ភ្នំពេញ ៖ នៅពេលបច្ចុប្បន្ននេះ បើទោះបីជាចរន្តសេដ្ឋកិច្ចសកលត្រូវបានគេមើលឃើញថា នៅមានភាពមិនទាន់ច្បាស់លាស់យ៉ាងណាក៏ដោយ ប៉ុន្តែសម្រាប់ទីផ្សារអចលនទ្រព្យនៅកម្ពុជា ផ្តោតសំខាន់លើលំនៅដ្ឋានតម្លៃមធ្យម និងក្រោមមធ្យម នៅតែមានសកម្មភាព ទាំងការសាងសង់ និងតម្រូវការទិញ។ ដូច្នេះចំពោះអ្នកដែលមានបំណងវិនិយោគយកចំណេញក្នុងរយៈពេលវែង នៅតែមានឱកាសដដែល។ នេះបើតាមការឱ្យដឹងពីអ្នកជំនាញនៅក្នុងវិស័យមួយនេះ។

លោកឧកញ៉ាបណ្ឌិត គឹម ហ៊ាង ប្រធាន KW Cambodia បានមានប្រសាសន៍ឱ្យដឹងថា ការទិញអចលនទ្រព្យនៅក្នុងស្ថានភាពបច្ចុប្បន្ន មានឱកាសចំណេញ ដោយសារមានអ្នកលក់បន្ទាន់ច្រើនក្នុងតម្លៃទាបជាងទីផ្សារ។ បើគេនិយាយពីលំនៅដ្ឋានលក់បន្តពីម្ចាស់មួយទៅម្ចាស់មួយ ឬហៅសាមញ្ញាថាផ្ទះមួយទឹក ការទិញលក់មានសភាពល្អជាងឆ្នាំមុនៗ ​និងមានឱកាសចំណេញច្រើន ខណៈគម្រោងបុរី ហាក់នៅមិននទាន់មានភាពប្រសើរឡើងនៅឡើយ។

លោកឧកញ៉ាបញ្ជាក់ថា ៖

«សម័យនេះវាជាឱកាស ព្រោះអីអ្នកលក់ច្រើន អ្នកទិញតិច បានន័យថា អ្នកលក់១០ អ្នកទិញ០២ …..អាហ្នឹង យើងស្រួលទិញ….សម្រាប់ខ្ញុំ…ខ្ញុំទិញពេលនេះច្រើន ខ្ញុំចូលចិត្តទិញពេលស្ថានភាពចឹង»។

ជាមួយគ្នានេះ លោក ប៉ូ អ៊ាវគង់ អគ្គនាយកក្រុមហ៊ុន អចលនទ្រព្យ Advance Real Estate បានមានប្រសាសន៍ថា ការទិញលក់អចលនទ្រព្យសម្រាប់ផ្ទះស្នាក់នៅដែលមានតម្លៃមធ្យម និងក្រោមមធ្យមហាក់មានទំនុកចិត្តច្រើនជាងឆ្នាំ២០២៤ និង២០២៣ កន្លងទៅ ប៉ុន្តែទោះជាយ៉ាងនេះក្តី ចលករនៃតម្លៃ ហាក់នៅមិនទាន់មានភាពល្អប្រសើរជាងឆ្នាំមុនៗនៅឡើយ។

លោកបញ្ជាក់ថា ៖ «ជំនឿទុកចិត្តទាក់ទងនឹងការទិញលំនៅដ្ឋានដែលមានតម្លៃធម្យ ម តម្លៃសមរម្យ ឬតម្លៃទាបនេះ យើងឃើញថា ភាគច្រើនមានចលនករមួយចំនួនជួយរុញ និហគាំទ្រ ដូចជាការលើកលែងពន្ធប្រថាប់ត្រាពីរដ្ឋាភិបាល រួមជាមួយនឹងគោលនយោបាយជំរុញឱ្យមានការអភិវឌ្ឍន៍ផ្សេងៗពីសំណាក់រាជរដ្ឋាភិបាល»។

យោងតាមសេចក្តីសម្រេចថ្មីរបស់ក្រសួងសេដ្ឋកិច្ច និងហិរញ្ញវត្ថុ ចុះថ្ងៃទី៩ ខែតុលា ២០២៤ ស្តីពី​ការលើកទឹកចិត្តពន្ធដារចំពោះវិស័យអចលនទ្រព្យក្នុងរយៈពេល១ឆ្នាំទៀត ក្នុងនោះ​មានការលើកលែងពន្ធប្រថាប់ត្រាលើវិស័យយសំណង់ និងអចលនទ្រព្យ សម្រាប់ការផ្ទេរកម្មសិទ្ធិ ឬសិទ្ធិកាន់កាប់លំនៅឋានគ្រប់ប្រភេទ ដែលមានលក្ខណៈជាបុរី ក្នុងតម្លៃក្រោម ឬស្មើ៧ម៉ឺនដុល្លារ រហូតដល់ដំណាច់ឆ្នាំ២០២៥នេះ។

ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ធ្លាប់មានប្រសាសន៍ថា លំនៅដ្ឋានដែលមានតម្លៃធម្យម និងក្រោមមធ្យម នៅតែលក់ដាច់ជាបន្តបន្ទាប់ ដោយឡែកលំនៅដ្ឋានដែលមានតម្លៃខ្ពស់ មិនសូវមានតម្រូវការច្រើនសម្រាប់អតិថិជននោះឡើយ។

យោងតាមរបាយការណ៍ក្រសួងរៀបចំដែនដី នគរូបនីយកម្ម និងសំណង់ ឆ្នាំ២០២៤ បានឱ្យដឹងថា ទិន្នន័យសំណង់លំនៅឋានមានប្រមាណ ៤៧% នៃគម្រោងសំណង់សរុបទូទាំងប្រទេស ក្នុងនោះបុរីចំនួន ៦២៣គម្រោង និងអគារសហកម្មសិទ្ធិចំនួន ២,៨៦៨គម្រោង៕ ដោយ ៖ វិន ឈុនហ៊ាត