សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងឆ្នាំ២០២៤នេះ វិនិយោគិនចិននៅតែឈរលំដាប់ទី១ ជាវិនិយោគិនដែលបណ្ដាក់ទុនវិនិយោគនៅកម្ពុជាច្រើនជាងគេ ជាក់ស្ដែងក្នុងរយៈពេល ៨ខែកន្លងមកនេះ កម្ពុជាទទួលបានទុនវិនិយោគពីចិនមានចំនួន ២ ៦៧៣លានដុល្លារអាមេរិក ក្នុងចំណោមទុនវិនិយោគសរុបចំនួន ៤ ៨៥៣លានដុល្លារអាមេរិក ។ នេះបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា។
ក្នុងរបាយការណ៍ដដែលបានបង្ហាញថា ក្នុងរយៈពេល៨ខែ វិនិយោគិនចិនបានបណ្ដាក់ទុននៅកម្ពុជាភាគច្រើនទៅលើវិស័យឧស្សាហកម្ម អចលនទ្រព្យ និងកសិកម្ម ក្នុងនោះដែរគេឃើញគម្រោងធំៗមួយចំនួនរបស់វិនិយោគិនដែលបានបណ្ដាក់ទុននៅក្នុងតំបន់សេដ្ឋកិច្ចពិសេសនានាក្នុងប្រទេសកម្ពុជា រួមមាន រោងចក្រផលិតសំបកកង់យានយន្ត ចំនួន៣ ក្នុងនោះ២កន្លែងនៅក្នុងតំបន់សេដ្ឋកិច្ចពិសេសខេត្តស្វាយរៀង និង១កន្លែងនៅក្នុងតំបន់សេដ្ឋកិច្ចពិសេសខេត្តក្រចេះ ។ ក្រៅពីនេះ មានគម្រោងវិនិយោគទៅលើសណ្ឋាគារផ្កាយ៥មួយ នៅក្នុងខេត្តព្រះសីហនុដែលមានទុនវិនិយោគច្រើនជាងគេក្នុងចំណោមគម្រោងវិនិយោគនានាក្នុងរយៈពេល៨ខែកន្លងមកទៅនេះ។
ទន្ទឹមនឹងការបណ្ដាក់ទុនជាង ២ ៦៧០ លានដុល្លារអាមេរិកនៅកម្ពុជារយៈពេល៨ខែកន្លងមកនេះ វិនិយោគិនចិនជាច្រើនទៀត ក៏បាន និងកំពុងចាប់អារម្មណ៍បង្ហាញពីបំណងបណ្ដាក់ទុនវិនិយោគបន្ថែមទៀតនៅប្រទេសកម្ពុជា ខណៈដែលកម្ពុជាបានផ្ដល់លក្ខខណ្ឌអំណោយផលជាច្រើនដល់បណ្ដាវិនិយោគិនមកពីបរទេស និងក្នុងស្រុក ។
បច្ចុប្បន្ននេះ រាជរដ្ឋាភិបាលកកម្ពុជាក៏បាន និងកំពុងផ្សព្វផ្សាយពីសក្ដានុពលវិនិយោគនៅក្នុងប្រទេសកម្ពុជាដល់វិនិយោគិនដើម្បីទាក់ទាញឱ្យពួកគេចូលមកវិនិយោគបន្ថែមទៀត ជាក់ស្ដែង ក្នុងរយៈពេលប៉ុន្មានថ្ងៃនេះ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ក្រុមប្រឹក្សាអភិវឌ្ឍន៍កម្ពុជា បានបំពេញទស្សនកិច្ចនៅប្រទេសចិន និងបង្ហាញពីកាលានុវត្តភាព និងសក្ដានុពលប្រទេសកម្ពុជាដល់បណ្ដាវិនិយោគិនធំៗរបស់ចិន ដោយរំពឹងថា ចិននឹងចាប់អារម្មណ៍មកវិនិយោគនៅកម្ពុជាបន្ថែម ។
លោក ប៉ូ អ៊ាវគង់ អគ្គនាយកក្រុមហ៊ុន អចលនទ្រព្យ Advance បានមានប្រសាសន៍ថា មានកត្តាចំនួន៣ សំខាន់ៗដែលធ្វើឱ្យកម្ពុជាទទួលបានគម្រោងវិនិយោគក៏ដូចជាប្រភពទុនវិនិយោគមកពីប្រទេសចិន ក្នុងនោះ មានកត្តាទំនាក់ទំនងនយោបាយល្អជាមួយចិន កត្តាសង្គ្រាមពាណិជ្ជកម្មរវាងចិន អាមេរិក និងបណ្ដាប្រទេសនៅអឺរ៉ុប និងច្បាប់វិនិយោគថ្មីរបស់ព្រះរាជាណាចក្រកម្ពុជា ។
លោកបន្តថា ទំនាក់ទំនងល្អរវាងប្រទេសកម្ពុជានិងចិន បានធ្វើឱ្យរដ្ឋាភិបាលចិនលើកទឹកចិត្តនិងជំរុញវិនិយោគិនចិនចូលមកបណ្ដាក់ទុនវិនិយោគនៅកម្ពុជាកាន់តែច្រើន ។ គាប់ជួនជាមួយនឹងបញ្ហាសង្គ្រាមពាណិជ្ជកម្មរវាងចិន និងអាមេរិក ក៏ដូចជាបណ្ដាប្រទេសមួយចំនួនក្នុងតំបន់អឺរ៉ុប បានធ្វើឱ្យក្រុមហ៊ុនចិនមួយចំនួនផ្លាស់ប្តូរទីតាំងចេញពីប្រទេសចិនទៅប្រទេសណាដែលមានអំណោយផល ក្នុងនោះដែរកម្ពុជាក៏ជាប្រទេសមួយក្នុងជម្រើសរបស់ចិនផងដែរ ។
លោក អ៊ាវគង់ បានបន្ថែមថា ដើម្បីទាក់ទាញវិនិយោគិនបរទេសនិងក្នុងស្រុក កម្ពុជាបានបង្កើតច្បាប់វិនិយោគថ្មីដែលច្បាប់វិនិយោគនេះ បានធ្វើឱ្យមានការចាប់អារម្មណ៍ពីសំណាក់វិនិយោគិនចិន ដូច្នេះហើយទើបយើងមើលឃើញថា វិនិយោគិនចិនកាន់តែច្រើនចូលបណ្ដាក់ទុនវិនិយោគនៅកកម្ពុជា និងបន្តសិក្សាគម្រោងវិនិយោគដើម្បីត្រៀមដាក់ទុនជាបន្តបន្ទាប់ ៕
Account
Security
Favourite Content