សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី BBC បានរាយការណ៍ថា ចិនបានសងសឹកទៅលើសហភាពអឺរ៉ុបតាមរយៈការកំណត់ និងដាក់ពន្ធលើការនាំចូលស្រាកូញ៉ាក់របស់អឺរ៉ុបបន្ទាប់ពីសហភាពអឺរ៉ុបបានកំណត់ និងដាក់ពន្ធលើរថយន្តអគ្គិសនីរបស់ខ្លួន។
ជាប្រតិកម្មឆ្លើយតប គណៈកម្មការអឺរ៉ុបបានជំទាស់ទៅនឹងការដាក់ពន្ធរបស់ចិនដោយផ្អែកតាមច្បាប់របស់អង្គការពាណិជ្ជកម្មពិភពលោក (WTO) ដោយហៅវាថាជា ការរំលោភបំពានលើវិធានការការពារពាណិជ្ជកម្ម។ ទោះជាយ៉ាងណា ចិនបាននិយាយថា ចំណាត់ការនេះជាវិធានការដាក់ពន្ធប្រឆាំងនឹងការលក់បង្ខូចថ្លៃ ឬ Anti-Dumping ដើម្បីការពារអ្នកផលិតក្នុងស្រុករបស់ខ្លួន។ គួរឲ្យបញ្ជាក់ដែរថា Anti-Dumping គឺជាច្បាប់ដែលនឹងត្រូវអនុវត្តទៅលើទំនិញទាំងឡាយណាដែលរដ្ឋាភិបាលក្នុងស្រុករកឃើញថា ទំនិញនាំចូលមានតម្លៃទាបជាងទីផ្សាររបស់ប្រទេសនាំចេញ ឬ បរទេស ដែលវាអាចធ្វើឲ្យខូចតម្លៃទីផ្សារក្នុងស្រុក។
យ៉ាងណាក៏ដោយ បន្ទាប់ពីចិនប្រកាសពីការរឹតបន្តឹងកាលពីពេលថ្មីៗនេះ ភាគហ៊ុនរបស់ក្រុមហ៊ុនស្រាល្បីៗបានធ្លាក់ចុះ ជាពិសេសម៉ាកយីហោផលិតស្រាធំៗរួមមាន Hennessy បានធ្លាក់ចុះជាង ៣ ភាគរយ ហើយ Remy Martin បានធ្លាក់ចុះជាង ៨ ភាគរយ។
គួរបញ្ជាក់ថា ចិនបានប្រកាសពីការរឹតបន្តឹងថ្មីលើស្រាកូញ៉ាក់របស់អឺរ៉ុប បន្ទាប់ពីបណ្តាប្រទេសសហភាពអឺរ៉ុបបានអនុម័តពន្ធលើរថយន្តអគ្គិសនីរបស់ខ្លួន។ ចិនលើកឡើងថា ការដាក់ពន្ធគយរបស់សហភាពអឺរ៉ុបមកលើយានយន្តអគ្គិសនីរបស់ខ្លួនគឺជាការបំពានច្បាប់ពាណិជ្ជកម្មពិភពលោក។ ក្រសួងពាណិជ្ជកម្មចិនបាននិយាយថា ការនាំចូលស្រាមានម៉ាកយីហោអឺរ៉ុបបានគំរាមកំហែងយ៉ាងខ្លាំងដល់អ្នកផលិតក្នុងស្រុករបស់ខ្លួន។ បន្ថែមពីនេះ អ្នកនាំចូលនឹងត្រូវបង់ប្រាក់បញ្ញើសុវត្ថិភាពលើការនាំចូលផលិតផលម៉ាកយីហោអឺរ៉ុប។ មិនត្រឹមតែប៉ុណ្ណោះ ចិនក៏កំពុងពិចារណាលើការដាក់ពន្ធថ្មីលើការនាំចូលផលិតផលផ្សេងទៀតរបស់សហភាពអឺរ៉ុប រួមមានដូចជា រថយន្ត សាច់ជ្រូក និងទឹកដោះគោជាដើម។
រដ្ឋមន្ត្រីពាណិជ្ជកម្មបារាំង អ្នកស្រី Sophie Primas បាននិយាយថា ការដាក់ពន្ធរបស់ចិនហាក់ដូចជាវិធានការសងសឹកបន្ទាប់ពីសហភាពអឺរ៉ុបសម្រេចដំឡើងពន្ធលើរថយន្តអគ្គិសនីរបស់ចិន។ លោកស្រីបន្ថែមថា វិធីសាស្ត្រនៃការសងសឹកនេះមិនអាចទទួលយកបាននោះទេ និងមានភាពផ្ទុយគ្នាទាំងស្រុងនៃច្បាប់ពាណិជ្ជកម្មអន្តរជាតិ ហើយបារាំងនឹងធ្វើការជាមួយសហភាពអឺរ៉ុប ដើម្បីចាត់វិធានការនៅអង្គការពាណិជ្ជកម្មពិភពលោក (WTO)។ គួរឲ្យបញ្ជាក់ដែរថា បារាំងមានចំណែកនាំចេញស្រាកូញ៉ាក់ ៩៩ ភាគរយទៅកាន់ចិន ហើយការរឹតបន្តឹងថ្មីមួយនេះនឹងប៉ះពាល់ខ្លាំងលើឧស្សាហកម្មនេះ៕
Account
Security
Favourite Content