាប់ AI នៅអាស៊ីអាគ្នេយ៍ ដែលមានពិន្ទុ ៨១,៩៧ ។ ចំណែកនៅប្រទេសម៉ាឡេស៊ីវិញ ក្រសួងវិទ្យាសាស្ត្រ បច្ចេកវិទ្យា និងនវានុវត្តន៍ បានសហការជាមួយ NVIDIA ដើម្បីបើកដំណើរ AI sandbox ក្នុងកិច្ចខិតខំប្រឹងប្រែងដើម្បីសម្រេចបាននូវគោលដៅជាតិក្នុងការទាក់ទាញក្រុមហ៊ុន AI ចំនួន ១០០ និងកំណត់គោលដៅរកចំណូលឱ្យបាន ២០៩ លានដុល្លារនៅឆ្នាំ២០៣០ ។ សម្រាប់ប្រទេសទាំងនេះ វាពិតជាមានសារៈសំខាន់ណាស់ក្នុងការជំរុញវិស័យឌីជីថល និងការពង្រឹងសមត្ថភាព AI ដែលជាគោលដៅសេដ្ឋកិច្ចដ៏សំខាន់ក្នុងការទាក់ទាញការវិនិយោគពីក្រុមហ៊ុនបចេ្ចកវិទ្យា។
យ៉ាងណាក៏ដោយ ស្របពេលដែលរដ្ឋាភិបាលនៃបណ្តាប្រទេសទាំងនោះកំពុងជំរុញគម្រោង AI ភាពជាដៃគូជាមួយក្រុមហ៊ុនបច្ចេកវិទ្យាធំៗ វាគឺជាផ្លូវសំខាន់សម្រាប់ពួកគេក្នុងការជំរុញវិស័យបច្ចេកវិទ្យាឲ្យកាន់តែទំនើប។ ក្រៅពីនេះ ដើម្បីសម្រេចតាមមហិច្ឆតាសេដ្ឋកិច្ចឌីជីថល និងការអភិវឌ្ឍន៍ទេពកោសល្យដូចដែលបានលើកឡើងខាងនេះ ការខិតខំប្រឹងប្រែងរួមគ្នារវាងវិស័យសាធារណៈ និងឯកជនគឺត្រូវការជាចាំបាច់។ ជាឧទាហរណ៍ AI Verify Foundation របស់សិង្ហបុរីបានចាប់ដៃគូជាមួយបច្ចេកវិទ្យាធំៗ ដូចជា Google, IBM, Microsoft, Red Hat និង Amazon Web Services ដើម្បីទទួលបានការអនុវត្តល្អបំផុតសម្រាប់ AI ។ ទន្ទឹមនឹងនេះ បច្ចេកវិទ្យាព័ត៌មានវិទ្យា និងទូរគមនាគមន៍ (ICT) មានសារៈសំខាន់ក្នុងការជួយប្រទេសសមាជិកអាស៊ានសម្រេចបាននូវគោលដៅសេដ្ឋកិច្ចឌីជីថលរបស់ពួកគេ៕
Account
Security
Favourite Content