បរទេស ៖ យោងតាមប្រភពព័ត៌មានពី CNA បានរាយការណ៍ថា រដ្ឋាភិបាលអ៊ុយក្រែនគ្រោងនឹងដាក់ក្រុមហ៊ុនរដ្ឋចំនួន ២០ សម្រាប់ដេញថ្លៃ ដើម្បីផ្តល់មូលនិធិដល់យោធា និងជំរុញសេដ្ឋកិច្ចដែលទទួលរងប៉ះពាល់ពីសង្រ្គាម។

អ៊ុយក្រែនសង្ឃឹមថានឹងលក់បានប្រាក់យ៉ាងហោចណាស់ ១០០ លានដុល្លារពីការដេញថ្លៃនៅចុងឆ្នាំនេះ រួមមាន មជ្ឈមណ្ឌលផ្សារទំនើបដ៏ធំមួយ សណ្ឋាគារប្រវត្តិសាស្ត្រ និងក្រុមហ៊ុនរុករករ៉ែ ព្រមទាំងគីមីមួយចំនួនទៀត។ អ៊ុយក្រែនមានអង្គភាពទាំងនេះច្រើនជាង ៣ ០០០ ប៉ុន្តែមានតែ ១៥ ភាគរយប៉ុណ្ណោះកំពុងបង្កើតប្រាក់ចំណេញ ខណៈដែលរដ្ឋត្រូវចំណាយរាប់លានដុល្លារលើអង្គភាពជាច្រើនសម្រាប់ដំណើរការ ឬថែទាំ។ អចលនទ្រព្យមួយក្នុងចំណោមអចលនទ្រព្យដែលនឹងត្រូវដាក់លក់គឺ សណ្ឋាគារ Kyiv’s Ukraine ដែលបានឆ្លងកាត់ប្រវត្តិសាស្ត្រសំខាន់ៗរបស់ប្រទេសចាប់តាំងពីវាបានបើកដំណើរការក្នុងឆ្នាំ ១៩៦១។  សណ្ឋាគារ​នេះ​នឹង​ដាក់​លក់​ក្នុង​តម្លៃ​ចាប់​ពី ២៥ លាន​ដុល្លារ​អាមេរិក។

ការដាក់ដេញថ្លៃអចលនទ្រព្យនេះនឹងធ្វើឡើង ដើម្បីរកប្រាក់ចំណូលសម្រាប់សេដ្ឋកិច្ចដែលត្រូវបានបំផ្លិចបំផ្លាញដោយសង្រ្គាម។ ឱនភាពថវិការបស់ប្រទេសនេះត្រូវបានកំណត់ថានឹងកើនឡើងដល់ ៤៣,៥ ពាន់លានដុល្លារអាមេរិក ដោយសារតែការពន្យារពេលជំនួយយោធាពីសហរដ្ឋអាមេរិកជាមូលហេតុមួយផ្នែក។ លើសពីនេះ អ៊ុយក្រែននឹងត្រូវចំណាយអស់ ១៦ ពាន់លានដុល្លារអាមេរិក ដើម្បីផ្តល់មូលនិធិដល់តម្រូវការជួសជុលជាបន្ទាន់ក្នុងឆ្នាំនេះ និងយ៉ាងហោចណាស់ ៤០០ ពាន់លានដុល្លារសម្រាប់ការកសាងឡើងវិញក្រោយសង្គ្រាម។

ចាប់តាំងពីឆ្នាំ២០២២ មក ប្រាក់ចំណូលពន្ធស្ទើរតែទាំងអស់របស់អ៊ុយក្រែនត្រូវបានចំណាយលើការប្រយុទ្ធប្រឆាំងនឹងការឈ្លានពានរបស់រុស្ស៊ី។ ទីក្រុងគីវត្រូវស្វែងរកជំនួយហិរញ្ញវត្ថុពីបរទេស ដើម្បីចំណាយលើការចំណាយមនុស្សធម៌ និងសង្គមរបស់ខ្លួន។ ឥឡូវនេះ អ៊ុយក្រែនកំពុងពិនិត្យមើលជម្រើសក្នុងស្រុករបស់ខ្លួនកាន់តែខ្លាំងឡើង​ ដើម្បីដោះស្រាយលើការចំណាយ។ កាល​ពី​ឆ្នាំ​មុន ​អ៊ុយក្រែន​បាន​ឈ្នះ​ក្តី​តុលាការ​ក្នុងការ​ដណ្តើម​យក​ផ្សារ​ទំនើប Ocean Plaza ដែល​ជា​ផ្សារ​ទំនើប​ធំ​បំផុត​មួយ​ក្នុង​ទីក្រុងគីវ ដែល​គេចផុតពី​ការ​គ្រប់​គ្រង​របស់​រុស្ស៊ី។

ស្របពេលនេះដែរ គោលដៅរបស់អ៊ុយក្រែនគឺបញ្ជូនអង្គភាពគ្រប់គ្រងដោយរដ្ឋទៅដាក់ដេញថ្លៃ និងធ្វើឯកជនភាវូបនីយកម្ម ហើយបន្ទាប់មកប្រើប្រាស់ប្រាក់ចំណេញ ដើម្បីជួយសេដ្ឋកិច្ចអ៊ុយក្រែន។  លោក Vitaliy Koval នាយកមូលនិធិទ្រព្យសម្បត្តិរដ្ឋ លើកឡើងថា  ប្រាក់ចំណេញទាំងនោះមិនមែនជា​មូលនិធិសម្រាប់​​ស្ថាប័ន​ណា​មួយ​ទេ ហើយលុយដែលបានមកពីការធ្វើឯកជនភាវូបនីយកម្មនឹងដាក់បញ្ចូលដោយផ្ទាល់ទៅក្នុងថវិការដ្ឋ។ បន្ទាប់​មក​ថវិកា​នឹង​ត្រូវ​ប្រើប្រាស់ ​ដើម្បី​ដោះស្រាយផល​វិបាក​ពី​ការ​ឈ្លានពានដោយ​ប្រដាប់​អាវុធ​របស់​រុស្ស៊ី។

រហូតមកដល់ពេលនេះ Ocean Plaza គឺជាអចលនទ្រព្យដ៏មានតម្លៃបំផុតទាំងប្រាំដែលត្រូវបានរឹបអូសឈ្នះ ជាមួយនឹងតម្លៃដេញថ្លៃចាប់ពី ៣៩ លានដុល្លារអាមេរិក។ យ៉ាងណាមិញ ការឈ្នះក្តីលើទ្រព្យសម្បត្តិដែលរុស្ស៊ីធ្លាប់ធ្វើជាម្ចាស់មិនងាយស្រួលនោះទេ។ Markiyan Galabala ចៅក្រមនៅតុលាការប្រឆាំងអំពើពុករលួយជាន់ខ្ពស់បាននិយាយថា ក្រសួងយុត្តិធម៌ត្រូវតែមានភស្តុតាងដែលបញ្ជាក់ថាចុងចោទមានទំនាក់ទំនងជាមួយសហព័ន្ធរុស្ស៊ី ឬ រុស្ស៊ីបានប្រព្រឹត្តអំពើភេរវកម្មប្រភេទមួយចំនួននៅលើទឹកដីនៃអ៊ុយក្រែន។ យ៉ាងណាមិញ បញ្ហានេះតម្រូវឱ្យមានការស៊ើបអង្កេតដែលអាចចំណាយពេលច្រើនខែ ឬច្រើនឆ្នាំ។ បន្ទាប់មក ​សំណុំ​រឿង​នេះ​ត្រូវ​បាន​បញ្ជូន​ទៅ​តុលាការ​ប្រឆាំង​អំពើ​ពុក​រលួយ​ជាន់​ខ្ពស់​អ៊ុយក្រែន។ ទោះបីជាមានភាពបន្ទាន់ក៏ដោយ ប៉ុន្តែអ៊ុយក្រែនត្រូវធានាថាខ្លួនគោរពតាមស្តង់ដារច្បាប់របស់សហភាពអឺរ៉ុប៕