សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្របពេលដែលវិនិយោគិនចិនបានឈរលំដាប់ទី១ ក្នុងនាមជាវិនិយោគិនបរទេសបណ្ដាក់ទុនវិនិយោគនៅក្នុងប្រទេសកម្ពុជានោះ នាយករដ្ឋមន្ត្រីចិន ឯកឧត្តម លី ឈាង បានបញ្ជាក់ថា រដ្ឋាភិបាលចិននឹងបន្តលើកទឹកចិត្តឱ្យបណ្តាវិនិយោគិនរបស់ខ្លួនមកកម្ពុជាបន្ថែមទៀតដើម្បីស្វែងរកការវិនិយោគ និងបណ្ដាក់ទុនវិនិយោគបន្ថែម ។
ឯកឧត្តម លី ឈាង បានមានប្រសាសន៍បែបនេះ នៅក្នុងជំនួបជាមួយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅរដ្ឋធានីវៀងចន្ទន៍ ប្រទេសឡាវ ក្នុងឱកាសអញ្ជើញចូលរួមក្នុងកិច្ចប្រជុំកំពូលអាស៊ាន លើកទី៤៤ និង៤៥ និងកិច្ចប្រជុំកំពូលពាក់ព័ន្ធ ។
ឯកឧត្តម លី ឈាង បានប្រសាសន៍បន្តថា ៖
« ប្រទេសចិននឹងបន្តគាំទ្រដល់មាគ៌ាអភិវឌ្ឍស្របទៅតាមស្ថានភាពជាក់ស្តែងរបស់កម្ពុជា ហើយរដ្ឋាភិបាលចិននឹងបន្តលើកទឹកចិត្តវិនិយោគិនចិនមកកម្ពុជាបន្ថែមទៀត។ ភាគីចិននឹងធ្វើការឱ្យកាន់តែជិតស្និទ្ធថែមទៀតជាមួយកម្ពុជា ដើម្បីកសាងផែនការមេសម្រាប់ច្រករបៀងមច្ឆា និងអង្ករ, ច្រករបៀងឧស្សាហកម្ម និងបច្ចេកវិទ្យា ជាមួយនឹងការប្តេជ្ញាចិត្តជំរុញការនាំចូលផលិតផលកសិកម្មកម្ពុជាបន្ថែមទៀត មកកាន់ទីផ្សារចិន » ។
គួរបញ្ជាក់ថា ចិនគឺជាវិនិយោគិនដែលបានឈរលំដាប់ទី១នៅកម្ពុជា ជាក់ស្ដែងក្នុងរយៈពេល៩ខែដើមឆ្នាំ២០២៤នេះ ចិនបានបណ្ដាក់ទុនវិនិយោគនៅកម្ពុជាក្នុងទំហំទឹកប្រាក់ជាង ២,១ពាន់លានដុល្លារអាមេរិក ក្នុងចំណោមទុនវិនិយោគសរុបដែលកម្ពុជាទទួលបានក្នុងរយៈពេល៩ខែ ជាង៤,៣៤ពាន់លានដុល្លារអាមេរិក។
បើតាមរបាយការណ៍របស់ក្រុមប្រឹក្សាអភិវឌ្ឍន៍បានបានបង្ហាញឱ្យឃើញថា គម្រោងវិនិយោគរបស់វិនិយោគិនចិនដែលបណ្ដាក់ទុននៅក្នុងប្រទេសកម្ពុជា ភាគច្រើនគឺជាគម្រោងក្នុងវិស័យឧស្សាហកម្ម ។ ក្នុងរយៈពេល៩ខែកន្លងមកនេះដែរ បានបង្ហាញគម្រោងធំៗមួយចំនួនដែលជាការវិនិយោគរបស់វិនិយោគិនចិនរួមមានគម្រោងវិនិយគលើសណ្ឋាគារផ្កាយ៥នៅខេត្តព្រះសីហនុ គម្រោងវិនិយោគលើរោងចក្រផលិតសំបកកង់ឡាននៅខេត្តស្វាយរៀង នៅខេត្តក្រចេះជាដើម ។
អ្នកជំនាញនៃវិស័យអចលនទ្រព្យកម្ពុជាបានបញ្ជាក់ថា ចិននៅតែជាវិនិយោគិនដ៏សំខាន់សម្រាប់វិស័យអចលនទ្រព្យកម្ពុជា ហើយបើសិនជាសេដ្ឋកិច្ចចិនមានបញ្ហាវាក៏បានធ្វើឱ្យវិស័យអចលនទ្រព្យកម្ពុជារងឥទ្ធិពលពីសេដ្ឋកិច្ចរបស់ចិនដែរ ។
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានមានប្រសាសន៍ថា វិស័យអចលនទ្រព្យកម្ពុជា នៅតែពឹងលើវិនិយោគិនបរទេស ជាពិសេសវិនិយោគិនរបស់ចិន ហើយរាជរដ្ឋាភិបាលកម្ពុជាក៏បានប្រឹងប្រែងក្នុងការទាក់ទាញការវិនិយោគពីប្រទេសផ្សេងៗទៀត ដើម្បីឱ្យវិស័យនេះមានការវិនិយោគពីវិនិយោគិនបរទេសផ្សេងៗគ្នា ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) លោក សន សៀប បានថ្លែងថា ក្រៅពីវិនិយោគិនចិន កម្ពុជាក៏មានវិនិយោគិនមកពីប្រទេសជាច្រើនទៀតកំពុងបណ្ដាក់ទុនវិនិយោគក្នុងវិស័យអចលនទ្រព្យ និងវិស័យជាច្រើនទៀត ដូចជាកូរ៉េខាងត្បូង ជប៉ុន និងបណ្ដាប្រទេសក្នុងតំបន់អាស៊ាន ។ ការជំរុញ និងលើកទឹកចិត្តឱ្យវិនិយោគពីសំណាក់វិនិយោគិនបរទេសចម្រុះ នឹងមិនធ្វើឱ្យកម្ពុជារងវិបត្តិធ្ងន់ធ្ងរនៅពេលប្រទេសណាមួយជួបបញ្ហាសេដ្ឋកិច្ចនោះទេ។
គួរបញ្ជាក់ថា រាជរដ្ឋាភិបាលកម្ពុជា បានត្រៀមខ្លួនរួចជាស្រេចក្នុងការសម្របសម្រួល និងបង្កលក្ខណៈងាយស្រួលដល់វិនិយោគិនទាំងអស់ ដូចជាការជំរុញឱ្យបង្កើតតំបន់សេដ្ឋកិច្ចពិសេស ការអនុគ្រោះលើផ្នែកពន្ធមួយចំនួន និងលក្ខខណ្ឌមួយចំនួនទៀតត្រូវបានកាត់បន្ថយ ធ្វើយ៉ាងណាអាចបង្កភាពងាយស្រួលដល់អ្នកវិនិយោគ ៕
Account
Security
Favourite Content